KI KAM 10

U Petros bad u Kornelios

1La don u briew ha Kaisaria uba kyrteng u Kornelios, uba long u rangbah shipai ha ka kynhun shipai ka Hima Rom ba la khot “Ka Kynhun shipai Italian”. 2U la long u briew uba riewblei; ma u lem bad ka longïing jong u baroh kawei ki la mane ïa U Blei. U la leh ruh shibun ban ïarap ïa ki Jiw kiba duk bad u ïai duwai ha U Blei. 3Ka la long ha kawei ka sngi kumba lai baje nohphai sngi mynba u la ïoh ka jingïohipaw, ha kaba u la ïohi da kaba shai kdar ïa u angel jong U Blei uba wan shapoh bad ong ha u, “Kornelios!”

4U la khmih shaiñ ïa u angel ha ka jingsheptieng bad u la ong, “Ka dei kaei, ko Kynrad?”

U angel u la jubab, “U Blei u la sngewbha ïa ki jingduwai jong me bad ïa ki kam leh-isynei jong me, bad u kloi ban jubab ïa me. 5Bad mynta to phah katto katne ngut ki rangbah sha Joppa ban leit shem ïa uwei u briew uba ka kyrteng pura ka long u Simon Petros. 6Une u sah shipor ha ka ïing u nongpdem snieh uba kyrteng u Simon, uba shong basah harud duriaw.” 7Te u angel u la leit noh, bad u Kornelios u la khot ar ngut na ki shakri ïing jong u bad uwei u shipai uba riewblei uba long uwei na kiba shakri ïa u. 8U la ïathuh ha ki ïa kaei kaba la jia bad u la phah noh ïa ki sha Joppa.

9Ha ka sngi kaba bud, katba ki dang don ha lynti bad ba ki la jan poi hajan Joppa, u Petros u la leit sha ka tnum jong ka ïing ha ka por shiteng sngi ban duwai. 10U la sngew thngan, bad u la kwah ban bam ei ei; katba dang pynkhreh ïa ka jingbam, u la ïoh ka jingïohipaw. 11U la ïohi ba la plie ïa ka bneng bad kaei re kawei kaba wan hiar kaba i kum ka jaiñ siang kaba heh ïa kaba la pynhiar na ki saw tylli ki dong jong ka sha ka pyrthei. 12Ha ka, la don baroh ki jait mrad, ki kynja bapar bad ki sim khlaw. 13Ka sur ka la ong ha u, “Ïeng joit, ko Petros; to pynïap bad to bam!”

14Hynrei u Petros u la ong, “Da lei lei ruh em, ko Trai! ngam pat ju bam mynno mynno ïa kaei kaei ka bymkhuid lane kaba sang kat kum ka jinglehniam.”

15Kata ka sur ka la kren biang ha u, “Wat ñiew bymkhuid ïa kano kano kaba U Blei u la pynbna ba ka long kaba khuid.” 16Kane ka la jia lai sien, bad nangta ïa kata kaei kaei la shim noh pat sha bneng.

17Katba u Petros u dang sngewlyngngoh shaphang ka jingmut jong kane ka jingïohipaw, ki rangbah kiba u Kornelios u la phah ki la tip hangno ka ïing jong u Simon ka don, bad mynta ki la ïeng ha khmat ka khyrdop. 18Ki la pyrta bad kylli, “Don mo u nongshong basa hangne uba kyrteng u Simon Petros?”

19U Petros u dang ïai pyrshang ban shemphang aïu ka jingïohipaw ka kit jingmut, haba U Mynsiem u la ong, “Ha sngap! Lai ngut ki rangbah ki ïawad ïa me. 20Kumta to khreh bad leit hiar, bad wat sngewlehrain ban leit bad ki, naba nga la phah ïa ki.” 21Kumta u Petros u la leit hiar bad u la ong ha kita ki rangbah, “Dei ma nga uta uba phi ïawad. Phi donkam aïu?”

22“U Kornelios, u rangbah shipai u la phah ïa ngi,” ki la jubab. “U long u briew uba bha uba mane ïa U Blei bad uba la ñiewburom shikatdei da ki Jiw baroh. U angel jong U Blei u la ïathuh ïa u ban khot sngewbha ïa phi sha ka ïing jong u, khnang ba u lah ban ïohsngew ïa kaei kaba phi don ban ong.” 23U Petros u la khot sngewbha ïa kita ki rangbah shapoh bad u la kyrpad jur ïa ki ban sahmiet hangta.

Ha ka sngi kaba bud u la khreh bad u la leit bad ki; bad katto katne ngut ki parabangeit na Joppa ki la ïasynran lem ïa u. 24Ha ka sngi kaba bud u la poi ha Kaisaria, ha kaba u Kornelios u dang ap ïa u, lem bad ki ba-ha-ïing ha-sem bad ki paralok bajan jong u kiba u la khot sngewbha. 25Katba u Petros u dang rung, u Kornelios u la leit kynduh ïa u, u la dem khrup ha ki kjat jong u, bad u la nguh dem ha khmat jong u. 26Hynrei u Petros u la pynïeng ïa u. “To ïeng,” u la ong, “nga hi nga long tang u briew.” 27U Petros u la ïai kren ïa u Kornelios katba u dang leit shapoh ïing, ha kaba u la shem bun ki briew kiba la ïalumlang. 28U la ong ha ki, “Phi hi phi tip bha ba la khang ïa u Jiw da ka niam jong u ban leit jngoh lane ïajan bad ki Jentil. Hynrei U Blei u la pyn-i ha nga ba ngam dei ban ñiew bymkhuid ne basang kat kum ka jinglehniam ïa uno uno u briew. 29Bad kumta haba phi la phah khot ïa nga, nga la wan khlem kano kano ka jingpyrshah. Nga kylli ïa phi, te, balei ba phi phah khot ïa nga?”

30U Kornelios u la ong, “Ka la long kumba ha kane ka por lai sngi mynshuwa ba nga dang duwai ha ka ïing jong nga ha ka por lai baje nohphai sngi. Kynsan u briew uba riam ha ki jaiñ kiba phyrnai u la ïeng ha khmat jong nga, bad u la ong: 31‘Ko Kornelios! U Blei u la ïohsngew ïa ki jingduwai jong me bad u la kynmaw ïa ki kam leh-isynei jong me. 32Phah ïano ïano sha Joppa ban shem ïa u briew uba ka kyrteng pura ka long u Simon Petros. U shong basa ha ka ïing jong u Simon, u nongpdem snieh, uba shong basah harud duriaw.’ 33Bad kumta shisyndon nga la phah khot ïa me, me ruh me la long uba sbun eh ban wan. Mynta ngi baroh ngi don hangne ha ka jingdon ryngkat jong U Blei, da kaba ap ban ïohsngew ïa kano kano kaba U Trai u la bthah ïa me ban ong.”

Ka jingkren u Petros

34 # Deut. 10:17 U Petros u la sdang ban kren: “Mynta nga sngewthuh ba ka long kaba shisha ba U Blei u ñiew kumjuh ïa uno uno baroh. 35Kito kiba mane ïa u bad kiba leh ïa kaba dei ki long kiba la pdiang sngewbha da u, kam pher na kano ka jaitbynriew ki long. 36Phi tip ïa ka khubor kaba u la phah sha ki paid Israel, da kaba pynbna ïa ka Khubor Babha jong ka jingsuk lyngba U Jisu Khrist, uba long U Trai jong baroh. 37Phi tip ïa ka jingjia kaba khraw kaba la jia ha kylleng ka ri Israel, kaba sdang ha Galilaïa hadien ba u Ïoannis u la ïalap ïa ka khubor jong u shaphang ka jingpynbaptis. 38Phi tip shaphang U Jisu uba na Nasareth bad kumno U Blei u la theh halor jong u ïa U Mynsiem Bakhuid bad ïa ka bor. U la leit kylleng, u da leh ki kam babha bad u da pynkhiah ïa baroh kiba la long hapoh ka bor jong u Ksuid, naba U Blei u la don lem bad u. 39Ngi long ki sakhi ïa kaei kaei baroh kaba U Blei u la leh ha ka ri Israel bad ha Jerusalem. Nangta ki la pynïap ïa u da kaba sahnar ïa u ha ka diengphna. 40Hynrei hadien lai sngi. U Blei u la pynmihpat ïa u bad u la pynlong ïa u ban mihpaw, 41ym ha baroh, hynrei tang ha ki sakhi kiba U Blei u la lah jied, kata, ha ngi kiba la ïabam bad ïadih bad u hadien ba u la mihpat na ka jingïap. 42Bad u la hukum ïa ngi ban ïalap ïa ka Gospel ha ki briew, bad ban sakhi ba u long uta ïa uba U Blei u la thung ban long u Nongbishar ïa kiba im bad kiba ïap. 43Baroh ki nongïathuhlypa ki la kren shaphang jong u, da kaba ong ba uno uno uba ngeit ha u un ïoh ka jingmap ïa ki pop lyngba ka bor jong ka kyrteng jong u.”

Ki Jentil ki ïohpdiang ïa U Mynsiem Bakhuid

44Katba u Petros u dang kren, U Mynsiem Bakhuid u la wan hiar halor kita baroh kiba shahshkor ïa ka khubor jong u. 45Ki Jiw kiba la ngeit kiba la wan na Joppa lem bad u Petros ki la sngewlyngngoh ba U Blei u la theh ïa ka jingai ïa U Mynsiem Bakhuid ha ki Jentil ruh. 46Naba ki la ïohsngew ïa ki ba ki kren ha ki ktien kiba pher bad ki da ïaroh ïa ka jingkhraw jong U Blei. U Petros u la kren: 47“Kine ki briew ki la ïohpdiang ïa U Mynsiem Bakhuid, kumba ma ngi ruh ngi la ïohpdiang. Hato don uno uno, te, u ban khang ïa ki na kaba shah pynbaptis da ka um?” 48Kumta u la hukum ba yn pynbaptis ïa ki ha ka kyrteng jong U Jisu Khrist. Te ki la kyrpad ïa u ban sah bad ki sa khyndiat sngi.

Currently Selected:

KI KAM 10: KHACLBSI

Highlight

Copy