1 TIMOTHI 3
3
Ki nongïalam ha ka Balang
1Kane ka long ka jingong kaba shisha: Lada u briew u angnud ban long u nongïalam balang#3:1 u nongïalam balang: Kane ka kyntien ka kham ïajan bad ka kyntien episkopos ha ka Ktien Grik. Ka kham thew ïa u nongïalam ba-halor duh ha ka balang. Katba ïa ka kyntien nongsharai balang la pyndonkam ha kaba ïadei bad ka kyntien presbyteros ha ka Ktien Grik. Ha kaba ïadei bad ka kyntien Presbyteros khmih ïa ka jingbatai ha ka 1 Tim. 4:14., u thrang ïa ka kam kaba bha tam. 2-4#Tit. 1:6-9U nongïalam balang u dei ban long u bym don jingshah kynnoh; u dei ban don tang kawei ka tnga, uba leh adkar, uba synshar ïa lade, bad uba ïaid beit; uba khot ieit basa ïa ki nongwei ha la ka ïing; u dei ban long uba lah ban hikai; um dei ban long uba buaid lane u briew uba ïashoh ïadat, hynrei uba jemnud bad uba ïashongsuk; um dei ban ieit ïa ka pisa; u dei ban long uba lah ban pynïaid ïa la ka jong ka longïing bad u pynlong ïa la ki khun kiba kohnguh ïa u da jingñiewburom baroh. 5Naba lada u briew um nang kumno ban pynïaid ïa la ka jong ka longïing, kumno u lah ban sumar ïa ka balang U Blei? 6U dei ban long uba la rangbah bha ha ka jingngeit, khnang ba un ym kylla sngewmeng bad yn ïoh pynrem, kumba u Ksuid u la long. 7U dei ban long u briew ïa uba la ñiewburom da ki briew kiba shabar ka balang, khnang ba un ym jahburom bad hap ha ka jingriam u Ksuid.
Ki Nongïarap ha ka Balang
8-9Ki nongïarap ha ka balang ki dei ban don ka jinglong kaba bha bad kiba sngur mynsiem; kim dei ban kyrni dih waiñ lane kiba lalot pisa; ki dei ban bat ïa ka jingshisha ba la pynpaw jong ka jingngeit da ka jingïatiplem kaba sngur. 10Dei ban da tynjuh shuwa ïa ki, bad nangta, lada ki la biang, kin trei ïa ka kam. 11Ki tnga jong ki ruh, ki dei ban don ka jinglong babha bad kim dei ban ïakren lorni; ki dei ban long kiba adkar bad kiba hok ha kiei kiei baroh. 12U nongïarap ha ka balang u dei ban don tang kawei ka tnga, bad uba lah ban pynïaid bha ïa la ki khun bad ïa la ka longïing. 13Kito ki nongïarap kiba trei bha ïa la ka kam, ki ïoh ha lade ïa ka nam babha bad ki lah ban kren da ka jingshlur shaphang ka jingngeit jong ki ha U Khrist Jisu.
Ka jingmaïan kaba khraw
14Katba nga dang thoh ïa kane ka shithi sha me, nga kyrmen ban ïoh wan kloi bad ban ïohi ïa me. 15Hynrei lada la kum pyntud ïa nga, kane ka shithi kan ïathuh ïa me kumno ba ïa lade ngi dei ban long ha ka longïing jong U Blei, kaba long ka balang jong U Blei uba im, ka rijied bad nongkyrshan jong ka jingshisha. 16Ym don ba lah ban kyntait katno kaba khraw ka long ka jingmaïan jong ka jingngeit jong ngi:
U la wanpaw ha ka dur ka jinglongbriew,
la pyn-i ba u long uba shisha da U Mynsiem,
bad la ïohi ïa u da ki angel.
La ïalap ïa u hapdeng ki jaitbynriew,
la ngeit ïa u ha kylleng ka pyrthei,
bad la shim noh ïa u sha bneng.
Currently Selected:
1 TIMOTHI 3: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
