LUKA 7
7
Sipai za hotu suok sukdam
(Mt 8.5-13)
1Chun, mihai hrieta a thu po po a hril zoin, Kapernaumah a lût a.
2Chun, sipai za hotu tû amanih a suok dittak a dam naw a, a thi vâng vâng a.
3Chuongchun, Isu chanchin a hriet phingleh a suok chu hung sukdam dinga ngên hrâm dingin a kuomah Juda upahai a tir a.
4Chun, anni chu Isu kuom an va tlung a, ṭhahnemngaitakin an ngên a, “Ama hi, i thawpêk tlâk a nih:
5ei hnam dâm a hmangai a, kan inkhâwmna in dâm a mi bâwlpêk a nih,” an ta.
6Chuongchun, Isu chun anni a zui ta a. Chun, in an tlung vâng vângin sipai za hotu chun a kuomah a ruolhai a tir a, “Intak sakin hung naw rawh, ka in sûng i lûtna tlâk a ni nawh;
7chuleiin, i kuoma hung tlâk khawm niin kân ring naw a, thu chau hril la ka naupang dam el a tih.
8Kei khawm mi thua um ka na, ka hnuoiah sipaihai an um a; hi mipa kuoma hin, ‘Fe rawh’ ka ti leh a fe a; mi dang kuoma khawm, ‘Hung rawh’ ka ti leh a hung hlak; ka suok kuoma khawm, ‘Hi hi thaw rawh,’ ka ti leh a thaw hlak,” a ta.
9Chun, Isûn chuong thu chu a hrietin ama chu mak a ti hle a, a ngha a, mipui a zuituhai kuoma chun, “Ka hril cheu hi, Israelhai lai khawm hieng ang lâwma ringna nasa hi ka hmu nawh,” a ta.
10Chun, a mi tirhai chu in tieng an fe nâwk a, suok chu damin an hmu ta a.
Nain khuoa hmeithai naupa sukdam thu
11Chun, sâwt nawteah khaw pakhat Nain an tia chun a fe a; a închûktirhai le mipui nasatak a kuomah an fe ve a.
12Chun, kul kawtkhâr kâwl a tlungin, ngai ta, mithi an hung zâwn dawk a, a nu naupa nei sun a na, ama hlak hmeithai a ni si a; an khuohai tamtak chu a kuomah an um a.
13Chun, Lalpa chun hmeithai chu a hmu phingleh a lunginsiet bêk bêk a, “Ṭap naw,” a ta.
14Chun, a va hnai a, hlâng chu a them a; chuongchun, a zâwntuhai chu an ngîr a. Chun, “Tlangvâl, tho rawh ka ti che hi,” a ta.
15Chun, mithi chu a ṭhung dawk a, a hung ṭawng ta a. Chun, Isûn a nu kuomah a pêk ta a.
16Chun, mi po poin an ṭi a, Pathien an inpâk a, “Eini lai zâwlnei ropuitak a hung um ta a ni hi,” an ta. “Pathienin a mihai a hung sîr tah a nih,” an ti bawk a.
17Chun, chu mipa chungchâng thu chu Judai ram po po le a kâwl vêl ram tinah ân thang suok ta a.
Isu kuoma Johan mi tirhai
(Mt 11.2-19)
18Chun, Johan inchûktirhai chun chuong thu po po chu Johan an hril a.
19Chuongchun, Johan chun a închûktirhai pahni a ko a, Lalpa kuoma chun a tir a, “A hung ding chu i ni, mi dang am kan la ngai ding?” tiin.
20Chun, mihai chu a kuom an hung tlung chun, “Baptistu Johanin, ‘A hung ding chu i ni, mi dang am kan la ngai ding?’ ti dingin i kuomah a mi hung tir a nih,” an ta.
21Chun, chuong lai tak chun Isûn damnaw dâm, hripui invawihai, khawhri imanhai tamtak a sukdam a, mitdel tamtak khawm an mit a sukvar a.
22 #
Is 35.5-6; 61.1 Chun, an kuomah, “Fe nâwk ta unla, thil in hmu le in hriet hi Johan va hril ro; mitdelhai an mit a hung var tah, kebaihai kein an lâwn tah, inphârhai an hung inthieng tah, nasêthai an na a hung var tah, mithihai keithoin an um tah, pasiehaiin Chanchin Ṭha hril an dawng tah.
23Chun, tûkhawm ka chunga lungninawna hmu naw chu an hamṭha,” a ta, a dawn a.
24Chun, Johan mi tirhai chu an fe hnungin Isûn mipuihai kuoma chun Johan thu a hril ta a, “Ieng en dingin am thlalêra khan in hang fe a? Luong thli imût hnîng maw?
25Annawleh, ieng en ding takin am in hang fe a? Puon innêm sil maw? Ngai ro, puon innêm sil le mi inhawitirhai chu lal inahai in sawnnaw an um.
26Annawleh, ieng en ding takin am in hang fe a? Zâwlnei maw? A ni ngei kha, ka ti cheu hi, zâwlnei nêk khawma ropui lem,
27 #
Mal 3.1
‘En ta, ka tirko i hmaah ka tir a nih,
Ama chun i hmaah i lampui siem a tih,’
ti, a chanchin an iziek kha, ama hi a nih.
28Nuhmei sûnga insieng laia chun Johan nêka ropui lem an um nawh; nisienlakhawm, Pathien rama mi chîn tak khawm ama nêkin an ropui lem,” a ta.
29 #
Mt 21.32; Lk 3.12 Chun, mi po poin an hrietin, siedâwltuhai leh, Johan baptisma lo chang tah an na, Pathien an inthiem a.
30Pharisaihai le dânhretuhai ruok chu a kuoma baptisma lo chang tah an ni ve naw a, anni ta dinga Pathienin rem a iruotpêk chu an pawm nawh.
31Chuongchun, Isu bawkin, “Tulai ruoltharhai hi ieng lêm hrilkhîng ka ti aw?
32Naupang dâwr hmuna ṭhunga, ‘Theihle kan mûtpêk cheu a, in lâm si naw a; kan ṭap rak a, in ṭap si naw a,’ tia inkhêkkhumhai ang hi an nih.
33Baptistu Johan chu a hung a, bei a fâk naw a, uoin khawm a dâwn naw a, nangnîn, ‘Khawhri a zâwl a nih,’ in ti a.
34Mihriem Naupa a hung a, a fâkin a dâwn a, ‘En ta u, bu he mi, uoin he mi, siedâwltuhai le mi suolhai ruolpa saw!’ in ti si a.
35Nisienlakhawm, Varna chu a nau po poin an inthiem,” a ta.
Simon ina Isu a tlung thu
36Chun, Pharisaihai laia mi pakhatin a kuomah bu fa dingin a fiel a. Chun, Pharisai ina chun a lût a, thlaithlêng a awt a.
37 #
Mt 26.7; Mk 14.3; Jn 12.3 Chun, ngai ta, chu khuoa nuhmei suol pakhat um chun, Pharisai inah thlaithlêng awtin a ṭhung ti a hriet phingleh alabastar bûrin hriek rim inhnik a hung chawi a.
38A hnungah a ke bula chun ṭap pumin a ngîr a, a mitthliin a ke a lo far hu a, a samin a hrûk a, a ke chu a fâwp a, hriek rim inhnik chun a nâl a.
39Chun, a fieltu Pharisai chun a hmu chun, a lungrilin, “Hi mipa hi zâwlnei a ni chun a themtu nuhmei hi tu am a ni, mi ieng ang am a ni hre âwm tak, mi suol a ni si a,” a ta.
40Chun, Isûn a kuomah, “Simon, i kuomah thu bau khat hril ding ka nei,” a ta, a dawn a. Chun, ama chun, “Hril ta la, Inchûktirtu,” a ta.
41Chun, Isûn “Tangka inpûktirtu tuin amanih leibattu pahni a nei a; pakhatin duli za nga a bat a, pakhatin sâwmnga.
42An thung thei naw leiin, a ngaidam ve ve a. Chuongchun, chuhai chun a tû lem chun am ama chu hmangai lem an ta?” a ta.
43Simon chun, “A ingaidam tam lem chun niin ka ring,” a ta, a dawn a. Chun, ama chun a kuomah, “I ti dik ie,” a ta.
44Chun, nuhmei tieng chu a ngha a, Simon kuoma chun, “Hi nuhmei hi i hmu? I inah ka hung lût a, nangin ka ke sâwpna ding tui i mi pêk naw a, ama ruok hin chu a mitthliin ka ke a sukhu a, a samin a hrûk a nih.
45Nangin fâwp hrim hrim i mi fâwp nawh; ama ruok hin chu ka hung lût hlima inthawk ka ke fâwp a ma nawh.
46Nangin ka luah hriek i mi nâl nawh; ama ruok hin chu ka kepha hriek rim inhnik a nâl.
47Chuleiin, ka ti che hi, a suol tamtak kha ngaidamin a um tah; ama khawmin a hmangai ta bêk bêk a ni hi; amiruokchu, ngaidam tlâwm chun, tlâwmtêin a hmangai hlak,” a ta.
48Chun, nuhmei kuoma chun, “I suolhai ngaidam a ni tah,” a ta.
49Chun, a thlaithlêng awtpuihai chun, “Suolhai khawm ngaidam hi tu am a na?” an in ti a.
50Chun, ama chun nuhmei kuoma chun, “I ringna hi sandam I ni pha a nih, thlamuongtakin fe rawh,” a ta.
Currently Selected:
LUKA 7: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
