LUKA 14
14
Châwlnia invûng sukdam
1Chun, Châwlniin Pharisai hotu pakhat ina bu fa dinga a fe laiin, an enthlit a.
2Chun, ngai ta, a hmaa chun damnaw invûng mi tû amanih a um a.
3Chuongchun, Isûn Dân inchûktirtuhai le Pharisaihai chu a biek a, an kuomah, “Châwlni hin sukdam a thieng am a thieng naw?” a ta.
4Anni ruok chu an to zing a; ama chun damnaw chu a chel a, a sukdam a, ân fetir ta a.
5 #
Mt 12.11
Chun, an kuomah, “Nangni lai in sabengtung amanih, sebâwng amanih, tuisunsuoah lo tla sien la, Châwlni khawmin tûin am kei suok nghâl nâwng in ta?” a ta.
6Chuong thu chu an dawn thei naw nâwk bawk a.
Inngaitlâwmna le mi lâwm dân thiemna
7Chun, an mi fielhaiin ṭhungpha ṭhatak an thlang hlakzie a hmu a, an kuomah tekhithu a hril ta a;
8 #
Tv 25.6-7
“Inneina ruoiṭhe fa dingin tûin amanih a fiel pha che chun ṭhungpha ṭhatakah ṭhung naw rawh; chuong naw chun, i nêka mi ṭha lem lo fiel hlau a ta,
9chuongchun, a fieltu che chun, ‘Hi pa ṭhungna ding hi inkien rawh,’ hung tîng a che a; chun, nang inzaktakin ṭhungpha ṭha nawtakah i ṭhung nâwk si ding a nih.
10An fiel che chun ṭhungpha ṭha naw takah va ṭhung lem hlak rawh; chuongchun, a fieltu che a hung pha leh, i kuomah, ‘Ruola, ṭhungpha ṭha deua hin hung ṭhung rawh,’ ti thei a ti che. Chuongchun, i thlaithlêng awtpuihai mithmua chun chawimawiin um i tih.
11 #
Mt 23.12; Lk 18.14 Inngaihlu taphawt chu tlâwm an ta; inngaitlâwm chu chawimawiin um an tih,” a ta.
12Chun, a fieltu kuoma khawm chun, “Sûna manih, zâna manih ruoi i ṭhe pha leh, i ruolhai, i unauhai, i laibunghai, i vêng hausahai chu fiel naw rawh; chuong naw chun, fiel ve nâwk an ti che a, thung nâwk kher an ti che.
13Ruoi i ṭhe pha chun, pasiehai, piengsuolhai, keinbaihai, mitdelhai fiel lem rawh;
14chuongchun, la hamṭhâng i tih; anni chun thungna ding che nei naw ni hai a, chuongchun, mi fel tho nâwk pha chun thungin i um ding a ni si a,” a ta.
Ruoi ropuitak tekhithu
(Mt 22.1-10)
15Chun, a thlaithlêng awtpui tûin amanih chuong chu a hriet a, a kuomah, “Pathien rama bu fa ding chu a hamṭha ie!” a ta.
16Chun, ama chun a kuomah, “Mi tûin amanih ruoi ropuitak zânah a ṭhe a, mi tamtak a fiel a;
17chun, a fâk huna chun a mi fielhai kuomah, ‘Hung ta ro khai, tuhin iengkim inzo a ni tah,’ ti dingin a suok a tir a.
18Chun, an rêngin inthuruolin suonlam an siem seng a. A hmasatak chun a kuomah, ‘Lo kân châwk ta a, a ena ka fe a ṭûl a nih; mi lunginsiet la mi hung inphatpêk rawh,’ a ta.
19Chun, mi dangin, ‘Sebâwng tuok nga kân châwk ta a, a sie le ṭha fie dingin ka fe ding a na, mi lunginsiet la mi hung inphatpêk rawh,’ a ta.
20Chun, mi dangin, ‘Nuhmei ka nei ta a, chuleiin, ka hung thei nawh,’ a ta.
21Chun, suok chun a pu kuomah chuong thu chu a va hril a. Chun, in neitu chu a lunginsen a, a suok kuoma chun, ‘Suok la, kawtthlêrahai, kâwmkârahai, fe zeu zuou la, pasiehai, piengsuolhai, mitdelhai, keinbaihai, hitaka hin hung ṭhuoi lût rawh,’ a ta.
22Chun, suok chun, ‘Pu i thu mi pêk ang khan ka thaw ta a, nisienlakhawm, hmun a la chuong ta rawp,’ a ta.
23Chun, a puin suok kuoma chun, ‘Suok la, lamlienahai, khawhnâwmahai fe la, ka in sipna dingin mî hung thlêm lût hrâm rawh.
24Ka hril che hi, mi ka ifielhai khan pakhat khawmin ka ruoiṭhe fa naw ni hai,’ a ti a,” a ta.
Inchûktir nina man chu
(Mt 10.37-38)
25Chun, mipui nasatak ama leh an fe ve a; chuongchun, ama chu a ngha a, an kuomah,
26 #
Mt 10.37
“Tûkhawm ka kuoma hung chun a pa dâm, a nu dâm, a nuhmei dâm, a nauhai, a unauhai, a farnuhai, ama hringna chenin a theida naw chun, ka închûktir ni thei naw ni.
27 #
Mt 10.38; 16.24; Mk 8.34; Lk 9.23 Tûkhawm mâni kraws puta mi zui naw chu, ka închûktir ni thei naw ni.
28“Nangni laia tûkhawm hin in insâng bâwl tum unla, a tirin ṭhungin, bâwl zona khawp sum in nei le nei naw hre dingin, a man ding chin tuin am sût nâwng in ta?
29Chuong naw chun, lung phûm ta zeta a bâwl zo thei si naw chun, a en taphawtin nuisan an ta,
30‘Hi mipa hin in ân kal zet a, a bâwl zo thei si naw a,’ tîng an tih.
31“Annawleh,lal tuin am, lal dang do dinga fe suokin, inṭhung hmasa zetin, ama do dinga sîng hni ruol le hung inthawk chu, sîng khat leh a lo do lêt ngam ding le ding naw, mî râwn nâwng a ta?
32Chuong a ni naw leh, lal dang chu hlataka a la um laiin, inremna tieng thutiem hni dingin palai tir a tih.
33Chuong ang bawkin, nangni lai hin tûkhawm a nei po po mâksan naw chu, ka închûktir ni thei naw nih.
Machi da chu
(Mt 5.13; Mk 9.50)
34“Machi hi a ṭha; nisienlakhawm, machi khawm a da ta chun, iengin am sukal nâwk an ta?
35Leihnuoi dingin ṭha naw ni a, êkdûr dingin ṭha bawk naw nih; mîn an peihâwn hlak. Tûkhawm hrietna dinga na nei chun hre raw se,” a ta.
Currently Selected:
LUKA 14: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
