JOHAN 12
12
Bethania Mariin hriek a nâl
(Mt 26.6-13; Mk 14.3-9)
1Chun, Fekân Ruoiṭhena ding ni ruk a la umin, Isu mithi laia inthawka a keitho Lazar umna Bethani kha a hung tlung a.
2Chun, chutaka chun ama ta dingin zânah ruoi an ṭhe a; Martha chun rawng a bâwl a, Lazar chu a thlaithlêng awtpuitu pakhat a nih.
3Chun, Mariin bûk zâtve Spiknard hriek rim inhnik totak a hung chawi a, Isu kehai a nâl a, a samin a kehai chu a hrûk a; chuongchun, chu hriek rim chun in chu a sip rum rum el a.
4Nisienlakhawm, Iskariot Juda, a închûktir pakhat, ân mantirtu ding chun,
5“Hi hriek rim inhnik hi iengdinga duli#Gr.Denarion za thuma zawra pasiehai kuoma an pêk lem naw am a na?” a ta.
6(Pasiehai a ngaisak leia chu thu chu hril a ni nawh; inru a na, tangka ip a kawl a, a sûnga um chu a lâk hlak lei a ni lem a).
7Chun, Isûn, “Tosan rawh, an mi phûm nia dingin khêk raw se.
8 #
Dt 15.11
Pasiehai chu kumkhuoin in kuoma um an nih, kei ruok chu kumkhuoa in kuoma um ding ka ni nawh,” a ta.
Lazar khawm sukhlum an tum
9Chun, Isu chutaka chun a um ti Juda mi narânhai chun an lo hriet ta a; chun, an hung a, Isu chau chu an hungna san a ni naw a, mithi laia inthawka a keitho Lazar khawm kha hmu dingin a ni bawk a.
10Chun, thiempu lalhai chu Lazar khawm sukhlum dingin an inrâwn a;
11ama leia Juda tamtakin an pakai san a, Isu an ring hlak leiin.
Jerusalema Isu ropuitaka a lût thu
(Mt 21.1-11; Mk 11.1-12; Lk 19.28-40)
12A zînga chun, ruoiṭhenaa hung mipui tamtakin Isu Jerusalemah a hung ding a nih ti an hrietin,
13 #
Sm 118.25,26 tûm kauhai an chawi a, a tuok dingin an va suok a, “Hosanna, Lalpa hminga Israel Lal hung chu inpâkin um raw se,” tiin an khêk a.
14Chun, Isûn sabengtungtê a hmu a, a chungah a chuong a,
15 #
Zek 9.9
“Ṭi naw, Zion naunu,
En ta, i Lal chu,
Sabengtungtê chunga chuongin,
A hung ding a nih,”
ti ziek ang khan.
16Chuong thu chu a tîrin a închûktirhaiin an hriet nawh; nisienlakhawm, Isu chawimawia a um hnung chun, a chanchinah chuong thu chu ziek a nih ti le, a chungah chuong thil chu an lo thaw ngei ti an hriet ta a.
17Chun, Lazar thlâna inthawka a ko suok a, mithi laia inthawka a keitho laia mipui umhai khan, a thu chu an inhriettir ta pei a.
18Chu lei chun a nih mipuihai khawmin ama chu an tuok chu; chu thilmak chu a thaw ti an hriet si a.
19Chuongchun, Pharisaihai chun, “Hre ro, iengkhawm in law thei naw hi; en ta u, khawvêlin ama an zui ta hi,” an ta.
Grik mi tuhaiin amanih Isu an zawng
20Chun, ruoiṭhenaa Pathien chibai bûk dinga hang fehai lai Grik tuhai amanih an um a.
21Chuonghai chu Galili rama Bethsaida khuoa mi Philip kuoma chun an hung a, a kuomah, “Pu, Isu hmu kan nuom,” an ta, an ngên a.
22Philip chun Andri a hung hril a; Andri le Philip chun Isu an hung hril a.
23Chun, Isûn a dawn a, an kuomah, “Mihriem Naupa chawimawia a um hun chu a tlung tah.
24Titakzetin, titakzetin ka hril cheu hi, bu mal hnuoiah a tla a, a thi naw chun, a mal chauin a um zing hlak; a thi ruok chun tamtakin a ra hlak.
25 #
Mt 10.39; 16.25; Mk 8.35; Lk 9.24; 17.33 Tûkhawm a hringna thlâkhla chun ân hmang hlak, tûkhawm hi khawvêla hin a hringna ngainêp chun chatuona hringna vawng zing a tih.
26Tûkhawmin ka rawng a bâwl chun mi zui raw se; ka umnaah ka rawng bâwltu khawm um a tih. Tûkhawmin ka rawng a bâwl chun ama chu Pain chawimawi a tih.
Mihriem Naupa khaikânga a um ding
27“Tuhin ka lungril a lunginzîng, ieng am hril ka ta aw? ‘Pa, hi huna inthawk hin mi sanhim rawh,’ ka ti ding am a nih? Ti lo e, hi ding lei taka hi, hi huna hi hung ka nih,
28Pa, i hming inchawimawi rawh,” a ta. Chuongchun, vâna inthawkin râwl a hung suok a, “Ka chawimawi tah, chawimawi nâwk bawk ka tih,” a ta.
29Chun, mipui a kâwla ngîrhai chun chu chu an hriet a, “Vân ân rûm a nih,” an ta, mi danghaiin, “Vantirkoin ama a biek a nih,” an ta.
30Isûn a dawn a, “Chu râwl chu ka ta dinga hung suok a ni nawh, nangni ta dingin a ni lem.
31Tuhin hi khawvêl hi ngaituo lai a nih; tuhin hi khawvêl lal hi pei suok nîng a tih.
32Chun, kei hnuoia inthawka khaikânga ka um chun, mi po po keia tieng hîp ka tih,” a ta.
33Chu thu chu ieng angin am a thi ding ti inhriettirna dingin a hril a nih.
34 #
Sm 110.4; Is 9.7; Ezek 37.25; Dan 7.14 Chun, mipui chun a kuomah, “Krista chu chatuonin a um zing ding a nih ti Dân Lekhabuah kan hriet ie, nangin, ‘Mihriem Naupa khaikângin a um ding a nih,’ ieng ti tia ti am i na? Chu Mihriem Naupa chu tu am a na?” an ta, an dawn a.
35Chun, Isûn an kuomah, “Var hi nangni lai sâwt nawte a la um hri hi, var in nei sûng hin lêng ro, inthimin a nang nawna ding cheuin; tûkhawm inthima lêng chun a fena chin a hriet ngai nawh.
36Var in nei sûng hin var hi ring ro, var nauhai in hung ni theina dingin,” a ta. Chuong thu chu Isûn a hril a, chun, a fe a, an hmu naw dingin ân bihmang a.
Judahai ring naw zie
37An hmaah chuong ang thilmak tamtak thaw sienla khawm ama an ring si nawh:
38 #
Is 53.1
“Lalpa, kan thu hril tuin am a ring a?
Lalpa kut khawm tu kuom âm ân lang a?”
ti, Zâwlnei Isaiin a hril kha a tlungna dingin.
39Hi lei hin a nih an ring thei naw, Isaiin,
40“Amain an mit a sukdel a,
An lungril a sukngar a;
Chuong naw chun, an mitin hmu rawi an ta,
An lungrilin hrethiem rawi an ta,
Ngha kîr nâwk rawi an ta;
Keiin anni sukdam rawi ka tih,”
ti a hril nâwk lei hin.
41Isaiin a ropuizie a hmu le a chanchin a hril lei hin chuong thu chu a hril a nih.
42Nisienlakhawm, thuneituhai ṭhangsin mi tamtakin Isu an ring ta a; amiruokchu, Pharisaihai leiin an inpuong nawh; chuong naw chun, inkhâwmna in a hnawngin um an tih.
43Pathien kuoma ropuina nêkin mihriem kuoma ropuina an dit lem si a.
Isu ṭawngbau rorêltu a nizie
44Chun, Isu a khêk a, “Tûkhawm keia mi ring chu keia mi ring a ni naw a, a mi tirtu ring a ni lem.
45Tûkhawm a mi hmu chu a mi tirtu hmu a nih.
46êntu dinga khawvêla hung ka nih, a mi ring taphawt chu inthima an um zing nawna dingin.
47Tûkhawm ka thu hril hrein awi naw sienla khawm, keiin thiemnaw kân chang tir nawh; khawvêl thiemnaw inchangtir dinga hung ka ni naw a; khawvêl sanhim dinga hung ka ni lem.
48Tûkhawm mi dit lova, ka thu hrilhai vawn lo chun, thiemnaw inchangtirtu pakhat a nei a nih; ka thu hril kha, kha thu ngei khan ni kin nia chun ama thiemnaw inchangtir a tih.
49Keia phuokfâwmin ka hril si nawh; Pa a mi tirtu chun, ka hril ding le ka ṭawngna ding chu thu a mi pêk a ni lem.
50Ama thupêk chu chatuona hringna a nih ti ka hriet, chuleichun, thu ka hrilhai hi Pa mi hril ang peiin ka hril a nih,” a ta.
Currently Selected:
JOHAN 12: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
