INṬANNA 8

Tuilêt tâwpna

1Chun, Pathienin Noa le lawnga a kuoma thilhring tinrêng le ran um po po chu a hriet zing a; chun Pathienin hnuoi chunga hin thli ân hrângtir a, chuongchun, tui chu a hung kang ṭan ta a,

2tui inthûktak hnarhai le vân tukverhai khawm chu a hung inkhâr ta a, vâna inthawka ruo hung sûr chu sukchâtin a um ta bawk a;

3chuongchun, tui chu hnuoi chunga inthawk chun a kang ta deu deu a, ni za le sâwmnga chu a bo hnung chun tui chu a tlâwm ta deu a.

4Chuongchun, lawng chu thla sarina, ni sâwm le ni sari nia chun Ararat tlânga chun a lo innghat ta a.

5Chun, tui chu thla sâwmna chenin a tlâwm deu deu pei a; thla sâwmna ni khat nia chun, tlâng sîphai chu a hung inlang ta a.

6Chun, ni sâwmli hnunga chun Noa chun lawng tukver a siem kha a hawng ta a:

7chun, vaâk pakhat ân vuong suoktir a; chu chu a suok a, hnuoia inthawka tui chu a kang zo hmakhat chu a vuong vêl a vuong vêl a.

8Chun, hnuoi chunga tui a tlâwm ta le tlâwm ta naw hrietna dingin vaṭhu ân vuong suoktir nâwk a;

9nisienlakhawm, vaṭhu chun fûkna ding hrim hrim a hmu naw a, a kuomah lawngah a kîr nâwk ta a, tui chu hnuoi chung po poa chun a la um si a; chuongchun, a kut a hang pur dawk a, a man a, lawng sûngah a kuomah a lâk lût nâwk ta a.

10Chun, ni sari dang a nghâk nâwk a, vaṭhu chu lawnga inthawk ân vuong suoktir nâwk a;

11vaṭhu chu zântieng chun a kuomah a hung lût nâwk a; chun, ngai ta, oliv hna suktlawng hlim a hmûra chun a hung put a: chuongchun, Noa chun hnuoiah tui a tlâwm tah ti a hriet a.

12Chun, ni sari dang a nghâk nâwk a, vaṭhu chu ân vuong suoktir nâwk a; a kuomah a hung kîr nâwk ta naw a.

13Chun, a kum za ruk le a kum khatna, a thla khatna ni khat nia chun tui chu hnuoia inthawk chun a kang zo ta a: chuongchun, Noa chun lawng inkhumna chu a hâwk a, a en a; chun, ngai ta, hnuoi chung chu a lo inhil ta huou el a.

14A thla hnina ni sâwmhni le ni sari nia chun hnuoi chu a hung ṭâwl zo ta a.

15Chun, Pathienin Noa kuoma chun a hril a,

16“Lawnga inthawkin suok ro, nang le i nuhmei, i naupasalhai le an nuhmeihai leh.

17Tisa po po laia mi thil hringna nei tinrêng i umpuihai, vate dâm, ran dâm, thilhring hnuoia bawkinvâka lâwn tinrêng dâm le khan i kuomah ṭhuoi suok rawh, hnuoia hin te neiin chi tamtak thlaha an hung pung theina dingin,” tiin.

18Chuongchun, Noa chu a suok a, a naupasalhai le a nuhmei le a nauhai nuhmeihai khawm a kuomah an suok ve a;

19sa tinrêng dâm, thilhring tinrêng dâm, vate tinrêng dâm, hnuoi chunga chângthei taphawthai chu anni chi umdân ang sengin lawnga inthawk chun an suok ta a.

20Chun, Noa chun Lalpa ta dingin maichâm a siem a; chun, sa thieng tinrêng laia mi le, vate thieng tinrêng laia mi a lâk a, maichâma chun pumrawhmang thilinhlânhai ân hlân ta a.

21Chun, Lalpain riminhnik chu a hriet a; chun, Lalpa chun a lungrilin, “Hnuoi chu mihriem lei chun ṭawngsie inphur nâwk ta naw ning, mihriem lungril ngaituonahai chu an chîntea inthawkin a suol si a; tuta ka hrem ang hin thilsiem hringna nei tinrêng chu hrem nâwk ta ngai nâwng ka tih.

22Hnuoi um sûng po bu tu le bu lâk, khaw dei le khaw lum, nipui le phalbi le, sûn le zân dâm hi bo naw nih,” a ta.

Currently Selected:

INṬANNA 8: HMOVBSI

Highlight

Copy