INṬANNA 6

Mihriem rîtlona

1Chun, hieng hi a na, hnuoi chungah mihriem an hung pung a, naunuhmeihai an hung nei tâwl chun,

2Pathien naupasalhai chun mihriem naunuhmeihai chu hmêl ṭhatakin an hmu a; chuongchun, an dit zâwng taphawthai chu nuhmeiah an nei tâwl hlak a.

3Chun, Lalpa chun, “Ka thlarau chu thi thei mihriema chun chêng kumkhuo naw nih; anni chu tisa el an ni si a, chuongchun, an dam sûng kum khawm kum za le sawmhni ni raw se,” a ta.

4 # Nam 13.33 Chuong lai le chu hnunga khawm, Pathien naupasalhaiin mihiem naunuhmeihai chu an pâwl a, anni leh nauhai an nei hlak lai khan Nephilimhai chu hnuoia hin an um a; chuonghai chu tienlaia mi hrât, indothiem hming inthanghai chu an nih.

5Chun, Lalpa chun hnuoia hin mihriem suolzie chu nasatak a nih ti le, a lungril ngaituonahai hrim hrim chu suol ruok a nih ti a lo hriet a.

6Chuongchun, Lalpa chun hnuoia hin mihriem a lo siem ta lei chun ân sîr hle a, lungril natnain a hmang pha ta a.

7Chuongchun, Lalpa chun, “Ka mihriem siem hi hnuoi chunga inthawk hin sukbohmang el ka tih, mihriem dâm, sa dâm, thilhring dâm, chunglêng vate dâm chen hin; ka lo siem ta leiin kân sîr a nih,” a ta.

8Noa ruok chun Lalpa lunginsietna a chang a.

Noa lawng tuk thu

9Hienghai hi Noa thlahai chu an nih: Noa chu mi feltak a na, a dam ruolpuihai lai chun sawisêlbo a nih: Noa chu Pathien leh an lêng hmunkhat hlak.

10Noa chun naupasal pathum, Sem, Ham le Japheth a nei a.

11Chun, hnuoi hi Pathien mithmuin a se zo ta a, hnuoi hi inpâwngnêknain a sip zo ta bawk a.

12Chun, Pathienin hnuoi hi a en a; chun, ngai ta, a se zo tah: tisa po poin hnuoia hin an umdân an suksiet zo ta si a.

13Chun, Pathienin Noa kuoma chun, “Tisa po po suktâwpna ding thu ka sukthlûk tah: anni leiin hnuoi hi inpâwngnêknain a sip zo ta si a: chuongchun, ngai ta, a hnuoi pumin ka sukbohmang ding a nih.

14I ta dingin fâr thingin lawng siem rawh: lawnga chun pindanhai siem i ta, a puo tieng le a sûng tieng chu a chârnain châr suok vawng rawh.

15Hi hi i siem dân ding chu a nih: lawng dung tieng chu tawng za thum ni sienla, a khang tieng chu tawng sâwmnga, ân sâng tieng chu tawng sâwmthum ni raw se.#NIV Fit 450a sei, fit 50a lien, fit 30a insâng. TEV Metar 133a sei, metar 22a lien, mêtar 13a insâng

16Lawnga chun tukver siem i ta, a chung tieng tawng khat chinah i zo ding a nih; chun, lawng kawtkhâr chu a pangah i hawng ding a nih; sâwng hnuoihnung le sâwng hnina le sâwng thumna neiin i siem ding a nih.

17Chun, ngai ta, keima ngeiin, tisa po po hringna thuoka inthuok taphawt chu vân hnuoia inthawka sukbohmang dingin hnuoia hin tui ka suklêt ding a nih; hnuoia thil tinrêng um hi thi vawng an tih.

18Amiruokchu, ka thuthlung chu i kuomah sukdet lem ka tih, lawnga chun i lût ding a nih, nang lût i ta, i naupasalhai leh, i nuhmei leh, i nauhai nuhmeihai khawm i kuomah an lût ve ding a nih.

19Chun, tisa po poa thilhring tinrêng laia mi, chi tin pahni peiin i kuoma a hringa um ve dingin lawnga chun i ṭhuoi lût ding a nih, a pui le a chal an ni seng ding a nih.

20Vatehai anni chi umdân ang sengin, ranhai anni chi umdân ang sengin, thilhring hnuoia bawkinvâk chi tinrêng anni chi umdân ang sengin, chi tin pahni pei a hringa um dingin, i kuomah an hung ve ding a nih.

21Chun, bu fâk hlak ang chi po po la la, i kuomah sie khâwm rawh; chuongchun, nangni le anni ta dingin bu nîng a tih,” a ta.

22Chuong ang chun Noa chun a thaw a, Pathienin a kuoma thu a pêk po po ang ngei chun a thaw ta a.

Currently Selected:

INṬANNA 6: HMOVBSI

Highlight

Copy