INṬANNA 49

A naupasalhai chungthu Jakobin a hrillâwk

1Chun, Jakobin a naupasalhai chu a ko a, a hril a; “Ni nuhnunghaia in chunga thil la tlung ding chu ka hril theina ding cheuin hung inkhâwm ro.

2Nangni Jakob naupasalhai, hung inkhâwm unla, ngai ro:

In pa Israel thu hi ngai ro.

3Reuben, nang hi ka nau lutîr,

Ka thilthawtheina, ka hrâtna ra hmasatak,

Insângtakna le thuneitakna neitu i nih.

4Nisienlakhawm, tui anga det lo i ni a,

Chunghnungtakna chu nei naw ti nih,

I pa khumpui i kai leiin:

Chun, chu chu i sukpawrche a, ka zâlnaah i kai kha.

5Simeon le Levi hi unau an nih:

An kâwlhnâmhai chu thisen insuona hriemhrei an nih.

6Aw ka thlarau, nang chu an inrâwnnaa chun inrawl ve naw rawh:

An lunginsenin mi an that a,

An kâwmawnain bâwngchal tha an sat a.

7An lunginsenṭeuna chu ṭawngsephurin um raw se, a ṭium si a.

An lung puom hlena chu ṭawngsephurin um raw se, a nunrâwng si a.

Jakobrawihai lai chun anni chu thedar ka ta,

Israelrawihai lai chun anni chu sukdar ka tih.

8Juda, nang chu i unauhaiin inpâk an ti che,

I kut chu i râlhai rîngah innghat a ta,

I pa naupasalhai chu i hmaah kûn an tih.

9 # Nam 24.9; Tp 5.5 Juda hi sakeibakneite a nih;

Ka naupa, i sase chu i hang fesan ta a,

A kûn a, sakeibakneichal angin a bawk a,

Sakeibakneipui ang bawk siin, tuin am suktho ngam an ta?

10Lal hmawl chu Judaa inthawk hin bo naw ni a,

Rorêltu hmawl chu a ke kâra inthawkin bo naw bawk a tih;

A neitu takpa#Shilo, or Inza tak dingpa, “Shilo a hung hma chun; le Shiloa a hung hma chun” a hung hmakhat chun;

Hnam tinin ama thu awi an tih.

11A sakawrte chu Grêp hruiah a thlung a,

A sabengtungte chu grêp hrui ṭha miah a thlung bawk a.

A silfên chu uoinah a sâwp a,

A puon chu grêp thisenah.

12A mithai chu uoin suksenin um a ta,

A hahai chu nenetui sukvârin.

13Zebulun hin tuisuoriet pangah umhmun khuor a ta,

Lawngchâwlna vapang nîng a tih:

A ramri chu Zidonah nîng a tih.

14Issakar hi sabengtung hrâttak,

Berâm huong kâra bawk a nih:

15Châwlna chu ṭhain a hriet a,

Ram chu inhawiin a hriet bawk a.

Chuongchun, iengkhat put dingin a liengko chu a sukhnuoi a,

Kuli sinthawin siehlawah a hung um ta a.

16Dan hin a mihai chu,ro rêlpêk a tih.

Israel hnam pakhat ni vein.

17Dan hi lamliena rûl,

Lampuia rûlriel,

A chunga chuong a thala tla dêr khawpa

Sakawr kea chuk hlaktu hi nîng a tih.

18Aw Lalpa i sandamna chu ka nghâk zing.

19Gad hi râlin thâwng an ta,

Nisienlakhawm, ama chun an kekhawng tieng thaw lem a tih.

20Aser hi a fâk ṭhâng a ta,

Lal tensietna suklang mi nîng a tih.

21Naphtali hi sazukpui insuo a ni a,

Thu ṭhatakhai a hril hlak.

22Josef hi kâu ra nuomtak a ni a,

Tuikhur kâwla kâu ra nuomtak chu.

A kâu nâwksâwnhai chun lung bang ân zâm khum a.

23Thal kâphai chun ama chu nasatakin an sukrinum a,

An kâp a, an suknawmna a:

24Nisienlakhawm, ama thalngul chu ngartakin a um zing a,

A kut thahai chu sukhrâtin a um a,

Jakob Mihrât kut chun,

(Chutaka inthawk chun berâm vêngtu,

Israel lungpui chu a hung um a.)

25I pa Pathien nangma ṭhangpuitu dinga,

Iengkimthawthei,

Chungtienga vân malsâwmnahai,

Hnuoitienga bawk zing tui inthûktak malsâwmnahai,

Nene le sul malsâwmnaa

Nang malsâwmtu ding ngei sukhrâtin a um a.

26I pa malsâwmpêkna hi,

A mi thlatuhai malsâwmpêkna nêk hmanin,

Chatuon tlâng tâwpkhâwk chenin a nasa ta lem a nih:

Chuonghai chu Josef lua hin um a ta,

A unauhaia inthawka suktuma umpa lusîpa chun um a tih.

27Benjamin hi satene hnukinrawl a nih,

Zîngkâr chun a sase chu fâng a ta,

Zântieng chun a râllâk chu sem a tih,” tiin.

Jakob thina le phûma a um thu

28Chuong po po chu Israel hnam sâwm le hnam hni chu an nih; chun, hieng hi anni malsâwma an kuoma an pa thu hril chu a nih: an malsâwmna dawng ding ang peiin mal a sâwm seng a.

29Chun, anni chu thuro a sie a, an kuomah, “Ka chipuihai kuomah ṭhuoiin ka um ve ding a ni tah. Hit mi Ephron loa pûka khan ka thlatuhai lai mi phûm ve ro,

30 # Gen 23.3-20 chu pûk chu Kanaan rama Mamre zâwna#Aiguptahai sûnna Makpelaa loa pûk, Abrahamin inphûmna hmun ro dinga Hit mi Ephron kuoma inthawka a lo puma a închâwk fâwm a nih, chutaka chun Abraham le a nuhmei Sara chu an phûm a:

31chutaka chun Isak le a nuhmei Rebeka chu an phûm a: chutaka bawk chun Leah ka phûm a,

32lo le a sûnga pûk um chu Heth thlahaia inthawka inchâwk a nih,” a ti a.

33 # Tt 7.15 Chun, Jakob chun a naupasalhai kuoma thuro a sie zo chun, a kehai chu khumah a hlângkai a, a thi ta a, a chipuihai kuoma chun ṭhuoiin a um ve ta a.

Currently Selected:

INṬANNA 49: HMOVBSI

Highlight

Copy