INṬANNA 44
44
No inhmang thu
1Chun, ama chun a in enkawltu kuoma chun, “Khahai ip kha an phur thei tâwkin buin suksip la, an tangka seng chu an ip bau bulah sie seng rawh.
2Chun, ka no, tangkaruo no kha, an naupang tak ip bau bulah sie rawh, a bu man tangka le khan,” tiin thu a pêk a. Ama chun Josef hril ang chun a thaw ta a.
3Khuo a hung var phingleh anni chu an sabengtunghai le chun an infetir ta a.
4Khuoa inthawka an fe suok chu an la tlung hlat hmain, Josef chun a in enkawltu kuoma chun, “Tho la, mihai kha va hnawt rawh; chun, i hnawt phâk phingleh an kuomah, ‘Iengtiziea thil ṭha thil ṭha nawa thung am in ni lie? Iengdinga ka tangkaruo no kha in inrûk am?
5Kha kha ka pu uoin dâwnna le ṭhumvâwrna ngei a ni naw am a nih? hieng ang in thaw hi in thaw suol a nih,’ ti rawh,” a ti a.
6Chun, a hnawt phâk a, chuong thu chu an kuomah a hril a.
7Anni chun a kuomah, “Pu, iengtizie am a na hieng ang thu i hril hi? I siehlawhai hin chuong ang thil kan thaw naw dingzie chu.
8Ngai ta, kan ip bau bula tangka kan hmuhai khawm kha Kanaan rama inthawkin i kuomah kan hung chawi nâwk kha: iengtin am i pu ina tangka amanih, rângkachak amanih inru thei kan ti leh?
9I siehlawhai laia hin tukhawm i hmuna taphawt chu thi raw se, keini khawm ei pu suokah um el kan tih,” an ti a.
10Ama chun, “Aw le, in thu ang pei chu ni raw se chu: amiruokchu, tukhawm ka hmuna taphawt chu ka suokah um raw se, nangni ruok chu fe thei in tih,” a ta.
11Chu phingle chun inhmawtakin mâni ip chu hnuoiah an lâk thlâk seng a, mâni ip chu an hawng seng bawk a.
12Chun, ama chun an upa takah a phut a, an naupang tak chenin a zawng a: chuongchun, no chu Benjamin ipa chun a hmu ta a.
13Chu phingle chun an silfênhai chu an keithlêr a, mâni sabengtung chu an inphurtir nâwk seng a, khuoa chun an kîr nâwk ta a.
14Chun, Juda le a unauhai chun Josef in chu an va tlung a, ama chu chutaka chun a lo la um zing a; chun, a hmaa chun an bawkkhup tâwl ta a.
15Chun, Josef chun an kuomah, “Ieng thil am an ta leh in thaw hi? Keia ang mi hin ai an sân thiem ngei ti in hriet naw am a nih?” a ta.
16Juda chun, “Pu, i kuomah ieng am hril tâng kan ti leh? Ieng am hril kan ti a? Iengtin am in hrilveng tâng kan ti leh? Pathienin i siehlawhai suolna chu a hmu suok tah a ni hi: ngai ta, pu, i suokhai kan ni a ni ta hi, keini le a kuta no an hmuna khawm hi,” a ti a.
17Chun, ama chun, “Chuong ang chun ka thaw naw dingzie chu: a kuta no an hmuna bak hi ka suokah um a tih: nangni ruok chu in pa kuomah lungmuongtakin fe ta ro,” a ti a.
Benjamin ta dinga Juda ngênna
18Chu phingleh Juda chun Josef chu a va hnai a, “Aw pu, lunginsiettakin i siehlaw hi i hrietah thu bau khat mîn hriltir rawh, i lunginsen chu i siehlaw chunga hin inchawktir naw la, nang chu Pharao ang el i ni si a.
19Pu, nangin, ‘Pa amanih, unau amanih in nei am?’ tiin i siehlawhai hi i mîn dawn a.
20Chun, pu, keinîn i kuoma hin, ‘Pa, tarsie le, a tar tieng nau, naupangtak kan nei, chu u chu a thi a, a pa chun ama chu a hmangai ngawt el,’ kan ti a.
21Chun, nangin i siehlawhai kuoma hin, ‘Ama chu ka mita ka hmu theina dingin ka kuomah hung ṭhuoi thla ro,’ i ti a.
22Chun, pu, keinîn i kuomah, ‘Bawipu chun a pa mâksan thei naw nih, a mâksan chun a pa chu a thi el ding a ni si a,’ kan ti a.
23Chun, nangin i siehlawhai kuoma hin, ‘In mi tlumtak chu nangni le a hung thla ve naw chun ka hmêl hmu ta naw ti niu,’ i ti a.
24I siehlaw kan pa kuom kan hang tlung chun, pu, i thu chu kan hril a.
25Chun, kan pa chun, ‘Fe nâwk phawt unla, bu tlâwmte bêk ei ta dingin zûn chaw nâwk ro,’ a ti a.
26Chun, keinîn, ‘Zu fe thei ta naw ning ungah: kan mi tlumtak hi kan kuoma a hung ve ding chun zu fe nâwk el kan tih, kan mitlum tak hi kan kuoma a hung ve naw ding chun, ama hmêl chu kan hmu thei naw ding a nih,’ kan ti a.
27Chun, i siehlaw ka pa chun kan kuomah, ‘Ka nuhmei chun naupasal pahni a mi neipêk ti in hriet;
28Chun, pakhat chu ka kuoma inthawkin a fe suok a; keinawi nengin a um ni ngei a tih ka ti a; chutaka inthawk chu ama chu ka hmu ta naw vang vang a.
29Ama khawm hi ka kuoma inthawk in ṭhuoi hmang a, tuoksuol a zu tuok chun, ka lu inṭuok hi lungngaitakin thlânah in mîn liemtir ding a nih,’ a ti a.
30Chuongchun, Bawipu hi kan laia ṭhang lova, i siehlaw ka pa kuom ka hang tlung chun, a hringna chu Bawipu hringna le hin ân zawm tlat leiin hieng ang hi nîng a tih:
31Bawipu hi a ṭhang ve nawh ti a hriet phingleh thi el a tih: chuongchun, i siehlawhai hin i siehlaw kan pa lu inṭuok rak chu lungngaitakin thlânah kan inliemtir ding a ni hi.
32I siehlaw hin, ‘I kuoma ka hung ṭhuoi nâwk naw chun a maw chu kumkhuoin i chungah phur ka tih,’ tiin ka pa kuoma chun Bawipu chungthua hin a bul tumtuah kân siem ta si a.
33Chuleiin, lunginsiettakin, i siehlaw hi Bawipu aiah, pu, i suokah mîn umtir la, Bawipu hi a uhai kuomah hang infetir rawh.
34Bawipu ṭhang lovin ka pa kuomah iengtin am hang fe thei ka ti leh? ka pa chunga sietna tlung ding chu hmu ngam naw ning,” a ti a.
Currently Selected:
INṬANNA 44: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
