INṬANNA 32
32
Esau tuok dinga Jakob insingsatna
1Jakob chu a fe ta pei a; chun, Pathien vântirkohaiin an lo intuokpui a.
2Jakobin anni a hmu chun, “Hieng hi Pathien pâwlhai an nih,” a ti a; chuongchun, chu hmun hminga chun Mahanaim#Mahanaim chu “riebûk” annawleh “inkulna (camp) pahni” tina a nih ân bûk a.
3Chun, Jakob chun Seir rama Edom phûl tienga a u Esau kuoma chun a hmaah palaihai ân tlântir a.
4“Ka lalpa Esau kuoma chun hieng ang hin in hril ding a nih, ‘I siehlaw Jakobin hieng ang hin a ti a nih: Laban kuoma chun mikhuol ka ni a, tu chen hin ka um ta zing a.
5Bâwngchal dâm, sabengtung le berâm dâm, suoknu le suokpa dâm ka nei bawk a, i lunginsietna ka hmu theina dingin, ka lalpa hril dingin mi ka hung tir a nih,’ a tih,” tiin, thu a pêk a.
6Chun, palaihai chu Jakob kuomah an hung kîr nâwk a, “I u Esau kuom kan va tlung a, mi za li hung ṭhuoiin a tuok ding chein a hung nghe nghe annaw,” an ti a.
7Chuongchun, Jakob chu a ṭi êm êm a, a lunginzîng ta a; chun, a kuoma mi umhai dâm, berâm ruol le bâwng ruol dâm, sanghâwngseihai dâm chu pâwl hniin a siem a:
8Esau chu pâwl khatah a hunga a that khawmin pâwl khat la um chu tlân hmang thei an tih ti a ngaituo a.
9Chun, Jakob bawk chun, “Aw ka pu Abraham Pathien, ka pa Isak Pathien, aw Lalpa, ‘I ram tieng le i laibunghai lai fe nâwk ta rawh, chuongchun, siem ṭhâng ka ti che’ mi titu,
10i siehlaw chunga lunginsietna po po în langtir le thutak po po în langtir laia a chîntak khawm hi hmu tlâk ka ni nawh; hi Jordan hi ka hmawl le bak ka kân a; tuhin chu pâwl hni zet ka lo ni ta hi.
11Lunginsiettakin ka u kuta inthawk, Esau kuta inthawk ngei chu mi sanhim rawh, nunau puma a mi hung that ka ṭi si a.
12Nangin, ‘Siem ṭha ngei ngei ka ti che a, i thlahai chu tuisuorieta phaiphin tiem sênglo khawp raua tam angin siem ka ti che,’ i ti si a,” a ti a.
13Chun, chu zân chun chutaka chun a riek ta a; chun, a thil nei laia mi a u Esau ta dingin lâwmman dingin a sie tum a;
14kêlpui za hni le kêlchal sâwmhni, berâmpui za hni le berâmchal sâwmhni,
15sanghâwngsei sâwrlai sâwmthum an tehai leh, bâwngpui sâwmli le bâwngchal sâwm, sabengtungpui sâwmhni le sabengtungchal sâwm leh.
16Chun, chuonghai chu pâwl tin a tum sengin a siehlawhai kutah ân kawltir a: chun, a siehlawhai kuoma chun, “Ka hmaah fe kai unla, pâwl tin hi kâr inneitir pei ro,” a ti a.
17A hmaṭhuoitu kuoma chun hieng hin thu a pêk a, “Ka u Esau chun ân tuokpui che a, ‘Tu mi am i ni a? Khâwlaia fe ding am? I hmaa umhai hi tu ta am?’ tia ân dawn pha che chun,
18‘I siehlaw Jakob ta an nih, pu Esau, i ta dingin lâwmmana ân phur che a ni hi: ama khawm kan hnungah a um’ ti rawh,” tiin.
19A dawttu le, a dawt nâwktu le ran ruol khaltuhai po po kuoma khawm, “Esau in hmu pha chun chuong ang tak chun in hril ding a nih.
20‘Chun, ngai ta, i siehlaw Jakob chu kan hnunga sawn a um,’ ti bawk unla,” tiin thu a pêk seng a. “Lâwmman ka hmaa fe hin a lung sukdam ka ta, chu hnunga chun a hmêl hmûng ka tih; chuongchun, mi lo lâwm el a tih,” a ti a nih.
21Chuongchun, lâwmman chu a hmaa chun a fe kai ta a, ama ruokchu chu zân chun a pâwl lai chun a riek ta a.
Peniela Jakob buona a um thu
22Chu zân chun a tho a, a nuhmeihai pahni le, a suoknuhai pahni le, a nau sâwm le pakhathai chu a ṭhuoi a, Jabbok vadung kaia chun a kai ta a.
23Chuongchun, anni chu a ṭhuoi a, vadung chu ân kaitir a, a nei po po khawm ân kaitir bawk a.
24Chun, Jakob chu ama khât bakin a um ta a; chun, mi pakhatin ama chu khawfingchat chenin a buon a buon a.
25A hne nawh ti ân hrietin a êlpui ru suktuona lai hi a khîk pêk a; chuongchun, a buon lai chun Jakob êlpui ru insuktuokna chu a hung inpelsawl ta a.
26Chun, mi chun, “Mîn thla rawh, khawfing khawm a chat ding a ni ta hi,” a ti a. Jakob chun, “Mal i mi sâwm naw chun inthla naw ning che,” a ti a.
27Chun, mi chun a kuomah, “I hming iem a na?” a ti a. Ama chun, “Jakob,” a ti a.
28Chun, mi chun, “I hming chu Jakob ti ta naw ni hai a, Israel ti lem tâng an ti che; Pathien le mihriem i buon a, i hne ta si a,” a ti a.
29Chun, Jakobin ama chu ân dawn a, “Lunginsiettakin i hming mi hril rawh,” a ti a. Ama chun, “Iengleia ka hming indawn am i ni a?” a ti a. Chun, chutaka chun Jakob chu mal a sâwm ta a.
30Chun, Jakobin chu hmun hminga chun Peniel#Peniel chu Pathien hmai tina ân bûk a, “Pathien chu a hmaihma ngeiah ka hmua chu ka hringna hi hla a ni si a,” tiin.
31Chun, a êlpui inpelsawl leia inbâi puma Peniel a suoksan lai tak chun nisa a hung suok a, ama chu a hung khaw a.
32Chuleiin, tu chen hin Israel mihai chun êlpui ru suktuoa ke tha um hi an fâk ngai nawh: Jakob êlpui ru suktuo chu a ke tha laitaka a khîk leiin.
Currently Selected:
INṬANNA 32: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
