INṬANNA 30
30
1Rakil chun Jakob chu nau hrim a neipêk nawh ti ân hriet chun, a unu chu a îtthîk ta a, Jakob kuoma chun, “Nauhai mi pe rawh, chuong naw chun ka thi el ding a nih,” a ti a.
2Rakil chunga chun Jakob chu a lunginsen thut el a; chuongchun, “I rîla ra phalnawtu Pathiena i mi ngai am ka nih?” a ti a.
3Amanu chun, “En ta, ka suoknu Bilha hi, ama hi pâwl rawh; chuongchun, kei khâwmin amaah nauhai ka nei ve theina dingin, ka khûp chunga hin nau a nei ding annâwm,” a ti a.
4Chuongchun, a suoknu Bilha chu a nuhmei dingin a pêk a, Jakob chun ama chu a lo pâwl a.
5Bilha chu ân rai a, Jakob chu naupasal a neipêk ta a.
6Rakil chun, “Pathienin a mi ngaituo a, ka rawl a hriet bawk a, naupasal a mi pêk a ni hi,” a ti a. Chuleiin, a hmingah Dan a sak a.
7Chun, Rakil suoknu Bilha chu ân rai nâwk a, Jakob chu naupasal dang a neipêk nâwk a.
8Chun, Rakil chun, “Pathien inbuonin ka unaunu chu ka buon a, ka hne tah,” a ti a, chuongchun, a hmingah Naphtali a sak a.
9Leah chun nau dang a nei nâwk ta nawh ti ân hrietin a suoknu Zilpah chu a ṭhuoi a, a nuhmei dingin Jakob kuomah a pêk a.
10Chuongchun, Leah suoknu Zilpah chun Jakob chu naupasal a neipêk a.
11Chun, Leah chun, “A va hamṭhatthlâk ngei de,” a ti a; chuongchun, a hmingah Gad a sak a.
12Leah suoknu Zilpah chun Jakob chu naupasal dang a neipêk nâwk a.
13Leah chun, “Ka va hamṭha de! nuhmeihai chun hamṭha mi ti ngawt an tih,” a ta; chuongchun, a hmingah Aser a sak a.
14Chun, bu lâk lai hin Reuben chun phûlah Zâwldiai a va hmu a, a nu Leah kuomah a hung chawi a. Chun, Rakil chun Leah kuomah, “Lunginsiettakin i naupa zâwldiai a ṭhen mi pe ta?” a ti a.
15Ama ruok chun, “Ka pasal i mi lâkpêk hi thil duoi am a nih? Ka naupa zawldiai khawm i mi lâkpêk nâwk pei ding maw?” a ti a. Rakil chun, “Annawleh, i naupa zâwldiai aiah vawizân zâlpui a ti che,” a ti a.
16Chun, zântieng chun Jakob chu phûla inthawk chun a hung a, Leah chu a tuok dingin a va suok a, “I mi pâwl ding a nih, ka naupa zawldiaiin ka haw tlat ta che a nih,” a ti a. Chuongchun, chu zân chun a zâlpui ta a.
17Chun, Pathienin Leah ṭawngṭaina a ngai a; chuongchun, ân rai a, Jakob chu naupasal pangana a neipêk a.
18Leah chun, “Ka suoknu chu ka pasal kuoma ka pêk leiin Pathienin ka hlaw a mi pêk tah a ni hi,” a ti a: chuongchun, a hmingah Issakar a sak a.
19Chun, Leah chu ân rai nâwk a, Jakob chu naupasal parukna a neipêk a.
20Chun, Leah chun, “Pathienin thuom ṭhatak a mîn neitir a; tuhin chu ka pasal chu naupasal paruk ka neipêk ta leiin ka kuomah um tâng a tih,” a ta; chuongchun, a hmingah Zebulun a sak a.
21Chu hnunga chun naunuhmei a nei a, a hmingah Dina a sak a.
22Chun, Pathienin Rakil chu a hriet zing a, Pathien chun a ṭawngṭaina a ngai a, a sul a hawngpêk ta a.
23Chuongchun, ân rai a, naupasal a nei a: chun, “Pathienin ka hming sie ân khum tah,” a ti a:
24chun, “Lalpa chun naupasal dang mi pe sa raw se,” tiin, a hmingah Josef a sak a.
Jakob le Labanin inremna an siem
25Rakilin Josef a hung nei chun, Jakobin Laban kuomah, “Ka umna pângngai, ka ram tienga ka fe theina dingin mîn fetir ta raw khai, i rawng ka bâwl san ka nuhmeihai le ka nauhai hi mi pe la, mîn fetir rawh.
26I rawng ka bâwlpêk zie che hlak chu i hriet si a,” a ti a.
27Laban chun a kuomah, “I mi lunginsiet thei chun la um phawt ta la, Lalpa chun nanga zârah mal a mi sâwm ti ṭhumvâwrin ka hriet i sawnnaw,” a ti a.
28Chun, ama bawkin, “I hlaw ding chu mi hril la, chuongchun, pêng ka ti che,” a ti a.
29Ama chun, “Iengtin am i rawng ka bâwl a, ka enkawlna hnuoiah i ran chu iengtin am an um ti i hriet annâwm.
30Ka hung hma chun tlâwmte bak i nei a, tuhin chu tamtak an hung ni ta hi; ka nghatna tieng tieng Lalpa chun mal a sâwmpêk pei che a nih: amiruokchu, iengtik âm keia sûngkaw ta dingin suksuok vêng ka ti aw?” a ti a.
31Chun, ama chun, “Ieng am pêng ka ti che a” a ti a. Jakob chun, “Iengkhawm i mi pêk ding a ni nawh; hi thil hi i mi thawpêk chun i ran ruol chu inthlain vêngpêk nâwk ka ti che.
32Vawisûn hin i ran ruol chu va en suok vawng ka ta, berâm laia a dumin a rawl le, a dum pheu pheu le, a dum taphawt le, kêl laia a vârin a rawl le, a vârin a rawl pheu pheu chu, chutaka inthawkin ṭhuoi tum ka ta; chun, tuta hnung chu chuong anga um chu ka hlaw ni sienla.
33Chuongchun, nakie ka hlaw dinghai en dinga i hung pha chun ka felna hin mi dawnpêk el a tih: kêl lai chun a vârin a rawl naw le, a vârin a rawl pheu pheu naw le, berâm laia a dum naw ka kuoma um i hmu taphawt chu ka inrûkah ruot el i tih,” a ti a.
34Laban chun, “A ṭha ie! i hril ang tak chun ni raw se,” a ti a.
35Chuongchun, chu ni tak chun kêlchal a vâra inzetan le, a vâra rawl pheu pheu po po le, kêlpui a vârin a rawl le, a vârin a rawl pheu pheu po po, a vâr ṭhang taphawt chu berâm laia a dum po po le chun a ṭhuoi tum a, a naupasalhai kutah a pêk a.
36Chun, ama le Jakob inkâra ni thum lama chun ân umtir a; chun, Jakob chun Laban ran ruol dang po po chu ân thla nâwk ta a.
37Chun, Jakobin hriengzau le almond thing le insething hring tuoihai a lâk a, a hâwng a khawk vâr ṭuk a, thing tuoihaia chun a vâr chu a suklang a.
38A hmawl khawkna hâwnghai chu ran tui dâwn hlakna kuonga dâm le, tui luongnaahai chun ran ruol hma peia chun a sie a: chun, tui dâwn dinga an hung chun an inzâwl hlak a.
39Ran ruolhai chu hmawlhai zâwna chun an inrai phut a, a ze intan dâm, a ze chip nuk dâm, ân ze pheu pheu dâmin te an hung nei hlak a.
40Jakob chun berâmtehai chu a sie tum a; ran ruolhai chu Laban ran ruolhai lai a ze intan le a dum po po tieng chu ân nghattir a; ama ran ruolhai chu a sie tum hlak a, Laban ran ruol lai chu a sie naw a.
41Ran hrât deuhai chu an hung inrai hlima, hmawl lai chun an inrai theina dingin, Jakob chun tui luongnaah, ran ruol mithmua chun hmawlhai chu a sie hlak a.
42Amiruokchu, ran chu an ṭan a ṭha naw chun a sie ngai nawh: chuongchun, a te ṭanṭha naw deuhai chu Laban ta a hung ni pei a, a hrât deuhai chu Jakob ta a hung ni pei a.
43Chuongchun, Jakob chu nasatakin a hung pung a, ran ruol, ruol lientak dâm, suoknu le suokpa dâm, sanghâwngsei dâm, sabengtung dâm a hung nei ta a.
Currently Selected:
INṬANNA 30: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
