INṬANNA 28
28
1Chuongchun, Isak chun Jakob chu a ko a, mal a sâwm a, thu a pêk bawk a, a kuomah, “Kanaan ram nunghâkhai laia mi hi nuhmeiin i nei ding a ni nawh.
2Tho la, Paddan-aram rama i nu pa, Bethuel inah fe la, chutaka mi i nu ṭapa Laban naunuhmeihai laia mi chu nuhmeiin va nei rawh.
3Pathien Iengkimthawthei chun mal sâwm chein, hnam tamtak um khâwm hung ni dingin chi tamtak inthlatir chein, sukpung raw se che.
4Mikhuol i nina ram, Pathienin Abraham kuoma a pêk hi i hluo theina dingin Abraham malsâwmna chu indawngtir bawk raw se che, nang le i thlahai khawm,” a ti a.
5Chuongchun, Isakin Jakob chu ân fe hmangtir a: chun, Paddan-aram rama Jakob le Esau nu Rebeka ṭapa Aram mi Bethuel naupa Laban kuoma chun a fe ta a.
Esauin nuhmei dang a nei
6Chun, Esau chun Isakin Jakob mal a sâwm a, nuhmei nei dingin Paddan-aram ramah ân fe hmangtir ti le, mal a sâwm laiin, “Kanaan nunghâkhai laia mi hi nuhmeiah i nei ding a ni nawh,” tiin thu a pêk ti,
7le Jakobin a nu le pa thu awiin Paddan-aram ramah a fe tah ti a hriet a.
8Chuonga Esauin Kanaan nunghâkhai chun a pa Isak lung chu an buo naw hle ti a hriet chun,
9Esau chu Ismael kuomah a va fe a, Abraham naupa Ismael naunu Mahalath, Nebaioth farnu chu, nuhmei dingin a nuhmei nei sahai bâka chun a va nei sa ta a.
Bethela Jakob mang
10Jakob chu Beer-sebaa inthawkin a suok a, Haran tieng a pan ta a.
11Chun, hmun ieng amanih a hang tlung a, nisa a tla ta leiin chutaka chun a riek ta a. Chu hmuna lung pakhat chu a lâk a, lukhamah a hmang a, chu hmuna chun in dingin a zâl ta a.
12Chun, mang a nei a, hnuoi chunga hin leilâk a lo indaw a, a tâwp chun vân a sun a; a chunga chun Pathien vântirkohai ṭum le kaiin a hmu a.
13A tâwpa chun Lalpa a ngîr a, “Kei hi Lalpa i pu Abraham Pathien le Isak Pathien chu ka nih, i zâlna hnuoi kha i kuoma le i thlahai kuomah la pêng ka ti cheu;
14i thlahai chu hnuoia pilvut zâtin la um an ta, thlangtieng dâm, saktieng dâm, hmârtieng dâm, simtieng dâm indar lien i ta, nangma le i thlahaia chun khawvêla hnam tin la thawveng an tih.
15Ngai ta, i kuomah ka um a, i fena taphawtah vêng pei ka ti che a, hi rama hin ṭhuoi kîr nâwk ka ti che: i kuoma ka hril hi ka thaw hmakhat chun thlathlam naw ning che,” a ti a.
16Chun, Jakob chu a in a hung har a, “Hi hmuna hin Lalpa chu a um ngei el, ka lo hriet si nawh,” a ti a.
17Chun, a ṭi a, “Hi hmun hi ṭi a va um ngei de! Hi hi hmun dang a ni naw a, Pathien in a lo ni hi tie, hi hi vân kawtkhâr a lo ni hi,” a ti a.
18Chun, Jakob chu zîngtieng inhmatakin a tho a, lung a ilukham chu a lâk a, lungphun dingin a phun a, a sîpa chun sahriek a buok a.
19Chu hmun hminga chun Bethel ân bûk a, a khaw hming hmasa chu Luz a nih.
20Chun, Jakob chun thu a tiem ta a, “Pathien ka kuomah a um a, hi ka fena lampuia hin mi vêng a, fâk ding bei le sil ding silfên a mi pêk a,
21chuonga ka pa in tienga thlamuongtaka ka hung kîr nâwk phawt chun, Lalpa chu ka Pathien nîng a ta,
22hi lungphun ka phun khawm hi Pathien in nîng a tih: chun, ka kuoma i mi pêk ding po poa chun sâwma pakhat chu pe ngei ngei ka ti che,” tiin.
Currently Selected:
INṬANNA 28: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
