INṬANNA 17
17
1Chun, Abram chu kum sawmkuo pakuo mi a niin Lalpa chu Abram kuomah a hung inlâr a, a kuomah, “Kei Pathien Iengkimthawthei ka nih, ka hmaah um la, ṭha famkimin um rawh.
2Chuongchun, nang le ei kârah thu thlung ka ta, nasatakin sukpung ka ti che,” a ta. 3Chun, Abram chu a bawkkhup a; chun, Pathienin ama chu a biek a,
4“Ngai ta, kei chun ka thuthlung chu i kuomah a nih ka thlung chu: chuongchun, chi tum tum, chi tamtak thlatu ni tâng i tih.
5 #
Rom 4.17
I hming khawm Abram#Abram chu, “pa, chawisânga um,” ni ta naw ni a, i hming chu Abraham#Abraham chu, “mi tam tak pa,” amani “hnam tamtak pa,” ni ta lem a tih, chi tamtak thlatu dingin ka siem ta che hi.
6Nasatakin chi inthlatir ka ti che a, nangmaa chun chi ti khawp hiel dâm siem ka ta, nangmaa inthawkin lalhai hung suok bawk an tih.
7 #
Lk 1.55; Gal 3.16 Chun, kei le nang le i hnunga i thlahai an thla sâwng peihai chen inkârah kumkhaw thuthlung dingin ka thuthlung hi sukdet ka tih, i ta ding le i hnunga i thlahai ta dinga Pathien ka nina dingin.
8 #
Tt 7.5
Chun, i kuoma le i hnunga i thlahai kuoma chun, i khuolchâmna ram, Kanaan ram po po hi, kumkhaw ro dingin ka pêk ding cheu a nih; chun kei hi an Pathien nîng ka tih,” a ta.
9Chun, Pathien bawkin Abraham kuoma chun, “Chun, nang chun chu, ka thuthlung hi i zâwm ding a nih; nang le i hnunga i thlahai an thla nâwksâwng pei chen khawmin in zâwm ding a nih.
10 #
Tt 7.8
Hi hi kei le nang le i hnunga i thlahai kâra ka thuthlung i zâwm ding chu a nih: nangni laia pasal taphawt chu ser tan ding a nih.
11 #
Gen 17.24; 21.4 Chuongchun, in ser hmawr vuna chun sertanin in um ding a nih; chu chu nang le ei inkâra thuthlung inchikna chu nîng a tih.
12Nangni laia ni riet mi chu in thla sâwng peihai chen khawmin, i thla ni kher lo, i ina pieng amani khawm, mikhuol kuoma tangka suma inchâwk amani khawm, pasal taphawt chu a ser i tan ding a nih.
13I ina pieng le i tangka suma în châwk khawm a ser i tan ngei ding a nih: chuongchun, ka thuthlung chu kumkhaw thuthlung dingin in tisaa chun um tâng a tih.
14Chun, pasal ser tan lo, a ser hmawr vun taksaa sertanna um naw chu, chu ngei chu a chipui laia sukbohmang nîng a ta: ama chun ka thuthlung chu a bawsiet a nih,” a ti nâwk a.
15Chun, Pathien bawkin Abraham kuomah, “I nuhmei Sarai chu a hmingah Sarai ti ta naw ti ni a, a hming chu Sara#Sara chu “lal nu” tina ti ni ta lem a tih.
16Ama chu mal sâwm ka ta, chu bâka khawm amaa inthawk naupasal pêng ka ti che: anih, ama chu mal sâwm ka ta, chi tum tum thlatunu ni tâng a tih, hnam tum tum lalhai amaa inthawk chun la hung suok an tih,” a ti nâwk a.
17Chuongchun, Abraham chu a bawkkhup a, ân nui a, a lungrilin, “Kum za mi hin nau a nei ding am a nih? Sara kum sawmkuo mi chun nau a nei ding am a nih?” a ta.
18Chun, Abraham bawk chun Pathien kuomah, “Ismael hi i hmaah um thei sienla aw!” a ti a.
19Pathien chun, “Ni lo e, i nuhmei Sarain naupasal neipêk lem a ti che: a hmingah Isak#Isak chu, “innui” annawleh “ân nui” i sak ding a nih: chun ka thuthlung chu ama hnunga a thlahai ta dinga kumkhaw thuthlung dingin a kuoma chun sukdet ka tih.
20Ismael chungthu khawm hi ka ngaipêk che a nih: ngai ta, ama chu mal ka sâwm ta a, chi tamtak inthlatir ka ta, nasatakin sukpung bawk ka tih; ama chun lal sâwmpahni thlâng a ta, ama chu chi ropuitakah la siem ka tih.
21Ka thuthlung ruok chu, Sarain kum nâwk hieng ang huna a neipêk ding che, Isak chungah sukdet lem ka tih,” a ti a.
22A kuoma thu a hril zo chun Pathien chun Abraham chu a kai tung san ta a.
23Chun, Abraham chun a naupa Ismael le a ina pieng po po le, a tangka suma a închâwk po pohai le Abraham sûnghai laia mi pasal taphawt chu a ṭhuoi a, Pathienin a kuoma a hril ta ang ngeiin, chu ni ngei chun an ser hmawr vun tisa chu a tanpêk tâwl a.
24Abraham chu a ser hmawr vun tisa an tan lai chun kum sawmkuo pakuo mi a nih.
25Chun, a naupa Ismael chu a ser hmawr vun an tan lai chun kum sâwmpathum mi a nih.
26Chu ni ngei chun Abraham le a naupa Ismael chu sertan an lo ni tah.
27A sûnghai laia pasal po po, a ina pienghai le ram dang mi tangka suma a în châwkhai khawm chu, ama ruol chun an ser tan a ni ta vawng a.
Currently Selected:
INṬANNA 17: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
