THILTHAWHAI 4
4
Peter le Johan rorêltuhai hmaa an ngir
1Chun, Peter le Johanin mihai kuomah thu an hril leiin, thiempuhai, biekin hotuhai, Saddukaihai chu an kuom an hung tlung thut a.
2Mi an inchûktir le Isu leiin mithi laia inthawka thonâwk thu an hril leiin an lungninaw bêk bêk a.
3Chun, an man a, zântieng a ni leiin a zîng chena dingin intângna inah an khum ta a.
4Nisienlakhawm, thu ngaihai laia tamtakin an awi a; an tam tieng chu patling ruok khawm sâng nga lai an tling a.
5Chun, a zînga chun an hotuhai, upahai, Dân inchûktirtuhai, Jerusalemah an um khâwm a,
6Thiempu Laltak Anna hai, Kaiapha hai, Johan hai, Alexandra hai, Thiempu Laltak chihai po po le chun.
7Chun, Peter le Johan chu a laiah an inngîrtir a, “Ieng thuneinain am, tu hmingin am hieng hi in thaw a?” an ta, an indawn a.
8Chuongchun, Peter chu Thlarau Inthiengin a sip a, an kuomah, “Mi po po hotuhai, upahai,
9mi hrâtnaw sukṭhat thuah, ‘Hi mipa hi ieng leiin am a hung dam ta a?’ tiin vawisûn hin in mi fie a ni chun,
10nangni po poin hre ro, Israel mi po khawmin hre raw hai se, Nazareth Isu Krista krawsa in hemde Pathienin mithi laia inthawka a ikeitho nâwk kha, ama hming ngeiin hi mipa hi hitaka hin in hmaah damin a ngîr tah a ni hi.
11 #
Sm 118.22
Nangni in bâwltuhai, in lung dehâwn, a kia lung ṭhangkaitak lo ni ta kha ama hi a nih.
12Mi dang tu kuoma khawm sandamna a um nawh; vânkhuphnuoia mihriem isak lai, a mi sandam ding hming dang hrim a um nawh,” a ta.
13Chun, Peter le Johan huoizie chu an hmu chun lekha thiemnaw le mi narân el an nih ti an hrietin, mak an ti hle a; Isu kuomah an um tah ti an hriet ta a.
14Chun, mi an sukdam chu an kâwla ngîr an hmu a, iengkhawm an sawisêl thei si nawh. 15Chuongchun, an rorêlnaa inthawka an infetir hnungin an inrawn a,
16“Hieng mihai hi iengtin am thâwng ei ta? Thilmak inthangtak an thaw ti Jerusalema um po poin an hriet ta hi; eini khawmin ei sêl thei si naw a.
17Nisienlakhawm, mi kuoma ân dar nâwk zuol nawna dingin, tuta inthawk tû kuoma khawm hi hminga thu an hril nawna dingin vau ei tiu,” an ta.
18Chuongchun, anni chu an ko a, Isu hminga thu hril dêr lo ding an ti tlat a.
19Nisienlakhawm, Peter le Johanin an kuomah, “Pathien mithmuin, Pathien thu zâwm nêkin nangni thu zâwm ân dik lem am chu, ngaituo ro.
20Keini chu thil kan hmu le kan hriethai kha hril lovin kan um thei nawh,” an ta.
21Chun, anni chun an vau nâwk zuol a, an insuo ta a. Mipui leiin hremna remchâng an hmu nawh; an thilthaw lei khan mi po poin Pathien an chawimawi si a.
22Thilmaka an isukdam chu kum sâwmli nêk hmana tam lem a ni si a.
Huoina dinga ringtuhai ṭawngṭaina
23Chun, Peter le Johan chu an suok chun anni pâwlhai lai an va fe a; thiempu lalhai le upahaiin an kuoma an hril po chu an hril vawng a.
24 #
Ex 20.11; Neh 9.6; Sm 146.6 Chuongchun, a ngaihai chun a ruolin rawl inringtakin Pathien kuomah, “Lalpa, nang hnuoi hai, vân hai, tuisuoriet hai, a sûnga um po pohai siemtu i nih;
25 #
Sm 2.1-2
nangin Thlarau Inthiengin, kan thlatu i siehlaw David bauin, hieng thu hi i hril a nih:-
‘Jentailhai iengdinga an lunginsen am?
Hnam tinin iengdinga thil teplo an ngaituo am a na?
26Khawvêl lalhaiin an ep huoi huoi a,
Hotuhai khawm an pung khâwm a,
Lalpa le a Krista chunga chun,’ tiin.
27 #
Mt 27.1-2; Mk 15.1; Lk 23.1; Jn 18.28-29 “Hi khuoa hin i siehlaw inthieng, i hriek nâl, Isu chunga khan Herod le Pontia Pilat le, Jentailhai le Israel mihai an pungkhâwm tak zet a nih;
28i kut le i lungrilin tlung dinga i ruot lâwk taphawthai kha thaw dingin.
29Chuongchun, tuhin Lalpa, an mi vauzie hi ngai ta; i suokhai hi huoitakin i thu inhriltir la,
30mihai sukdam dingin i kut phar bawk rawh; i siehlaw inthieng Isu hmingin inchikna le thilmakhai inthawtir bawk rawh,” an ta.
31Chun, an ṭawngṭai zo chun an umna in chu a hung inhnîng a, an rêngin Thlarau Inthiengin an hung sip a, huoitakin Pathien thu an hril ta a.
Iengkim inṭâwm thu
32 #
Tt 2.44-45
Chun, a ringtu mipuihai chu lungril hmunkhat le ngaituo hmunkhatin an um a; anni laia pakhat khawmin an sum nei, “Ka ta bîk a nih,” an ti nawh; thil po po an inṭâwm lem hlak a.
33Chun, tirkohai chun awiumtakin Lal Isu thonâwk thu an inhriettir hlak a, an rênga chungah lunginsietna nasatak a um a.
34Chun, anni lai khawm tlasam tukhawm an um nawh, hnuoihai, inhai nei taphawtin an zawr a, an thil zawrhai chu a man an hung chawi a,
35tirkohai ke bulah an sie hlak a; an mamaw dai tâwk sengin an sem seng hlak a.
36Chun, Josef, tirkohaiin Barnaba an ti chu, (chu hming umzie chu “Thlamuongna nau,” tina a nih), Levi chi, Kupra thlierkâra mi a na,
37a lo nei chu zawrin a man a hung chawi a, tirkohai ke bulah a sie ta a.
Currently Selected:
THILTHAWHAI 4: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
