THILTHAWHAI 2
2
Thlarau Inthieng hung tlung
1 #
Lev 23.15-21; Dt 16.9-11 Chun, Pentikost ni a hung tlungin, an rêngin hmun khatah an um khâwm vawng a.
2Chun, kârlovin vâna inthawkin ri thlipui hrâng angin a hung tlung ta phut a. Chu chun an ṭhungna in chu a suksip ta vawng a.
3Chun, leihai ama le ama insemin, mei angin an kuomah a hung inlâr ta a.
4Chun, an chungah a chuong seng a, an rêngin Thlarau Inthiengin an sip ta vawng a, Thlarauin ân ṭawngtir ang peiin ṭawng danghaiin an hung ṭawng ta a.
5Chun, vânkhuphnuoia hnam tin laia mi Pathien ngaisak Judahai Jerusalemah an châm a.
6Chun, chu ri chu an hriet phingleh mipui an hung inkhâwm a, mi tinin an ṭawng chu mâni ṭawng sengin an lo hriet leiin an lungrilin an lo buoi a.
7Chun, an rêng chun an lunginzîng a, mak an ti hle a; “En ta u, hieng a ṭawnghai po po hi Galili rama mi an ni naw am a nih?
8Iengtiziea ei rênga ei piengpui ṭawng anga ei hriet seng am a na?
9Ṭhenkhat Parthai hnam dâm, Medai hnam dâm, Elamatai hnam dâm, ei ni si a; Mesopotamia rama um dâm, Judai rama um dâm, Kappadoki rama um dâm, Ponto rama um dâm, Asia rama um dâm,
10Phrugia rama um dâm, Pamphulia rama um dâm, Aigupta rama um dâm, Kurini kâwl vêla Libu rama um ei na,
11ṭhenkhat Rom khaw mikhuol Judahai le an saphunhai leh ei na, ṭhenkhat Kret thlierkâra mi le Arab rama mi ei ni si a; nisienlakhawm, Pathien thilthaw ropuihai an hril mâni ṭawng sengin ei hriet si hi!” an ta.
12Chun, an rêng chun mak an ti hle a, a ngaina an hriet naw a, “Hieng hi a umzie iem a na?” tiin an indawntuo a.
13Ṭhenkhatin an nuisan a, “Uoin thar an inrui a ni hi,” an ta.
Pentikost nia Peter thuhril
14Nisienlakhawm, Peter chu sâwm le pakhathai leh an ngîr a, ama chun râwl inringtakin, an kuomah a hril a, “Nangni Judai rama mihai, nangni Jerusalema um po pohai, hieng hi hre unla, ka thu khawm lo ngai ro.
15Hienghai hi in ring angin an inrui nawh, vairik chau a la ni hi.
16Hieng hi zâwlnei Joelin a hril kha a ni lem:
17Pathienin, ‘Ni nuhnungahai chun hieng hi nîng a ta,
Mi po po chungah ka Thlarau buok ka ta;
Chuongchun, in naupahai, in naunuhaiin ka thu hril an tih;
In tlangvâlhaiin inlârnahai hmûng an ta,
In tarhaiin mangah mang an ta;
18Anih, chuong nia chun ka suokpahai, ka suoknuhai chunga khawm,
Ka Thlarau buok ka ta, ka thu hril an tih,
19Chun, chungtieng vânah thilmakhai,
Hnuoi tieng leihnuoiah inchiknahai inhmutir ka tih:
Thisen dâm, mei dâm, meikhu hu dâm,
20Nisa inthimin inchang a ta,
Thla thisenin inchang a ta,
Lalpa ni ropuitak le hming inthangtak chu
A hung tlung hma chun;
21Chun, hieng hi nîng a ta,
Tûkhawm Lalpa hming lam taphawt chu sandamin um an tih,’ a tih, a ti kha.
22“Nangni Israel mihai hieng thu hi lo ngai ro; Nazareth Isu chu, Pathienin nangni lai thilthaw mak dâm, thilmak dâm, inchikna dâm inthawtirin ân hriet chiengtir cheu kha,
23 #
Mt 27.35; Mk 15.24; Lk 23.33; Jn 19.18 Nangni ngeiin in hriet ang khan; kha mipa kha Pathien rêl tlat le hriet lâwk angin an inmantir a, nangnîn mi suolhai kutin krawsah in hemde a, in sukhlum ta a.
24 #
Mt 28.5-6; Mk 16.6; Lk 24.5 Kha mipa kha Pathienin thina khuopnahai chu a sûtpêk a, a keitho ta a; ama chu thina chel sawng ruol a ni naw leiin.
25 #
Sm 16.8-11; Sm 132.11; 2 Sam 7.12-13 Chun, David chun ama thu chu a hril a,
‘Ka hmaah kumkhuoin Lalpa chu ka hmu hlak,
Kân hnîng nawna dingin ka changtieng a um a nih;
26Chuleiin, ka lungril a hlim a,
Ka lei khawm a lâwm a;
Chuleiin, ka taksa khawm beiseitakin um bawk a tih;
27Ka thlarau mithi khuoah mâksan naw ti ni a,
I mi inthieng hmawnhmangna hmu khawm phal naw ti ni a;
28Nangin hringna lampuihai i mîn hriettir a,
Nangin i hmêlin lâwmin mi suksip i tih,’ tiin.
29“Unauhai, chi thlatu David chanchin hi ṭi lovin in kuomah ka hril cheu a; ama chu a thi a; phûm khawm an phûm tah annâwm, a thlân khawm tu chen hin ei kuomah a la um zing a.
30Ama chu zâwlnei a na, Pathienin a ṭhalbea mi tû amanih a ṭhungpha chungah ân ṭhungtir ding a nih ti inkhâmin a hril ti a hriet a.
31Chuongchun, chuong chu a lo hriet lâwk zing leiin, Krista thonâwkna ding thu a hril a nih, ‘Mithi khuoah mâksanin a um naw a, a ruong khawmin hmawnna a hmu bawk nawh,’ tiin.
32Chu Isu chu Pathienin a keitho nâwk ta hrim a, chu chu kan rêng hin a hretu kan nih.
33Pathien kut changtienga chawimawiin a um a, Thlarau Inthieng tiem chu Pa kuoma inthawkin a hmu a, tuta in hmu le in hriet hi a hung buok tah a ni hi.
34David chu vânah a hang lâwn naw a nih, ama ngeiin,
‘Lalpa chun ka Lalpa kuomah,
Ka changtieng ṭhung zing rawh,
35 #
Sm 110.1
I hmêlmahai i kepha innghatnaa
Ka siem hmakhat chu,’ a ti a, a ti lem a ni kha.
36“Chuongchun, Isu in hemde ngei kha, Pathienin Lal le Krista ni fâwmin a siem tah ti, Israel hnam tinin hre mawl raw hai se,” a ta.
37Chun, chuong thu chu an hrietin an lungrilah sun ang an lo ni ta a, Peter le tirko danghai kuoma chun, “Unauhai, iengtin am thaw tâng kan ta?” an ti a.
38Peter chun an kuomah, “In suolhai ngaidamna dingin, sim unla, Isu Krista hmingin baptisma chang seng ro; chuongchun, Thlarau Inthieng pêk hi hmûng in tih.
39A tiem kha, nangni ta ding khawmin, in nauhai ta ding khawmin, hlataka mi po po ta ding khawmin, Lalpa ei Pathienin a kuoma a kohai taphawt ta dingin a ni ie,” a ta.
40Chun, thu dang tamtakin a hrilfie a, “Tulai ruolthar rilohaia inthawk hin insukhim ro,” tiin ân fui a.
41Chun, a thu zâwm taphawt chun baptisma an chang ta a; chu nia chun mi sâng thum lai belsain an um a.
42Chun, tirkohai inchûktirin, inpâwlin, bei khawiin, ṭawngṭaiin ṭhahnemngaitakin an um zing a.
Ringtuhai nun dân chu
43Chun, mi tinin an ṭi ta a; tirkohai chun thilmak le inchikna tamtak an thaw a.
44 #
Tt 4.32-35
Chun, a ring taphawt chun iengkim an inṭâwm a,
45an thil neihai, an thuomhnawhai an zawr a, an mamaw dai tâwk seng chauin an rênga kuoma chun an sem hlak a.
46Ni tin lungril hmunkhatin Pathien biekina chun ṭhahnemngaitakin an um hlak a, an in tieng khawm bei an khawi a, hlimtak le lungawitakin bu an fâk hlak a.
47Pathien an inpâk a, mi po po lâwmzâwngin an um hlak a. Chun, sandama hung um pei taphawthai chu, Lalpain ni tin an kuomah ân ṭhangsatir pei hlak a.
Currently Selected:
THILTHAWHAI 2: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
