THILTHAWHAI 13
13
1Chun, Antiokeia kohran lai chun thu hriltuhai le inchûktirhai an um; chuong chu Barnaba hai, Simeon Niger an ti hai, Kurini khuoa Lukia hai, lal Herod unau Manaina hai, Saula hai leh an nih.
2Chun, Lalpa rawng an bâwl a, bu an nghei laiin, Thlarau Inthiengin, “Barnaba le Saula hi anni ka ruot ang san thaw dingin mi suktumpêk ro,” a ta.
3Chuongchun, bu nghei a, an ṭawngṭai zo chun an chungah kut an innghat a, an infetir ta a.
Kupra thlierkâra Tirkohai thuhril
4Chuongchun, Thlarau Inthieng tir suok chun an fe ta a, Selukai khuoah an fe thla a, chutaka inthawkin Kupra thlierkârah lâwngin an fe a.
5Chun, Salamis khuoa an um laiin, Juda inkhâwmna inahai Pathien thu an hril hlak; Johan khawm kha an rawng bâwl dingin an ṭhuoi ve a.
6Chun, thlierkâr chu Paphos chenin an fang suok a, dawithiem zâwlnei tehlêm, Juda mi pakhat an hmu a, a hming chu Bar-Isu a nih.
7Ama chu, lal aiawtu, Serjia Paula, mi vartak kuoma um a nih. Chu lal aiawtu chun, Barnaba le Saula chu a ko a, Pathien thu hriet a tum a.
8Nisienlakhawm, Elum, (Bar-Isu hming dang umzie hi Dawithiem tina a nih), chu mipa chun, lal aiawtu chu, inringnawtir tumin, anni chu a lo kal a.
9Chuongchun, Saula, (Paula an ti bawk chu), Thlarau Inthiengin a sip a, ama chu a en zing a,
10“Nang mi hlêm le theidaum tinrênga sippa, nang diebol naupa, nang felna tinrêng kawp nawpa, Lalpa kawng feltakhai hi suksiet ma naw ti ni maw?
11Hre rawh, tuhin Lalpa kut i chungah a tla a ni hi, i mit hung indel a ta, khaw var hmu hri naw ti ni,” a ta. Chuongchun, inthim le sûmin ama a baw nghâl ta a, kuta keitu ding zawngin ân vâk a.
12Chun, Lal aiawtu chun, chuong thil chu a hmu a, Lalpa thu an inchûktir chu mak a ti hle, a ring ta a.
Pisidia le Antiokeia Barnaba le Paula thuhril
13Chun, Paula chu a rawihai le chun, Paphos khuoa inthawk chun lawngin an fe a. Pamphulia rama Perga an tlung a; chun, Johan khan anni chu a mâksan a, Jerusalemah a kîr nâwk ta a.
14Nisienlakhawm, anni chu Pergaa inthawkin an fe pei a, Pisidia rama Antiokei an tlung a; chun, Châwlniin inkhâwmna inah an lût a, an ṭhung a.
15Chun, Dân Lekhabu le Zâwlneihai lekhabu tiem zoin inkhâwmna hotuhaiin an kuomah mi an tir a, “Unauhai, mihai infuina thu ieng amanih in nei chun hril ro,” an ta.
16Chun, Paula a ngîr a, kutin a zâp a, a hril a: “Israel mihai le Pathien ṭituhai, ngai ro.
17 #
Ex 1.7; 12.51 Hieng Israel chihai Pathien hin, ei thlatuhai a thlang a, Aigupta rama an thang zing lai khan a chawimawi a, bân pharin chutaka inthawk chun a ṭhuoi suok ta a.
18 #
Nam 14.34; Dt 1.31 Kum sâwmli lai thlalêra khan an thilthawhai chu a en thei zing a.
19 #
Dt 7.1; Jos 14.1 Chun, Kanaan rama hnam sari a suktlâwm zo hnung khan an ram chu hluo dingin a pêk pei a, kum zali sâwmnga sûng po khan.
20 #
Rt 2.16; 1 Sam 3.20 Chuong hnunga chun, rorêltuhai a pêk hlak a, zâwlnei Samuel chen khan.
21 #
1 Sam 8.5; 10.21; 13.14; 16.12; Sm 89.20 Chun, chu hnunga chun lal an hni a; chuongchun, Pathienin Saula, Kis naupa, Benjamin chia mi kha an kuomah a pêk a, kum sâwmli sûnga dingin.
22Chun, ama chu a sawn hmang hnung khan an lala um dingin David a siem ta a; Pathienin chu thu chu inhriettirin, ‘David, Jessai naupa, ka lungril ang put mi ka hmu suok tah, ama chun ka dit zâwng taphawt thâwng a tih,’ a ta.
23“Chu thlahai laia chun Pathienin, thutiem ang peiin, Israelhai Sandamtu Isu a hung intlun a.
24 #
Mk 1.4; Lk 3.3; Jn 1.20 A hung hmain Johanin simna baptisma chu Israel mi po po lai a lo hril ta a.
25 #
Mt 3.11; Mk 1.7; Lk 3.16; Jn 1.27 Chun, Johanin a lampui a hraw suok ding lai chun, ‘Nangnîn tu âm in mi ruot a? Ama chu ka ni nawh ie. Nisienlakhawm, ngai ta u, ka hnungah mi tû amanih a hung ding a nih, kei hi chu a kephaa a kekawk sût tlâk khawm ka ni nawh,’ a ta.
26“Unauhai, Abraham thla nauhai, nangni laia Pathien ṭi po pohai, eini kuoma hin hieng sandamna thu hi a mi hung inphur suok a ni hi.
27Jerusalema umhaiin, an hotuhai leh, ama chu an hriet naw lei le, zâwlneihai thu, Châwlni taphawta tiem hlak kha, an hriet bawk naw leiin, ama chu thiemnaw inchangtirin, chu thu chu an hlen ta a.
28 #
Mt 27.22-23; Mk 15.13-14; Lk 23.21; Jn 19.15 A thina khawp meu a chungah iengkhawm an hmu naw khawmin, Pilat kuomah sukhlum an ngên a.
29 #
Mt 27.57-61; Mk 15.42-47; Lk 23.50-56; Jn 19.38-42 Chun, a thu zâwlneihaiin an ziek lâwk po po kha an hlen zo hnungin, thinga inthawk chu an lâk thlâk a, thlânah an inzâl ta a.
30Nisienlakhawm, Pathienin mithi laia inthawkin a keitho nâwk ta a.
31 #
Tt 1.3
Chun, Galili rama inthawka Jerusalema ama ruola hang fe vehai kuoma chun ni sâwt tak sûngin ân lâr hlak a; chuong mihai chu tuhin mi kuoma a thu hretuhai an nih.
32Keini khawmin thlatuhai kuomah thutiem kha a chanchin lâwmum kan hung hril cheu hi,
33 #
Sm 2.7; 16.10; Is 55.3 khânga Pathienin Isu a keitho khan, eini an nauhai lei hin chuong chu a hlen a nih, Inpâkna Hla pahninaah, ‘Ka naupa i ni ie, vawisûn hin ka nei che a nih,’ ti ziek ang bawk khan.
34Hmawnna hmuna fe nâwk lo dingin Pathienin ama chu mithi laia inthawkin a keitho dingzie thu chu hieng hin a hril a nih, ‘David kuoma lunginsietna ka itiem tlathai kha nanga kuomah pêng ka che,’ tiin.
35Chuleiin, Hla dangin, ‘I Mi Inthieng chu hmawn hmang phal naw ti ni a,’ a ti bawk a.
36David chu, Pathien rorêlpêk angin a dam ruolpuihai rawng a bâwl zo khan, a in innghil a, a thlatuhai kuomah an inzâl a, a hmawn hmang tah a nih.
37Pathienin a ikeitho ruok kha chu a hmawn hmang naw kha.
38“Chuongchun, unauhai, hre ro; ama lei chun, suol ngaidamna thu in kuomah hril a ni hi;
39tûkhawm ama ring taphawt chu, iengkimah ama thiem inchangtirin a um, chuonga chun, Mosie Dânin thiem inchangtirin in um thei nawh.
40Chuleiin, fîmkhur ro, chuong naw chun, zâwlneihai lekhabua an hril kha in chungah hung tlung a tih,
41 #
Hab 1.5
‘Hmusittuhai en ta u,
Makti unla, bohmang ro;
In dam sûng hin thil kawng khat ka thaw hi,
Chu thil chu miin hril hai sienla cheu khawm,
Awi tawp naw ti niu,’ a ti kha,”
a ta.
42Chun, an suok chun, Châwlni nâwka chuong thu chu hril nâwk dingin an ngên a.
43Chun, inkhâwmhai chu an ṭin phingleh, Judahai le an saphun Pathien ngaisak laia mi tamtakin Paula le Barnaba chu an zui pei a; anni chun an lo biek a, Pathien lunginsietnaa chun um zing dingin an infui a.
44Chun, Châwlni nâwka chun a khuo deu thawin Pathien thu ngai dingin an hung inkhâwm a.
45Nisienlakhawm, Judahaiin mipuihai chu an hmu phingleh an îtthîk bêk el a; Paula thu hril chu an sêlkal a, an hrilpâwi hle a.
46Chun, Paula le Barnaba chun huoitakin an hril dawk a, “Pathien thu hi nangni kuoma hril hmasak hrim ding a nih; nisienlakhawm, in lo dang kîr a, chatuona hring tlâk lova in inruot ta hnung chu, hre ro, Jentailhai kuom tieng ngha vê tâng kan tih.
47 #
Is 42.5; 49.6 Chuong ang chun Lalpain thu a mi pêk a nih.
‘Jentailhai sukvartuah ka ruot che,
Kâwlkawdawng chena sandamna in tlun theina dingin,’ ti ziek ang khan,”
an ta.
48Chun, Jentailhai chun chuong thu chu an hrietin an lâwm a, Pathien chu an chawimawi a, chun, chatuona hring dinga ruot po chun an ring ta a.
49Chun, Lalpa thu chu, chu lai ram khawvêla chun ân dar ta a.
50Nisienlakhawm, Judahai chun nuhmei inzaum Pathien ngaisakhai le khuoa upahai chu an infui a, Paula le Barnaba chu an insuknawmnatir a, an rama inthawkin an hnawt suok ta a.
51 #
Mt 10.14; Mk 6.11; Lk 9.5; 10.11 Chun, anni chun an chungah an kephaa pilvut an thinthlâk a, Ikoniom an tlung ta a.
52Chun, închûktirhai chu lâwmna le Thlarau Inthiengin an sip tâwl a.
Currently Selected:
THILTHAWHAI 13: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
