THILTHAWHAI 10
10
Peter le Korneli
1Chun, Kaisari khuoah a hming Korneli mi pakhat a um a; Itali pâwl an ti, chu pâwla sipai za hotu a nih.
2Pathien ngaisak mi a na, a sûnghai po po leh Pathien an ṭi hlak a; mihai kuomah thil tamtak a pêk hlak a, Pathien kuoma khawm an ṭawngṭai rawp a.
3Chawhnung dâr thum vêlah inlârnain chiengtakin a hmu a; Pathien vântirko pakhat a kuomah a hung a, “Korneli” a hung ti a.
4Chun, Korneli chun ama chu a lo en zing a, a ṭi a, “Lalpa, ieng am a na?” a ta. Chun, ama chun a kuomah, “I ṭawngṭainahai le i thil pêk thuhai kha hriet zing dingin Pathien hmaah a hang tlung tah.
5Tuhin Joppa khuoah mihai tir la, mi pakhat Simon Peter an ti chu, hang inṭhuoitir rawh.
6Savun siemtu Simon kuoma tlung a na, a in chu tuipui panga a um a nih,” a ta.
7Chun, vântirko a betu chu a fe phingleh, Korneli chun, a siehlawhai laia mi pahni le a rawngbâwl rawphai laia Pathien ngaisak sipai pakhat a ko a;
8chun, thu po po chu an kuoma a hril zoin Joppa khuoa chun a tir ta a.
9Chun, a zînga an fe laia khaw kâwl an tlung laiin, Peter chu ṭawngṭai dingin, sûnbu fâk hun laiin, in chungah a hang lawn a.
10Chun a phîng a hung ṭâm a, bu fâk a nuom ta a; nisienlakhawm, fâk ding an siem lai chun zêlin a um ta a.
11Vân inhawngin, iengkhat bâwm puon lientak ang, a ki palia khita, hnuoiah inkhaithlain a hmu a.
12Chu sûnga chun sapheimanlihai le, thilhring le chunga vate tinrênghai an um a.
13Chun, a kuomah rawlin, “Peter tho rawh; that la fa rawh,” a hung ti a.
14Nisienlakhawm, Peter chun, “Lalpa, ni lo e; thil pawrche le inthiengnaw iengkhawm ka fâk ngai naw ie,” a ta.
15Chun, rawl chun vawihninaah, “Pathienin a sukthieng ta chu nangin thiengnaw ti naw rawh,” a ta.
16Chuong ang ruok chun, vawi thum a hung um a; chun, bâwm chu vâna zuk khaiin a um nâwk nghâl ta a.
17Chun, Peterin mang anga a hmu chu a ngaina hre lova a lunginzîng laiin, Korneli mi tirhai chun Simon in chu an lo indawn suok ta a, kawtkhâr bulah an lo ngîr a,
18an khêk a, Simon, Peter an ti chu, chutaka chun a tlung le tlung naw an indawn a.
19Chun, Peterin a mang thu chu a ngaituo laiin, Thlarauin a kuomah, “Ngai ta, mi pathumin an zawng che.
20Chuongchun, tho la, ṭum la, iengkhawm ringhla lovin anni zui rawh; anni chu ka itir an nih,” a ta.
21Chuongchun, Peter chu chuhai kâwla chun a ṭum a, an kuomah, “In izawng hi ka nih; ieng am in hungna san?” a ta.
22Anni chun, “Vântirko inthieng pakhatin, Korneli, sipai za hotu mi feltak, Pathien ṭi Juda hnam po pohai khawma an ingaisâng kuoma chun, i thu hril a hrietna dingin, a inah nang ko ding chein a hril a nih,” an ta.
23Chuongchun, mihai chu a ko lût a, ân riek tir ta a. A zînga chun Peter chu a tho a, an kuomah a fe a, Joppa khuoa mi unau tuhai amani khawm anni leh an fe ve a.
24Chun, a zing nâwk chun Kaisari khuoa chun an lût ta a. Chun, Korneli chun a laibunghai le a ruol dittakhai a ko khâwm a, anni chu a lo nghâk zing a.
25Chun, Peter chu a lût ding lai takin Korneli chun a lo tuok a, a ke bulah a bawkkhup a, Pathien chibai bûk angin a bûk a.
26Nisienlakhawm, Peterin ama chu a keitho a, “Ngîr rawh, kei khawm mihriem ka ni hi,” a ta.
27Chun, a kâwla thu hril pumin a lût a, mi tamtak umkhâwm chu a va hmu a.
28An kuomah, “Juda mîn hnam dang kuoma fe le pâwl a thieng nawzie nangnîn in hriet a nih; nisienlakhawm, tukhawm inthiengnaw le pawrche ka ti ding an nawh ti Pathienin a mîn hriettir a nih.
29Chuleiin, in mi hung ko phingle khan sêl lovin ka hung a ni hi. Chuongchun, kân dawn cheu, ieng am a na in mi hung ko san?” a ta.
30Chun, Korneli chun, “Ni li a ni tah, tu ang hunah hin, ka inah, chawhnung inher ṭawngṭainaah ka ṭawngṭai a; chun, ngai ta, mi pakhat puon vârtak silin ka hmaah a hung ngîr a,
31‘Korneli, i ṭawngṭaina kha hrietin a um tah, mi kuoma i thilpêkhai khawm kha Pathienin a hriet zing ie.
32Chuleiin, Joppa khuoah mi tir la, Simon Peter an ti chu, i kuomah ko rawh, ama chu tuipui panga savun siemtu Simon ina tlung a nih,’ a ta.
33Chuleiin, i kuomah mi ka hung tir nghâl tah a nih; i hung hi a ṭha ie. Chuongchun, Lalpain thu a pêk taphawt che hre dingin tuhin Pathien mithmuin kan rêngin hitaka hin kan um a ni hi,” a ta.
Korneli ina Peter thuhril
34 #
Dt 10.17
Peter chun a hril a, “Pathienin mi ditsak bîk a nei nawh ti indiktakin ka hriet;
35nisienlakhawm, hnam tin lai tûkhawm ama ṭia, feltaka thaw taphawt chu, a lâwm zâwng mi a ni hlak.
36Ama chun thlamuongna Chanchin Ṭha Isu Krista baua hrilin Israel mipuihai kuomah thu ân phur a, (Isu chu mi po po Lal a nih).
37Johanin a khêkpui hlak baptisma zoa khan, thu, Galili rama inthawkin hung inthang ṭanin, Juda ram po poa inthang suok kha, nangnîn in hriet bawk annâwm.
38Nazareth Isu chungchâng thu kha, khânga ama chu Pathienin Thlarau Inthieng le thilthawtheinaa a vurzie kha; ama chun mi chunga thawṭhain le diebol suknawmnat po po sukdamin a fang vêl hlak, Pathien a kuoma a um leiin.
39Juda ram le Jerusalema a thilthawhai po po hretu kan nih; ama chu thinglêra khaiin an sukhlum tah.
40Pathienin ama chu ni thum niin a keitho nâwk a, fietakin ân entir a,
41amiruokchu, mi po po kuomah ni lovin, a thu hretu ni dinga inhmaa Pathienin a ithlang tah, keini, mithi laia a thonâwk hnunga a kuoma faa dâwntuhai kuoma hin a nih.
42Ama chu mithihai le mi hringhai chunga Rorêltua Pathien iruot chu a nih ti, mi kuoma khêkpui le inhriettir dingin Pathienin thu a mi pêk a nih.
43“Tûkhawm ama ring taphawt chu a hming leiin suolhai ngaidamin um an tih ti hieng a chanchin hi zâwlneihai po poin an inhriettir hlak kha a nih,” a ta.
Jentailhaiin Thlarau Inthieng an chang ve
44Chun, Peterin chuong thu chu a hril lai tak chun, thu hretuhai po po chunga chun Thlarau Inthieng a hung tlung ta a.
45Chun, Sertanhai laia ringtuhai Peter hung zuituhai chun Thlarau Inthieng pêk chu Jentailhai chunga khawm buok a ni leiin mak an ti hle a;
46ṭawng hrietnawhaia thu hrilin, Pathien inpâkin an hriet si a.
47Chun, Peterin a biek a, “Hieng mihai, eini anga Thlarau Inthieng hmuhai hi baptisma an chang nawna dingin miin tui hmang an khap thei am a nih?” a ta.
48Chuongchun, Isu Krista hminga baptisma chang ding thu a pêk a. Chuong zoa chun ni iengzat amani lai châm dingin an ngên a.
Currently Selected:
THILTHAWHAI 10: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
