2 KORINTH 11
11
Paula le tirko tehlêmhai
1Kân vêt deunaa hin nangnîn in mi daw thei ka va nuom de! Anih, daw khawm in mi daw thei ngei a.
2Pathien thîknain a nih in sawnnaw ka thîk cheu chu; Krista kuoma chun nunghâk inthieng anga ka pêk theina ding cheuin, pasal pakhat ka huol pêk si cheu a.
3 #
Gen 3.1-5; 13 Nisienlakhawm, rûl chun a zâwrnain Evi a hlêm ang khan Krista tienga takna le inthiengnaa inthawk chu ieng amanih tiin in lungril chu sukkhawhlo rawi an tih ti kân lau a nih.
4Mi dang hungin Isu dang, a thu kan ihril ngai naw a hril a, thlarau danglam in la dawng ngai naw in dawngin, chanchin ṭha dang in ilâwm ngai naw chu in lâwmin in ngaithei pei el a ni maw?
5Chu tirko lien takhai chu ieng kawnga khawm ka tluk naw ka ring naw a nih.
6Thu hrila chu ṭawng hmang thiem naw lang khawm hrietnaa chun chuong chu ka ni naw a; chu chu iengkima fietakin nangni tieng kan inlangtir kha.
7Annawleh, Pathien Chanchin Ṭha nangni sêngna um hlek lova ka hril cheu a, dawmsânga in um theina dinga kân sukhnuoi khan ka lo suksuol a ni maw?
8Nangni rawng ka bâwl theina dingin an kuoma inthawka hlaw lain, kohran danghai sum ka sukhekpêk a.
9 #
Phil 4.15-18
Chun, in kuoma ka um a, ka tlâksam lai khan tûkhawmin an mîn khâwkpui naw a; unauhai chu Makedonia rama inthawka an hungin ka tlâksamna chu an mi hung phuhrûkpêk a ni si a; iengkimah nangni inkhâwkpui lo dingin kân siem kha, khâng ang khan insiem zing ka tih.
10Krista thutak keimaa a um ang hin Akaia ram tienga hi ka suongna hi tûkhawma mi sukbo pêk naw ni hai.
11Ieng leiin am? Ka lunginsiet naw lei cheu am a nih? Ka lunginsiet zie cheu chu Pathienin a hriet.
12Nisienlakhawm, remchângna hmu nuomtuhaia inthawka remchângna chu ka sâttan theina dingin, ka thaw hlak hi thaw pei ka tih, an suongnaa chun keini um ang hin an hung um theina dingin.
13Mi chuong ang mi chu, Krista tirkoa insiem fâwm, tirko tehlêmhai, sinthawtu mi hlêm hmanghai an ni si a.
14Chu chu a mak nawh, Setan meu khawm var tirkoah ân siem fâwm hlak si a.
15Chuleiin, a rawngbâwltuhai khawm chu felna tirkoah insiem fâwm hai sien khawm a mak a ni nawh, chuonghai tâwpna chu an thil thaw ang pei nîng a tih.
Paula tirko a nina leia a tuorna
16Hril nâwk hlak ka tih, tûkhawmin invêtah mi ngai naw raw hai se; nisienlakhawm, chuonga in mi ngai si chun, kei khawmin tlâwmtê bêka ka suong ve theina dingin, invêt angin mi daw bawk ro.
17Ka hril hi Lalpa thu angin ka hril naw a, ka insuongna ringzona leiin invêt ang takin hril ka ni lem a nih.
18Mi tamtakin tisa anga an suong leiin kei khawmin hang suong vêng ka tih;
19nangni chu le, mi var in ni leiin invêthai chu lungawitakin indaw hlak si a.
20Miin suokah siem sienla cheu, fa zo duok sienla cheu, salah man sienla cheu, ama le ama inchawimawi sienla, in hmaiah ben sienla cheu khawm in daw hlak si a.
21Kan lo hrât ta naw angin, insitin ka hril a nih; nisienlakhawm, tûkhawmin ieng kawnga khawm an ngam taphawt (invêttakin hang hril ta inla) kei khawmin ka ngam.
22Hebrai mi an ni maw? Kei khawm ka nih. Israel mihai an ni maw? Kei khawm ka nih. Abraham suonhai an ni maw? Kei khawm ka nih.
23 #
Tt 16.23
Krista rawngbâwltuhai an ni maw? (invêt angin hang hril ka tih) ka ni lem hman hman a nih: sin thaw inrimnaahai nasa nâwk zuolin, intângna ina intângnaahai nasa nâwk zuolin, tiem sênglo vuoknahai, thi el theina vawi tamtak ka tuok a nih.
24 #
Dt 25.3
Judahai lai vuokna vawi khata vawi sâwmli tlingnaw ṭum nga ka tuok a;
25vawi thum hmawla vuokin ka um a, vawi khat lunga dêngin ka um a, vawi thum lawng sietna ka tuok a, zân khat le ni khat tuisuorietah ka um a;
26 #
Tt 16.22; 14.19; 9.23; 14.5 Inzinna ṭum tamtakhaiah, vadunga ṭiumnaahai, suomhmanghai laia ṭiumnaahai, ka chipuihai laia ṭiumnaahai, Jentailhai laia ṭiumnaahai, khawpuia ṭiumnaahai, thlalêra ṭiumnaahai, tuisuorieta ṭiumnaahai, unau tehlêmhai laia ṭiumnaahai,
27sâwlnaa le sininrimnaahai, intheinawnaahai vawi tamtak, phîngṭâm le dangchârnaahai, bungheinaahai vawi tamtak, khawsik le saruoka umnaahai dâm ka um hlak.
28Chun, ka ihril tahai ti tâk lovah, kohran po po ka ngaituona, ni tina a mi del zing hi a um bawk a.
29Ka hrâtnawpui lova hrâtnaw tu am a um a? ka lungril sukna lova sukthlûk tu am a um hlak a?
30Suong ding ka ni rau rau chun ka hrât nawna tieng thilhai a nih ka suong lem ding.
31Lalpa Isu Pathien le Pa, kumkhuoa inpâk tlâka um chun khêl ka hril nawzie chu a hriet.
32Damaskaa khan, lal Areta hnuoia rorêltu chun a mi man dingin Damaskaa mihai khawpuia chun ân vêngtir a;
33chun, tukvera, kul hrûla chun bâwma thlâkin ka um a, chuongchun, a kuta inthawkin kân relhmang sawng ta a.
Currently Selected:
2 KORINTH 11: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
