ZEKARIA 11
11
1Aw Lebanon, i kawtkhârhai hawng rawh,
I sidar thinghai chu meiin a kâng hmang theina dingin!
2Aw fâr thing, inrûm rawh, sidar chu a tlu leiin;
A ṭhatakhai chu suksiet an ni ta sih a!
Basana thingsaisuohai, inrûm ro,
Ramhâk chu a chau ta sih a!
3Berâmpuhai inrûm ri chu e,
An ropuina suksiet a ni ta sih a!
Chu, sakeibaknei vânglai inrûm râwlri chu!
Jordan ramngaw chu suksiet a ni ta sih a.
Berâmpu hmangtlâklohai chu
4LALPA ka Pathien chun hieng ang hin a tih, “Sathattu berâm ruol chu châwm rawh,
5ân chawtuhai chun anni chu an that a, anni chu suolah an inngai nawh a; chun, anni zawrtu khawm chun, ‘LALPA chu inpâkin um raw se, ka hausa sih a’, an ta; an berâmpuhai ngei khawm chun anni chu an lunginsiet nawh.
6Ram hluotuhai chu ka lunginsiet ta naw ding a ni sih a, LALPA chun a tih; nisienlakhawm, en ta, mihai chu, mi tin el chu mâni tuolbâwmhai kutah pêng ka ta, an lalhai kuta leh; chun, ram chu thâwng an ta, an kuta inthawk chun anni chu sansuok naw ningah,” tiin.
7Chuongchun, sathattu berâm ruol chu ka châwm a, berâm ruol chautak el nang chu. Chun, hmawl pahni ka lâk a, pakhat chu Ditsak kân bûk a, a dang chu Pumkhatna kân bûk a; chun, berâm ruol chu ka châwm tah a.
8Chun, thla khat sûngin berâmpu pathumhai chu ka pei thlâk a; ka lungrilin anni chu a nghawk a, anni lungril khawma kei an mi nghawk bawk sih a.
9Chun, kei chun, “Châwm ta naw ning cheu, a thi thi chu thi sienla; pei thlâka um um chu pei thlâkin um sienla; a la damhai khawm chun anni le anni sa chu infatuo raw hai seh,” ka ta.
10Chun, ka hmawl Ditsak chu ka lâk a, ka sât bawng tah a, hnamhai po po le ka thuthlung ka siem chu ka sût theina dingin.
11Chuongchun, chu ni chun sût a lo ni tah a, chuongchun, berâm ruol, nang kei mi pawisatu chun LALPA thu a nih ti i hriet a.
12Chun, an kuoma chun, “In ngaia a ṭha chun ka hlaw chu mi pe unla, a ni naw chun, hrên el ro,” ka ta. Chuongchun, ka hlaw ding chun tangka sâwmthum an bûk tah a.
13 #
Mt 27.9-10 Chun, LALPA chun ka kuomah, “Sum bâwmah the lût el rawh, man ṭhatak, annia ka man hi,” a tih a, chuong tangka sâwmthum chu ka lâk a, LALPA ina sum bâwma chun ka the lût tah a.
14Chun, ka hmawl dang pakhat Pumkhatna chu ka sât bawng nâwk a, Juda le Israel inkâra inunauna chu ka suktan theina dingin.
15Chun, LALPA chun ka kuomah, “Berâmpu invêt hmangruohai kha la la nâwk rawh.
16En ta, rama chun Berâmpu pei thlâka umhai chu kankuo ngailo ding le, sukdara um chu zawng ngailo ding le, suktlieka um khawm chu sukdam ngailo ding chu, ka tungding nâwk ding a ni sih a; ama chun a hliem le a hrisêl khawm chu châwm chuong naw nih a, a thâu thâu sa chu fa lem a ta, an tinhai chu nawi tamtakin kei nawi a tih,” a ta.
17Berâmpu, berâm ruol mâk- santu chung chu a va rik de!
Kâwlhnâm chu a kut chunga chun um a ta.
A mit changtieng chunga leh;
A bân ṭâwl zo vawng a ta,
A mit changtieng khawm chu inthim tlat a tih!
Currently Selected:
ZEKARIA 11: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
