ROM 7

Inneinaa inthawka inentirna

1Anleh, unauhai, dân chun mi a dam sûng po a chungah ro a rêl hlak ti in hriet naw am an nih? (Dân hre mihai kuomah ka hril a ni hi).

2Nuhmei pasal nei chu a pasal dam sûng po dânin a pasala khuopdein a um hlak; nisien- lakhawm, a pasal a thi chun, pasal kawngah dâna inthawka insuoin a um hlak.

3Chuongchun, a pasal dam sûnga mi dang a nei chun “uirenu” tîng an tih; a pasal a thi ruok chun, chu dâna inthawk chun inthlain a um a; chuongchun, mi dang nei sien khawm uire a ni ta nawh.

4Chuongchun, unauhai, Krista taksa pêng in ni leiin dân kawnga sukhlumin in lo um tah a, mi dang, mithi laia inthawka a keitho kha, in nei thei tah, Pathien tienga kan ra theina dingin.

5Tisaa ei um lai khan Dân leia nuom zâwng suol hung suokhai chun ei taksa pêngahai thina khawpa ra dingin sin a hung thaw hlak.

6Tu ruok hin chu a mi cheltu chu thisanin, Dâna inthawkin inthlain ei um tah; chuleichun lekha ziek hlui ang ni loin, Thlarau tharin rawng ei bâwl theina dingin.

Dân le suolna

7 # Ex 20.17; Dt 5.21 Ieng am hril tâng ei ta? Dân chu suol am a nih? Teu lo e a; Nisien- lakhawm, Dân leia hriet ni naw sien chu suol ka hriet naw ding bah; Dân chun, “Inhnar naw,” ti naw sien chu inhnar hi ka hriet naw ding bah.

8Nisienlakhawm, suolin thupêk lei chun remchâng lai hmuin, inhnarna tinrêng ka sûngah ân umtir a. Dân naw chun suolna chu a thi a nih.

9Chun, kha hma khan kei dân nei loin ka hring a; nisienlakhawm, thupêk chu a hung um phingleh suolna chu a hung har a, kei chu ka thi tah a.

10Chun, hringna dinga thupêk chu thina ding lem a nih ti ka hung hriet tah a;

11suolna chun thupêk lei chun, remchângna hmuin a mi lo hlêm a, thupêk chu hmangin a mi sukhlum tah a nih.

12Chuongchun, Dân chu ân thieng a, thupêk khawm chu ân thieng a, a fel a, a ṭha a nih.

Mihriema mizie pahni um chu

13Anleh, thil ṭha chu keia ta dingin thina a lo ni am a nih? Teu lo e a! Suolna chu keia ta dingin thina a hung ni ta lem a nih; chuongchun, suolna chu suolna a nih ti ân lang theina dingin, thil ṭha chu hmangin a mi sukhlum a nih. Suolna chu thupêk lei khan suol nasatak a ni theina dingin.

14Dân chu Thlarau tieng thil a nih ti ei hriet sih a; kei ruok chu tisa tienga mi, suol suoka zawr ta hnung ka nih.

15 # Gal 5.17 Sin ka thawhai hi a ngaina ka hriet si nawh a, ka thaw hlakhai hi ka thaw nuom zâwng khawm a ni si nawh a; ka itheida zâwngtak chu ka thaw lem hlak a nih.

16Ka thaw nuom naw zâwng chu ka thaw si chun, Dân chu a ṭha tia awi nîng ka tih.

17Chuongchun, thil ka thawhai hi keiin ka thaw a ni ta nawh a, suolna keimaa um chun a thaw a ni lem a nih.

18Keimaa hin, chu chu ka tisaa hin tina a nih, thil ṭha hrim a um nawh ti ka hriet, thil ṭha thaw nuomna chu keimaah a umdea chu, thil ṭha thawna chu a um si nawh a.

19Ṭhatna thaw ka nuoma chu ka thaw naw a, suolna ka thaw nuom naw chu ka thaw sih a.

20Ka nuom naw zâwng ka thaw si chun, a thawtu chu kei ka ni ta nawh a, suol keimaa um chu a ni lem a nih.

21Chuongchun, hi dân hi ka hung hriet suok tah; thil ṭha thaw ka nuom laiin suolna ka kuomah a hung um hlak a nih.

22Ka lungril takin Pathien dân chungah ka lâwm si hlak a;

23nisienlakhawm, ka taksa pêng- haia hin dân danglam a um ti ka hriet, chu chun ka lungrila dân chu a do a, ka taksa pênghaia suolna dân umhai chun salah a mi ṭhuoi a nih.

24Mi rimsi ka va ni ngei de aw! Hi thina taksaa inthawk hin tuin am mi sansuok a ta?

25Isu Krista ei Lalpa lei chun Pathien kuomah lâwmthu ka hril a nih. Chuongchun, keima tak chun, ka lungril chun, Pathien dân rawng ka bâwl hlak, ka tisa ruok chun suolna dân rawng ka bâwl hlak.

Currently Selected:

ROM 7: HMARCLBSI

Highlight

Copy