LUKA 9
9
Sâwm le pahnihai rawngbâwl thu
(Mt 10.5-15; Mk 6.7-13)
1Chun, Isûn sâwm le pahnihai chu a ko khâwm a, khawhri po po chunga thilthawtheina le thuneina le natnahai sukdam theina a pêk a.
2Chuongchun, Pathien ram thu hril ding le, damnawhai sukdam dingin a tir suok tah a.
3 #
Lk 10.4-11 Chun, an kuomah, “Inzinnaa dingin hmawl amanih, mansa ama- nih, bei amanih, tangka amanih, iengkhawm chawi naw ro; zakuo pahni khawm nei naw ro.
4Chun, in tlungna in taphawtah tlung zing pei unla, chu ina inthawk chun suok ro.
5 #
Tt 13.51
Chun, a lâwm naw taphawt cheu chu, chu khuoa inthawka in suok pha chun an thiemnawzie inhriettirna dingin in kephaa pilvut chu thin thla ro,” a ta.
6Chuongchun, an fe tah a, khuo an fang pei a, ram tinah Chanchin Ṭha an hril a, mi an sukdam pei a.
Herod lungzîngna
(Mt 14.1-12; Mk 6.14-29)
7 #
Mt 16.14; Mk 8.28; Lk 9.19 Chun, lal Herod chun a thilthaw po po chu a lo hrietin a lunginzîng tah a, ṭhenkhatin, “Johan kha a hring nâwk tah a ni hi,” an ta,
8ṭhenkhatin, “Elija a hung inlâr tah a ni hi,” an ta, ṭhenkhatin, “Tienlaia zâwlnei tû amanih a tho nâwk tah a ni hi,” an ti leiin.
9Chun, Herod chun, “Johan lu chu ka tan ta kha; nisienlakhawm, hieng ang lâwma a thu ka ihriet hlak hi tû am a na?” a ta. Chun, ama chun hmu a tum tah a.
Sâng nga vai thu
(Mt 14.13-21; Mk 6.30-44; Jn 6.1-14)
10Chun, tirkohai chu an hung nâwkin, a kuomah an thilthawhai an hril a. Chun, ama chu anni atuma ṭhuoiin Bethsaida an ti khuoa chun a fe tah a.
11Nisienlakhawm, mipuihai chun an hriet a, an zui pei a; chun, ama chun anni chu a lo lâwm a, Pathien ram thu a hril a, sukdam ngaihai chu a sukdam a.
12Chun, khuo a hung inhnu ding a ni tah a, sâwm le pahnihai chu an hung a, a kuomah, “Ei kâwl vêl khuoahai le loahai fea, tlung in le fâk ding an hmu theina dingin mipui hi infetir ta la; hi, thlalêr hmuna um ei ni sih a,” an ta.
13Ama ruok chun an kuomah, “Nangnîn fâk ding pe ro,” a ta. Anni chun, “Hieng mi po po ta ding hin fâk ding kan vân châwkpêk naw chun, beiphêk panga le nga pahni chau naw chu iengkhawm kan nei nawh,” an ta.
14(Patling ruok khawm sâng nga lai rau an ni sih a). Chun, a închûktirhai kuomah, “Apâwl peiin inṭhungtir ro, sâwmnga lai peiin,” a ta.
15Chuong ang chun an thawh a, an inṭhungtir ta vawng a.
16Chun, beiphêk panga le nga pahni chu a lâk a, vân tieng enin mal a sâwm a, a khawi a, mipui hmaa sem dingin a inchûktirhai kuoma chun a pêk a.
17Chun, an fâk a, an khawp ta vawng a; an fâk mahla nawi chu bâwm sâwm le pahni an rût sip a.
Peterin Isu chu Krista a nih ti a phuongna
(Mt 16.13-19; Mk 8.27-29)
18Chun, Isûn a khât chaua a ṭawngṭai laiin, a închûktirhai chu a kuomah an um a, an kuomah, “Mipuihaiin tu am a nih an mi tih a?” tiin ân dawn a.
19 #
Mt 14.1-2; Mk 6.14-15; Lk 9.7-8 Chun, anni chun, “ ‘Baptistu Johan,’ an ti cheh a, nisienlakhawm, ṭhenkhatin, ‘Elija,’ ṭhenkhatin, ‘Tien- lai zâwlnei tû amanih a tho nâwk tah a nih,’ an ti che,” tiin an dawn a.
20 #
Jn 6.68-69
Chun, ama chun an kuomah, “Anleh, nangnîn tû am a nih in mi tih a?” a ta. Chun Peterin, “Pathien Krista chu,” tiin a dawn a.
Isûn a thi ding le a tho nâwk ding thu a hrillâwk
(Mt 16.20-28; Mk 8.30—9.1)
21Chun, chu thu chu tukhawm hril lo ding ti tlatin, thu a pêk a.
22“Mihriem Naupa hin thil tamtak a tuor ding a na, upahai, thiempu lalhai, Dân Inchûktirtuhai dit nawin a um ding a na, thatin a um ding a na, ni thum niah keithoin a um bawk ding a nih,” a ta.
23 #
Mt 10.38,39; Lk 14.27; 17.33; Jn 12.25 Chun, ama bawkin mi po po kuomah, “Tûkhawmin mi zui a nuom chun mâni inhnâwlin#Mani intheinghilin, ni tin a kraws putin mi zui raw se.
24Tûkhawm a nun humhim nuom phawt chun chân a ta; tûkhawm keia leia nun chân taphawt chun, ama ngei chun humhim a tih.
25Mîn khawvêl hi a pumin nei sienla, insukboin amanih insukse sienla, a ta dingin iengam ṭhahnem a ta?
26Tûkhawm kei le ka thu inzapui taphawt chu, Mihriem Naupa hin ama ropuina leh, a Pa ropuina leh, a vântirko inthienghai ropuina leh a hung pha chun ama chu hung inzapui vêng a tih.
27Indiktakin ka hril cheu hi, hitaka ngîrhai a ṭhen hi Pathien ram an hmu hmakhat chun thina intem tawp lo ding an um,” a ta.
A hmêl danglamna
(Mt 17.1-8; Mk 9.2-8)
28 #
2 Pet 1.17-18
Chun, chuong thu a hrila inthawk ni riet amanih lai hnunga chun, Isûn Peter hai, Johan hai, Jakob hai chu a ṭhuoi a, ṭawngṭai dingin tlângah a hang feh a.
29Chun, a ṭawngṭai laiin a hmêl umzie chu a hung danglam a, a silfênhai chu a hung vâr a, mi elkhal theiin a um tah a.
30Chun, ngai ta, mi pahni ama leh an inbiek a, chuhai chu Mosie le Elija an nih;
31ropuinaa inthuomin an inlâr a, Jerusalem khuoa a thi tleitlâkna ding thu an hril a.
32Peter le a ruolhai ruok chu an inlusuh a; chun, an har phingleh a ropuizie le a kâwla mi pahni ngîr chu an hmu tah a.
33Chun, anni chun Isu an mâksan ding laiin, Peterin Isu kuomah, “Inchûktirtu, ei ta dingin hitaka um zing hi a ṭha; bâwkte pathum khâwng kan tih, i ta dingin pakhat, Elija ta dingin pakhat, Mosie ta dingin pakhat,” a ta, a thu hril khawm hre loin.
34Chun, chuong thu chu a hril laiin sûm a hung zîng a, anni a hlie tah a; sûma chun an lût laiin an ṭih a.
35 #
Is 42.1; Mt 3.17; 12.18; Mk 1.11; Lk 3.22 Chun, sûma chun râwl a hung suok a, “Hi hi ka Naupa, ka ithlang chu a nih, ama thu ngai ro,” a ta.
36Chun, râwl chu a bo phingleh Isu chu ama chauin an hmu tah a. Chun, an to zing a, chuong lai vêl chun an thil hmu chu tukhawm an hril nawh.
Khawhri iman naupang sukdam thu
(Mt 17.14-21; Mk 9.14-29)
37Chun, a zîngah tlânga inthawka an ṭum hnung chun, mipui nasatakin ama chu an lo tuok a.
38Chun, ngai ta, mipui lai chun, mi pakhat a khêk a, “Inchûktirtu, ka naupa hi en dingin ka ngên che, ka nau nei sun a ni sih a.
39Ngai ta, khawhriin a man hlak a, a khêk suok thut hlak, chuong- chun, a chilhuom tla khawpin a sawisa hlak a, nasataka sukhliemin a mâksan ṭâwk hlak.
40Chun, i închûktirhai kuomah hnawt dawk dingin ka ngên a, an thei si nawh a,” a ta.
41Chun, Isûn “Ruolthar ringna nei loa kâwmawhai, ieng chen am in kuomah um ka ta, ngaithei ka ti cheu a? I naupa chu hitaka hin hung ṭhuoi rawh,” a ta, a dawn a.
42Chun, a hung laiin, khawhri chun a sukthlûk rak a, nasatakin a sawisa tah a. Nisienlakhawm, Isûn khawhri inthieng naw chu a hal a, naupang chu a sukdam a, a pa kuoma chun ân fetir nâwk tah a.#Mt 10.40; Lk 10.16; Jn 13.20
43Chun, mi po poin Pathien ropuizie chu mak an ti hleh a.
Isûn a thi ding thu a hril nâwkna
(Mt 18.22-23; Mk 9.30-32)
Chuongchun, mi po po chun a thilthaw po po chu mak an ti lai chun, Isûn a închûktirhai kuoma chun,
44“Chuong thu chu in naah lût raw se, Mihriem Naupa hi mihriem- hai kuta inmantirin a um ding a ni sih a,” a ta.
45Nisienlakhawm, a thu hril chu a ngaina an hriet nawh a, an hriet thei nawna dingin ân thup a nih, chu thu hril chanchin chu ama hlak an indawn ngam si nawh a.
Tu am a ropuitak a?
(Mt 18.1-5; Mk 9.33-37)
46Chun, “Eini lai tu am ropui tak a ta?” tiin an lo insêl a. #Lk 22.24
47Chuongchun, Isûn an lungrila an ngaituo chu a hriet a, naupangte a kei a, a sîrah ân ngirtir a,
48an kuomah, “Tûkhawm, ka hming leia hi naupangte lâwm taphawt chu kei a mi lâwm ning a ta, tukhawm kei mi lâwm chu a mi tirtu lâwm nîng a tih, nangni laia chîntak hi a nih a ropui chu,” a ta.
Nangni kal naw chu nangni tienga ṭhang a nih
(Mk 9.38-40)
49Chun, Johan chun, “Inchûktir- tu, tu amanih i hminga khawhrihai hnawt dawk kan hmuh a, kan zuina cheah a ṭhang ve naw leiin kan khap el annaw,” a ta, a dawn a.
50Isu ruok chun a kuomah, “Khap ta naw ro, tûkhawm nangni sêlkal naw chu in tienga ṭhang a ni sih a,” a ta.
Samari khuo pakhatin Isu a lâwm nawh
51Chun, ama vâna ṭhuoi a hun ding laiin, Jerusalema fe tumin a ngha tlat a,
52a hmaah thangkohai ân tlântir a, chun, an feh a, ama lo buotsaipêk dingin Samari khuo pakhatah an lût a.
53Chun, a mitmei chu Jerusalem tieng pana ân lang leiin ama an lâwm nawh.
54Chuongchun, a închûktir Jakob le Johan chun chu chu an hriet phingleh, “Lalpa, hienghai kâng vawngna ding hi vâna inthawkin mei ko thla inlang rem i ti?”#Ziek ṭhenah, “Elija thaw ang khan” ti an bel an ta. #2 Lal 1.9-16
55Ama ruok chu a hang nghah a, a baukhat a.#Ziek ṭhenah “Ieng ang thlaraua inthawk am in ni in hriet nawh 56 Mihriem Naupa hi mihai hringna sukse ding ni loin, sandam dinga hung a ni lem,” a ta, ti an bel
56Chun, khaw dangah an fe tah a.
Inchûktir ni tumtuhai
(Mt 8.19-22)
57Chun, lampuia an fe laiin tuin amanih a kuomah, “I fena taphawtah zui ka ti che,” a ta.
58Isûn a kuomah, “Sihalhaiin kuo an nei a, chunga vatehai khawmin bu an nei a, Mihriem Naupa ruok hin chu a lu innghatna a nei nawh,” a ta.
59Chun, Isûn mi dang kuomah, “Mi zui rawh,” a ta. Ama chun, “Lalpa, ka pa mîn vuitir zet rawh,” a ta.
60Isu ruok chun a kuomah, “Mithiin anni mithi chu vui raw se; nang chun Pathien ram thu va hril dar lem rawh,” a ta.
61Chun, mi dang khawmin, “Lalpa, zui ka ti che, amiruokchu, ka ina mihai bau ṭhain mîn thlatir zet rawh,” a ta. #1 Lal 19.20
62Isûn a kuomah, “Tukhawm hnuoi inletnaa kut innghata, hnung tieng ngha chu Pathien rama mi ni tlâk a ni nawh,” a ta.
Currently Selected:
LUKA 9: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
