LUKA 6

Châwlnia buvui thliek thu

(Mt 12.1-8; Mk 2.23-28)

1 # Dt 23.25 Chun, Châwlni vawikhat chu bu bilahai a fe thleng a, a închûktirhai chun bu vuihai chu an thliek a, an kutphaah an nuoi fai a, an fâk a.

2Chun, Pharisai tuhaiin amani chun, “Ieng dinga Châwlnia thaw thieng naw chu in thaw am a na?” an tih a.

3 # 1 Sam 21.1-6 Chun, Isûn a dawn a, “A ruolhai le an phîngṭam laia David thilthaw kha in tiem naw am a nih?

4 # Lev 24.9 Khânga Pathien inah a lût a, thiempuhai chau naw chun fâk thieng lo entirna bei chu a lâk a, a fâk a, a ruolhai khawm a pêk ve thu kha,” a ta.

5Chun, ama bawkin an kuoma chun, “Mihriem Naupa hi Châwlni Lal a nih,” a ta.

Châwlnia kut zeng sukdam thu

(Mt 12.9-14; Mk 3.1-6)

6Chun, Châwlni danga chun inkhâwmna inah a lût a, ân chûktir a; chutaka chun mi pakhat kut chang- tieng zeng a lo um a.

7Chun, Dân inchûktirtuhai le Pharisaihai chun, a hêkna ding an hmu theina dingin, châwlni chun a sukdam ding le ding naw an enthlit a.

8Nisienlakhawm, ama chun an lungril chu a hriet a, kut zeng kuoma chun, “Tho la, a laiah ngîr dawk rawh,” a ta. Chun, a tho a, a ngîr dawk tah a.

9Chun, Isûn an kuomah, “Châwlni hin sukṭhat am a thienga, suksiet? Sandam am a thienga, sukhlum? kân dawn cheu a nih,” a ta.

10Chun, an rêng chun a en vêl a, a kuomah, “I kut phar rawh,” a ta. Chun, a phar a, a kut chu a dam tah a.

11Chuongchun, an lungsen chun an puokkawi vâng vâng a, Isu chunga an thaw dân ding an inrâwn a.

Isûn sâwmpahnihai a thlang

(Mt 10.1-4; Mk 3.13-19)

12Chun, chuong lai chun a suok a, ṭawngṭai dingin tlângah a feh a, Pathien kuomah a ṭawngṭai zân- khuoh a.

13Chun, khawvar phingleh a închûktirhai chu a ko a; anni laia mi sâwm le pahni a thlang a, an hminga khawm tirko ân bûk a;

14chuonghai chu Simon (Peter ân bûk bawk chu) le a unau Andri hai, Jakob le Johan hai, Philip le Bartholomai hai,

15Matthai le Thoma hai, Alphai naupa Jakob hai, Simon Zelot an ti hai,

16Jakob naupa Juda hai, ân mantirtu ding Juda Iskariot hai an nih.

Isûn mipui tamtak ân chûktir

(Mt 4.23-25)

17Chun, anni ruolin a fe thlah a, hmun inzâwlah a ngîr a, a închûk- tirhai mipui nasatak leh, Judai ram po poa inthawk le Jerusalema inthawk le Tura le Sidon khuo tienga tuisuoriet panga inthawk mi tamtak leh;

18chuonghai chu a thu ngai nuom le an natnahai insukdam nuomin an hung a nih; chuongchun, khawhri inthieng naw isawisakhai khawm an hung dam tah a.

19Chun, a kuoma inthawka thil- thawtheina suoka mi tin a sukdam pei leiin, mipui po po chun ama them an tum a.

Hamṭhatna le chungrikna

(Mt 5.1-12)

20Chun, a dâk suok a, a închûk- tirhai chu a en a,

“Nangni rimsihai, in hamṭha ie,

Pathien ram in ta a ni sih a.

21“Nangni tuta phîngṭamhai, in hamṭha ie; in la khawp ding a ni sih a.

“Nangni tuta ṭaphai, in hamṭha ie; in lân nui ding a ni sih a.

22 # 1 Pet 4.14; 2 Chr 36.16; Tt 7.52 “Mihriem Naupa leia mihaiin an theida cheu a, an tuithlâra an hal cheu a, in hming a ṭha nawh tia an pei hmang dêr phaleh in la hamṭha ding a nih.

23Chu ni chun lâwm unla, hlimin inchâwm ro; ngai ta u, vânah in lâwmman a um râwn sih a; chuong ang bawkin an thlatuhaiin zâwlnei- hai chungah an thaw hlak kha.

24“Amiruokchu, nangni mi hausa- hai, in chung a rik ie; in thlamuongna in hmu ta sih a.

25“Nangni tuta khawphai, in chung a rik ie; in phîng a la ṭâm ding a ni sih a.

“Nang ni tuta innuihai, in chung a rik ie; lungngaiin in la ṭap ding a ni sih a.

26“Mi po poin an inpâk pha cheu in chung la rik a tih; chuong ang bawkin an thlatuhaiin zâwlnei tehlêmhai chungah an thaw hlak kha.

Hmêlmahai hmangai ding thu

(Mt 5.38-48; 7.12)

27“Ka thu ngaituhai, ka hril cheu hi, in hmêlmahai chu hmangai unla, a theidahai cheu chu an ṭhatna ding thaw unla,

28ṭawngsie inphurtuhai cheu chu malsâwmpêk unla, a sawisatuhai cheu chu ṭawngṭaipêk ro.

29“Bieng khing tienga bentu cheu chu khing tieng khawm dâwpêk ro; chun, i puon lâkpêktu che kuoma chun i zakuo lâk khawm sêl naw.

30“A hnitu taphawt che kuomah pe rawh; chun, i thil lâkpêktu che kuoma chun hni nâwk ta naw rawh.

31 # Mt 7.12 “Chun, mîn in chunga an thaw dinga in dit ang peiin mi chunga khawm thaw ve ro.

32“Chun, nangni hmangaituhai chau in hmangai hin, lâwm ieng am hlâwng in ta? Mi suolhai khawmin anni hmangaituhai chu an hmangai hlak annâwm.

33Chun, in chunga ṭhahai chunga chau in ṭha hin lâwm ieng am hlâwng in ta? Mi suolhai khawmin chuong ang bawkin an thaw annâwm.

34Chun, hmu nâwk beiseina kuom chaua thil in inpûktir hin lâwm ieng am hlâwng in ta? mi suolhai khawmin a ngai bawka hmu nâwk dingin misuolhai kuomah an inpûktir hlak.

35Amiruokchu, in hmêlmahai hmangai unla, an ṭhatna ding thaw unla, inpûktir ro, beidawng dêr loin; chuongchun, in lâwmman tam a ta, Achunghnungtak nauhai ni bawk in tih; ama chun mi lâwmnachâng hre lohai le mi suolhai a lunginsiet hlak.

36In Pain mî a lunginsiet angin mî lunginsiet ve ro.

Mi dang chungthu rêlpêk thu

(Mt 7.1-5)

37“Sawisêl naw ro, chuongchun, sawisêlin um naw ti niu. Tukhawm thiemnawah ruot naw ro, chuongchun, inthiemloin um naw ti niu. Ngaidam ro, chuongchun, ngai- damin um in tih.

38Pe ro, chuongchun pêkin um in tih, ṭhahnemngaitaka inkhia, nam- dêna, sâwi muka, liem zar zara, in mal chungah pêk nîng in tih. In inkhîna ngai bawkin inkhipêk in ni ding a ni sih a,” a ta.

39 # Mt 15.14 Chun, an kuomah tekhithu a hril a, “Mitdelin mitdel ma a ṭhuoi thei ding am a nih? an pahni chun khurah an tla rêl el naw ding am a nih?

40 # Mt 10.24-25; Jn 13.16; 15.20 Inchûktu chu a inchûktirtu chungah a um nawh; nisienlakhawm, mi tin an inchûk zo pha an inchûktirtu angin um an tih.

41“Chun, ieng dinga mâni mita tlungpûm um chu ngaituo si loa, i unau mita hmawl hlek um chu i hmu am a na?

42Mâni mita tlungpûm um chu hmu si loin, i unau kuomah, ‘Unau, i mita hmawl hlek um kha mîn lâk dawk tir rawh,’ iengtin am i ti thei a? Mi vervêk! i mita inthawkin tlung- pûm kha la dawk hmasa rawh, chuongchun, i unau mita inthawka hmawl hlek lâk dawk ding chu fietakin hmu thei i tih.

Thing chu a raa hriet a nih

(Mt 7.17-20; 12.34-35)

43“Thing ṭha hrim hrim ra sea ra a um nawh; thing ṭha naw hlak ra ṭhaa ra a um bawk nawh.

44 # Mt 12.33 Thing tin anni ra sengah ân hriet a nih. Mîn hruihlingnei kûngah theichang an lo ngai nawh, nghardai kûngah grêp an lo ngai bawk nawh.

45 # Mt 12.34 Mi ṭha chun a lungril ro bâwm ṭhaa inthawkin thil ṭhahai a the suok hlak; mi suol chun a lungril ro bâwm siea inthawkin thil ṭha nawhai a the suok hlak; a lungril sip liem chu a bauin a hril suok el hlak a ni sih a.

Lungphûm pahnihai chu

(Mt 7.24-27)

46“Chun, nangnîn ieng dinga ka thu zâwm si loa, ‘Lalpa, Lalpa,’ in mi ti hlak am?

47Mi tin ka kuoma hunga, ka thu hrea zâwm taphawt chu tû ang am an nih inhriettir ka ti cheu:

48In bâwltu, inthûktaka choa, lungpui chunga lungphûm remtu ang chu an nih. Chun, tui a hung lienin tui hrâtin chu in chu a khawh a, a sukhnîng thei nawh a, a bâwl ngun leiin.

49Amiruokchu, hrea zâwm naw chu, lung phûm loa, hnuoi chung ela in bâwltu ang chu an nih; tuihrâtin chu chu a khawh a, a chim nghâl tah a: a chim chu nasatak a nih,” a ta.

Currently Selected:

LUKA 6: HMARCLBSI

Highlight

Copy