THILTHAWHAI 22

1“Unauhai, pahai, tuhin in kuomah ka thiemna thu ka hril ding cheu a ni hi lo ngai ro,” a ta.

2Chun, Hebrai ṭawngin an kuomah thu a hril ti an hriet phingin an to nâwk zuol a;

3 # Tt 5.34-39 chun, ama chun, “Juda mi ka nih, Kiliki ram Tarsa khuoa pieng ka nih; nisienlakhawm, hi khuoa hin Gamaliel ke bula inchûka inṭhang lien ka nih, ei thlatuhai Dân khermeitak chu inchûka um hlak ka nih, vawisûna nangni ang tak hin, Pathien ta dinga ṭhahnem bawk hlak ka nih.

4 # Tt 8.3; 26.9-11 Hi Lama mihai hi sukhlum rau khawpin ka suknawmna hlak a, a nuhmei a pasalin ka khuop a, intângna inah kân khumtir hlak a.

5Thiempu Laltak le upahai po po khawmin chuong thu chu an mi hrietpui thei, an kuoma inthawka unauhai pêk dingin lekha ka hmu kha; chun, Damaskaa um taphawt an hrem dingin, khuop puma Jeru- salema ṭhuoi dingin ka fe kha.

Paulain a piengthar thu a hril

(Tt 9.1-19; 26.12-18)

6“Chun, ka feh a, Damaska khaw kâwl ka tlung chun, sûnbu fâk pha laiin, kârloin vâna inthawka var nasatak ka vêlah a hung var phut a.

7Chun, hnuoiah ka tluh a, ka kuomah, ‘Saula, Saula, nangin ieng- dinga i mi suknawmna am a na?’ tiin rawl ka hriet a.

8Chun, keiin, ‘Tu am i na, Lalpa?’ tiin ka dawn a. Ama chun ka kuomah, ‘Nazareth Isu i suknawmnat hi ka nih,’ a ta.

9Ka ruolhai chun var chu an hmu dea chu, a mi betu rawl ruok chu an hriet nawh.

10Chun, keiin, ‘Lalpa, ieng am thâwng ka ta?’ ka ta. Lalpa chun ka kuomah, ‘Tho la, Damaskaah lût rawh, thil po po i thaw dinga ruot taphawt chu hril an ti che,’ a ta.

11Chun, chu var nasat lei chun khuo ka hmu thei ta nawh a, ka ruolhaiin kutin an mi kei a, Damaskaah ka lût tah a.

12“Chun, mi pakhat, Anania, Dân kawnga Pathien ngaisak le chutaka Juda umhai po po kuoma hming ṭha chu,

13ka kuomah a hung a, ka kâwlah a ngîr a, ka kuomah, ‘Unau Saula, mitvar nei rawh,’ a mi ta. Chu lai tak chun ka mit chu a hung var a, ama ka hang hmu tah a.

14Chun, ama chun, ‘Ei thlatuhai Pathienin a ditzâwng hre ding le, Mi feltak chu hmua, a ṭawngbau khawm hre dingin a ruot ta che.

15I hmu le i hriet thua khan mi po po kuomah ama thu hretu nîng i tih.

16Chun, iengdinga i la um zing am? Tho la, ama hming lam pumin baptisma chang la, i suolhai sâwpfai ta la,’ a mi ta.

Jentailhai kuomah Paula tirin a um

17“Chun, Jerusalema hin ka kîr nâwk hnungin, Pathien biekina ka ṭawngṭai laiin, zêlin ka um a;

18chun, ‘Inhmaw la, Jerusalema inthawkin suok rawh; ka chanchin i hril ding chu an pawm âwm naw hi,’ a mi ti lai ka hmuh a.

19“Chun, keiin, ‘Lalpa inkhâwm- na in tinah a ringtu che taphawt intângna inah ka khum a, ka vuok hlak kha an hriet sih a;

20 # Tt 7.58 chun, i thu hretu Stephan thisen an insuo lai khan kei khawm an kâwlah ka ngîr a, ka lo remtih a, a sukhlumtuhai puonhai dâm ka lo vêng tâwl bawk a nih,’ ka ta.

21“Chun, ama chun, ‘Fe rawh; hitaka inthawka hlatakah, Jentail- hai kuomah tir lem ka ti che,’ a mi tih a,” a ta.

Paulain Rom khaw mi a nizie a suklang

22Chun, chu thu chen chun an ngai a, rawl inringtakin, “Mi hieng ang hrep hi, khawvêla inthawkin sukbohmang ro, hring tlâk khawm a ni nawh,” an ti tah a.

23An khêk a, an puonhai an hlîp a, an pei a, pilvut an vânvawr a,

24chuongchun, sipai hotu laltak chun Paula chu kulbîng sûnga ṭhuoi lût thu a pêk a, a chunga chuong ang lâwma an khêkna san chu hrietna dingin vuok puma suosal dingin a tih a.

25Chun, savun hruia an khuop zoin, Paulain a kâwla ngîr sipai za hotu kuoma chun, “Rom mi hrim hrim in vuok thei am a nih? thiemnaw inchangtir hnung khawm ni si loin,” a ta.

26Sipai za hotu chun chu chu a hriet phingleh, sipai hotu laltak kuomah chun a feh a, “I thil thaw ding hi fimkhur raw khai! Hi mipa hi Rom mi a lo nih ie,” a ta, a hril a.

27Chun, sipai hotu laltak chu a hung a, a kuomah, “Rom mi i ni maw? Mi hril rawh,” a ta. Ama chun, “Nih e,” a ta.

28Sipai hotu laltak chun, “Chu khuoa mi ni dingin kei chu tangka tamtak ka sêng annaw,” a ta, a dawn a. Paula chun, “Kei chu Rom mia pieng hrim ka nih,” a ta.

29Chuongchun, sawisak puma suosal tumtuhai chun ama chu an mâksan nghâl tah a; sipai hotu laltak khawmin Rom mi a nih ti a hriet chun a ṭih a, ama a khuop lei khan a ṭi bawk a.

Rorêltuhai hmaah Paula a ngîr

30Chun, a zînga chun Judahaiin ieng leiin am Paula an hêka ti hriet fel tumin sipai hotu laltak chun ama chu a sût a, thiempu lalhai le rorêltuhai po po inkhâwm dingin thu a pêk a, Paula a ṭhuoi thlâk a, an hmaah ân ngirtir ta a.

Currently Selected:

THILTHAWHAI 22: HMARCLBSI

Highlight

Copy