THILTHAWHAI 17

Thessalonikaa buoina

1Chun, Amphipoli le Apollonia an khêl a, Thessalonika an tlung tah a; chutaka chun Judahai inkhâwmna in a um a.

2Chun, Paula, a dân pângngaiin, an kuomah a lût a, Châwlni vawi thum Pathien Lekha Thua inthawkin nguntakin a suipui a,

3Krista chu rinum tuor ding a ni hrimzie dâm, mithi laia inthawka thonâwk ding a ni hrimzie dâm a hrilfieh a; a suklang hlak a, “Hi Isu a thu ka hril cheu hi, ama chu Krista a nih,” a ti bawk hlak a.

4Chuongchun, anni laia ṭhenkhat chu zâwrthlûkin an um tah a, Paula le Sila chu an pâwl tah a; Pathien ngaisak Grik mipui nasatak le nuhmei ṭhuoitu tamtak leh.

5Nisienlakhawm, Judahaiin an huphur a; dâwr hmuna mi suol thabo tuhai amanih an kuomah an ṭhuoi a, mipui an ko khâwm a, khuo po po chu an chawkbuoi a, Jason in an hung ṭhâwng a, vântlâng laia ṭhuoi suok tumin.

6Chun, anni chu an hmu nawh a, Jason le unau dang tuhai amanih khaw hotuhai kuomah an kei lût a, an khêk a, “Khawvêl chawk- buoituhai kha hitaka khawm hin an hung a,

7Jason hin a lo intlungtir vei a; hienghai po po hi, ‘A hming Isu, lal dang a um,’ tiin Kaisar thu kalin an um hlak a nih,” an ta.

8Chun, mipui le khaw hotuhai chun chuong thu chu an hang hriet chun an buoi tah a;

9chun, Jason le unau danghai kuoma inthawka an aia hrên ding iengkhat an lâk a, an insuo tah a.

Tirkohai Beroia khuoah

10Chun, unauhai chun a zân a zânin Paula le Sila chu Beroia khuoah an infetir nghâl tah a; chutaka an va tlung chun, Judahai inkhâwmna inah an lût a.

11Chutaka mihai chu Thes- salonika mihai nêk chun an lo ṭha lem a, chuongchun, lungril lâwmtakin thu chu an pawm a, an thu hril chu ân dik le ân dik naw hrietna dingin ni tin Pathien Lekhaah an zawng hlak a.

12Chuongchun, chuong mihai tamtak chun an ring tah a; Grik nuhmei inzaumhai le pasalhai khawmin duoiin an ring ta nawh a.

13Nisienlakhawm, Thessalonikaa Judahai chun Paulain Beroia khuoah Pathien thu a hril ti an hriet phingleh, chutaka khawm chun an va feh a, mipuihai an infui a, an buoi nâwk tah a.

14Chuongchun, unauhaiin tuisuo- riet chena fe dingin Paula chu an tir suok tah a, Sila le Timothe ruok chu chutaka chun an la um zing a.

15Chun, Paula ṭhuoituhai chun Atheni chenin an ṭhuoi a; chun, Sila le Timothe chu inhmawtaka a kuoma fe vakna ding thu incha chu phurin an kîr tah a.

Paula Atheni khuoah

16Chun, Paulain Atheniah anni chu a lo nghâk laiin, khuo chu Pathien lima sipin a hmuh a, a lungril a helkam tah a.

17Chuongchun, inkhâwmna inah Judahai le Pathien ngaisakhai a sêl hlak a, dâwr hmuna dâm khawm, chutaka hung um taphawthai chu ni tin a lo sêl bawk hlak a.

18Chun, Epikuria mi le Stoik mi laia mi var tuhai amanih khawmin ama chu an hung sêl a, a ṭhenin, “Hi mipa bautam hin ieng am hril a tum a?” an ta. A ṭhenin, (Isu thu le thonâwkna thu a hril leiin,) “Ram dang pathienhai thu hriltu a ni âwm ie,” an ta.

19Chun, ama chu an chel a, Areopagia chun an hung ṭhuoi a, a kuomah, “Hi inchûktirna thar i hril hlak hi mîn hriettir thei i ti?

20Thilmak ieng amanih kan naah i hung intlun a nih; chuleiin, hieng thil umzie hi hriet kan nuom,” an ta.

21(Athenia mi po po chu, an khuoa mikhuol umhai khawm, an inhman chang taphawt chu thu thar chu hrilin amanih, ngaiin amani bêk an um zing hlak hrim a na).

22Chun, Paula chu Areopagi lai taka chun a ngîr a, a hril a, “Nangni Athenia mihai, iengkimah sakhaw ngaisaktak mi in ni ti ka hriet a.

23Ka lêng malama, chibai in ibûkhai ka en laiin, mâichâm pakhat, a chungah, ‘HRIET NAW PATHIEN TA DING,’ tia ziek ka hmu a nih. Chuongchun, hre loa chibai in ibûk hlak kha, ama thu chu ka hril cheu a ni hi.

24 # 1 Lal 8.27; Is 42.5; Tt 7.48 Pathien, khawvêl le a sûnga thil po po siemtu chu, hnuoi le vân lal a ni leiin, kuta bâwl inhaiah a um nawh.

25Thil tlasam angin mihriem kuta rawngbâwlpêkin a um bawk nawh. Ama ngei chu iengkim kuoma hringnahai, inthuoknahai, le thil po po petu chu a ni lem.

26Chun, hnuoi chung po poa um dingin, bul hmunkhatin hnam tin mi a siem a. An ta dingin hun bihai a ruot a, an umna rihai khawm a khang pêk a;

27Pathien an zawng a, an dap an dap a, an hmu hrâmna dingin; nisienlakhawm, ama chun a mi hlat naw seng si.

28Ama leiin, ei hring, ei châng, ei um a ni sih a; nangni hlaphuokthiem tuhai amani khawmin, ‘Eini khawm a thlahai ei nih,’ tia an hril ang khan.

29Chuongchun, Pathien thlahai ei ni hnung chu, Pathien pangti chu, rângkachak dâm, tangka dâm, lung dâm, mihriem themthiem le remruot- a suthai ang hi amanih ei ti ding a ni nawh.

30Chuongchun, Pathienin ei hriet naw laihai kha hriet naw tehlêm a thaw hlak a; nisienlakhawm, tuhin chu ram tina mi po po sim ding thu a pêk tah a nih, ni a tiem leiin;

31chu ni chun, a mi ruot chu, hnuoia mihai ro feltakin inrêltir a tih. Chu thu chu, Pathienin ama chu mithi laia inthawka a keithona chun, mi po po kuomah ân hriettir tah a nih,” tiin.

32Chun, mithi laia inthawka thonâwkna thu chu an hriet phingleh a ṭhenin an nuisan a; a ṭhenin, “Hi thu hi i kuomah la ngai nâwk kan tih,” an ta.

33Chuongchun, Paula chu anni laia inthawkin a suok tah a.

34Nisienlakhawm, mi tuhai ama- nih a kuomah an ṭhang ta tlat a, an ring tah a; anni laia ṭhenkhathai chu Areopagia rorêltu pâwla mi Dionusia le, nuhmei pakhat a hming, Damari le, an kuoma mi danghai le chun an nih.

Currently Selected:

THILTHAWHAI 17: HMARCLBSI

Highlight

Copy