MARKA 7

1Cuhnuah farasih hna le nawlbiacawnpiaktu hna chungin mi zeimaw, Jerusalem khua in an ra. 2Cu hna nih, a lamkaltu cheukhat nih kut thur he rawl an ei kha an rak hmuh i an sawi hna, a thûr timi cu kut ṭawllo kha a si. 3Zeitintiah farasih le Judah mi vialte nih upa hna phunglam kha fek tein an i tlaih caah, ṭha tein kut an ṭawl hlanah rawl an ei bal lo. 4Market in inah an ṭin tik zongah an i kholhṭawl ta lo ahcun an ei bal lo. Zulh ding hrimhrim ah an i chanhchinmi zong tampi a um, hrai le bel, khêng le ṭhutdanh hna kholhṭawl zong a si. 5Farasih le nawlbiacawnpiaktu hna nih, “Zeiruangahdah na zultu hna nih upa hna phung buarin kut ṭawl loin rawl an ei?” tiah an hal. 6Anih nih, “Isaiah nih, nannih mi depde hna kong a rak chimmi hi a dik ngaingai. ‘Hi mi hna nih an kâ in anka thangṭhat i an lungthin in an ka hlat. 7An i cawnpiakmi hi minung phung men a si i ankâ biakmi hi pakpalawng a si.’ 8Zeitintiah Pathian nawlpêk zei rel loin, minung phung nan i tlaih, hrai le ûmkhêng ṭawl le thil dangdang hna zong fekṭhup in nan i tlaih,” tiah a ti. 9An sinah, “Nan phung tlaih nan i zuam ruangah Pathian nawlpêk tu nan hlawt. 10Zeitintiah Moses nih, “Nanu le napa upat hna! ‘anu le apa thangchiattu cu thi ko seh,’ tiah a rak ti. 11Asinain nannih nih, “Mi nih anu le apa sinah, nan ca i san ka tlaihnâk cu Korban a si cang” a ti ahcun (Korban ti cu Pathian sinah pêkchanh, tinâk a si) 12anu le apa bomh nan sian ti lomi hi. 13Cucaah nan i chanhchinmi nan phung ruangah Pathian bia hi sullam ngei loah nan canter tawn. Cubantuk cu tampi nan tuah,” tiah a ti. 14Mibu kha a sinah a kawh hna i, “Ka bia hi ngai ulaw, a sullam zong hngal tuah u; 15lenglei in minung paw chung i a lutmi nih mi a thûrter bal lo; minung chungin a rak chuakmi tu kha mi a thûrtertu cu a si. 16Theihnâk ding i hna a ngeimi pauh nih thei seh,” tiah a ti. 17Mizapi kha in chungah a luhtâk hna hnuah, a lamkaltu nih tahchunhnâk sullam kha an hal. 18An sinah, “Nannih zong nih nan theithiam hlei lo maw? lenglei in minung paw chung i a lutmi zeihmanh nih minung a thûrter kho lo, 19a lungthin chungah lut loin a pawpi ah a lut i êknâk ah a chuah ṭhân caah, ei ding vialte a thiang cang, timi hna hi nan thei thiam lo maw? 20Cun anih nih, “Minung chunglei in a chuakmi nih, cu nih cun minung cu a thûrter tawn. 21Zeitintiah chunglei minung lungthin chungin khuaruahnâk sual kha a rak chuak tawn, ṭangdang kainâk, nupa sualnâk, lainawnnâk, 22firnâk, hngarnâk, Ṭhatlonâk, hlennâk, hornâk, hnahchuahnâk, thangchiatnâk, porhlawtnâk le hruhnâk hna hi; 23cu thil vialte cu chunglei in a rak chuak i minung kha a thûrter tawn,” tiah a ti. 24Cu hmun cun a tho i Tair le Sidon ramah a kal. Inn pakhat ah a lut i a um tiah ahohmanh hngalh a duh lo, asinain â thuplan kho lo. 25Minu pakhat a fanu thlarau thur nih a tlaihmi nih a rak hngalh; a ra i a ke hramah a bawk. 26Nu cu Grik mi a si i Syro-Foinisiami in a chuakmi a si, anih nih a fanu chung i khuachia ṭhawl dingin a rak nawl. 27Asinain Jesuh nih, “Fa le hi an paw khim hmasa seh, zeitintiah fa le rawl lâkpiak i uico pêk cu a ṭha hnga maw?” tiah a ti. 28Anih nih, “A si ko, Bawipa, asinain, cabuai tang i uico nih fa le rawl ṭilfuan cu an ei tawn ko,” tiah a leh. 29Anih nih, “Cucu na chim cang bangin, kal kun, khuachia nih na fanu a chuahtâk cang,” tiah a ti. 30Cun inn a phâk tikah, a fanu cu khuachia nih a rak chuahtâk cang i ihkhun i a ih kha a va hmuh. 31Cuticun Tair le Sidon ram kha a chuahtâk ṭhân i Dekapolis ram lan in Galili Rili kha a phân. 32Cuka ah mi pakhat hnachêt, holh fianglo kha a sinah an ratpi i a cungah kut chuan dingin an nawl. 33Cupa cu mizapi sinin a dangah a kalpi i a kutdong in a hna kua kha a tonghpiak, cun a cil a châk i a lei kha a tonghpiak ṭhân, 34Van lei a zoh i thaw a lâk hnuah a sinah, “Ephatha” tiah a ti, cucu “Rak i ong cang” tinâk a si. 35Chikkhatteah a hna cu a awng, a lei ṭemnâk kha a poih i fiang tein a holh kho. 36Cun a sinah, ahohmanh chim hlah, tiah nawl a pêk, asinain fak piin an aupi chinchin. 37Mak an ti ngaingai i, “Anih nih cun thil vialte hi a ṭhatter dih a si ko hih. Hnachetmi hna a awnter i holh kho lomi zong a holhter hna,” tiah an ti.

Currently Selected:

MARKA 7: HAKABSI

Highlight

Copy