MATTHAI 23

1Cuticun Jesuh nih a lamkaltu le mizapi sinah bia a chim i 2“Nawlbiacawnpiaktu le Farasih hna cu Moses ṭhutdanh ah an ṭhu. 3Cucaah tuah dingah an chimmi pauh cu tuah ko u. Asinain an tuahmi cu tuah ve hlah u, zeitintiah an chim i an tuah fawn lo. 4Zeitintiah thilrit ngaimi an tuah i mikha an phorhter hna, anmah tu nih an kutdong par hmanh in an tawng duh fawn lo. 5An tuahmi vialte cu minung hmuh ding lawngah an tuah. An bânbunh le an calkhimhmi an puamter i an angki fual an bawrhter. 6Rawl dangh nâkah ṭhutnâk ṭha bik, sinagog ah ṭhutdanh sâng bik, 7chawdawr hmun i kuttlaih le, ‘Rabi, Rabi, tiah kawh kha an tlaihchan. 8Asinain nan nih cu, ‘Rabi’ i ti hlah u; zeitintiah Cawnpiaktu pakhat lawng lawng nan ngei, Krih Amah lawng lawng hi, nan dih lakin unau nan si. 9Leicungah hin ahohmanh ‘Kapa’ ti hlah u; zeitintiah nan Pa cu pakhat lawng lawng a si i van i a ummi khi a si. 10Cawnpiaktu, tiah i ti hlah u; zeitintiah Cawnpiaktu pakhat lawnglawng nan ngei, ‘Krih’ lawng hi a si. 11Nan lakah lianngan bik cu nan rianṭuantu ah a um deuh awk a si. 12Amah le amah â santermi pauh ṭhumh an si lai i amah le amah â ṭhummi pauh santer an si lai. 13Nannih nawlbia cawnpiaktu le Farasih depde hna, ngaihchia nan va si dah! Zeitintiah vanbawi pennâk kha mi nan kharkanh hna, nanmah le nan lut duh lo, luh a duhmi zong nan kham hna. 14Nannih nawlbiacawnpiaktu le Farasih depde hna, ngaihchia nan va si dah! Zeitintiah nuhmei chawva nan lâk piak hna i zapi hlen nâkah ngol hngal loin thla nan i camter. Cucaah thiam lo fak chin chin in nan co te lai. 15Nannih nawlbiacawnpiaktu le Farasih depde hna, ngaihchia nan va si dah! Zeitintiah mi pakhat zumtu siter dingin rili le fingtlang nan ṭol dih, zumtu i nan sermi kha nanmah nâk leh hnih in hell fa ah nan canter ṭhân. 16Nannih hruaitu mitcaw hna! Ṭempal chalh in biakam cu zeihmanh a si lo, asinain ṭempal i sui chalh i biakammi tu tlinter ding a si titu hna, ngaihchia nan va si dah! 17Nan nih mihrut le mitcaw hna! Sui maw biapi deuh sui thiantertu ṭempal cu dah? 18Biakṭheng chalh i biakam cu zeihmanh a si lo, a cung i pêkchanhmi chalh i biakam kha tlinter ding a si, titu hna, 19Mihrut le mitcaw hna, thil pêkmi maw biapi deuh thilpêk thiantertu biakṭheng cu dah? 20Biakṭheng chalh i mi nih bia a kam ahcun a cung i pêkchanhmi zong â tel dih cang. 21Ṭempal chalh i biakamtu zong nih a chung i a ummi chalh in bia â kam chih tawn. 22Van chalh in bia â kammi nih Pathian Bawi ṭhutdan i a ṭhumi chalh in bia â kam tawn. 23Nannih nawlbiacawnpiaktu le Farasih depde hna, ngaihchia nan va si dah! Zeitintiah puṭinan, hamhhuai le aithing tiangin cheuhra cheukhat nan pêk, a biapi deuhmi nawlbia dinnâk, zângfahnâk le zumhnâk te hna nan thlah dorh fawn ṭung. Hi hna hi pei nan tuah deuh awk a si cu, a dang zong kha thlahdorh hlei lo in. 24Nannih hruaitu mitcaw, hmaisem a zeng i kalauk a dolhtu hna. 25Nannih nawlbiacawnpiaktu le Farasih depde hna, ngaihchia nan va si dah! Zeitintiah kheng le hrai a leng lei nan ṭawl i a chung lei tu cu ziarngeihnâk le nun thladorh nâkin a khat. 26Nang Farasih mitcaw, hrai le kheng chunglei kha ṭawl hmasa, cuticun a lenglei zong a thiang lai. 27Nannih nawlbiacawnpiaktu le Farasih depde hna, ngaihchia nan va si dah! Zeitintiah ṭamhmi thlân, lenglei dawh ngai, asinain a chungah mithi ruh le a thurmi bantuk khi nan si. 28Nannih zong lenglei mi hmuh nâkah mifel ngai nan lo, nan chung lei cu depdetnâk le nawlbuar nâkin a khat fawn. 29Nannih nawlbiacawnpiaktu le Farasih depde hna, ngaihchia nan va si dah! Zeicatiah Profet thlân nan ṭamh i miding hna thlân nan ṭamh, 30kan pu le chanah rak um u sih law, Profet an thah nâkah kan i tel hnga lo, nan ti tawn. 31Profet hna thattu tefa nan si zia nan langhter chin chin. 32An hringsor tuhna sual tahnâk hrai cu khahter law law u. 33Rul hna, rul fale hna, hremhmun hremnâk cu zeitindah nan luat khawh lai. 34Cucaah nan sinah, profet hna le, mifim hna le, nawlbiacawnpiaktu kha ka rak thlah hna lai, cheukhat nan rak thah hna lai i vailamah nan tah hna lai, cheukhat sinagog ah nan velh hna lai, khua kipah nan rak serhsat ṭhân hna ko lai. 35Abel midingpa thisen thawkin ṭempal le biakṭheng karlak i Barakiah fapa zekariah nan thahmi thisen tiang khan, miding nan thahmi thisen vialte kha nanmah cungah a tla te lai. 36Biataktein kan chimh hna, cu thil vialte hna cu atu chanmi hna cungah a phân te lai. 37Maw Jerusalem, Jerusalem! Profet hna thattu, na sin i thlahmi lungin a rak cheptu, Arpi nih a thla tangah a fale a huh bantukin, voi zeizatdah na fale huhphenh ka timh hna, asinain na duh fawn lo. 38Zohhmanh na inn cu a lawngin kaltâk a si te lai. 39Bawipa min i a rami cu thangṭhat si ko seh, nati hlan pauh atu thawkin naka hmu ti lai lo,” tiah a ti hna.

Currently Selected:

MATTHAI 23: HAKABSI

Highlight

Copy