LUKA 11

1Hitihin a si, hmun pakhat ah thla a cam i a dih tikah lamkaltu lak i mi pakhat nih, “Bawipa, Johan nih a zultu hna kha thlacam a cawnpiak bantuk khan thlacam ning kan cawnpiak,” tiah a ti. 2Anih nih, “Hitihin thla cam u, van i a ummi kan Pa, na min thianghlim seh, na pennâk cu tlung ko seh, van i naduhnâk an tuah bangin, leiah tuah si ve seh, 3Ni fa tein rawl kan pe. 4Kan sualnâk kha kan ngaithiam ko. Zeitintiah kan nih zong nih kan leiba kha kan ngaihthiam hna. Tukforhnâk chungah kan luhpi hlah. Misual sinin kan khamh tuah,” tiah a ti. 5An sinah, “Nanlak ah pakhat khat nih hawi ngei u law, zanṭim ah a sinah kal in, ka kawi, changreu pathum in ka coih tuah, 6zeitintiah ka hawipa nih a ka tlawng i pêk awk zeihmanh ka ngei lo, ti seh law, 7inn chungin, hna kan hnawh hlah, atu cu inkâ kan hrenh cang i ka fale hna he kan it dih cang, tho in kan pe kho ti lo,” ti hmanhsehlaw, 8kan chimh hna, a hawi a si ruangah tho in vape hlah hmanhsehlaw a hal lengmang caah, a tho lai i a duh zat cu a va pêk ko lai. 9Kan chimh hna, hal uh, pêk nan si lai, kawl uh, nan hmuh lai, king uh, onpiak nan si lai. 10Zeitintiah a halmi pauh nih an co, a kawlmi nih an hmuh i a kingtu pauh cu onpiak an si lai. 11Nannih patung hna lakah nan fapa nih changreu in hal sehlaw ahodah lung a pe hnga, asiloah, nga in hal sehlaw, ahodah rul a pe hnga? 12Asiloah arti in hal sehlaw, ahodah tlâng ngaikuang a pe hnga? 13Nannih misual hmanh nih nanfa le thilṭha pêk nan hngalh ahcun, van i nan Pa nih a haltu sinah Thiang thlarau a pêk lai ning cu,” tiah a ti. 14Cun a holh kholo mi khuachia pakhat kha a ṭhawl. Cun khuachia kha a chuah le cângkâ holh kholo cu a holh kho i mizapi nih mak an ti ngai ngai. 15Asinain mi cheu khat nih, “Khuacia bawi Belzebud thawngin dah kaw khuachia a ṭhawl ko hna cu,” tiah an ti. 16Cheukhat nih Amah hneksaknâk ah van lei in hmelchunhnâk kha an hal. 17Anih nih an ruahnâk kha a hngalh i, “Anmah le anmah â dohmi pennâk cu rauh tak a si tawn. Chungkhar â dohmi zong a rawk tawn. 18Satan zong amah le amah â doh ahcun zeitindah a pennâk a dir khawh lai? Nannih nih Belzabud ruang i khuachia dawiah nan ka ruah. 19Keinih Belzebub ruang i khuachia ka dawi ahcun, nan fa le nih aho ruangah dah an dawi tawn? Cucaah nan kong hi an mah ceih awk a si. 20Sihmanhsehlaw keinih Pathian kut i khuachia ka dawi a si ahcun Pathian pennâk nan sinah a phân cang tinâk a si. 21“Mi ṭhawng nih, ralthuam tling he a inn a ven chung pauh cu, a thilri cu an him ko lai. 22Asinain a mahnâk ṭhawngdeuh a rat i a rak tei ahcun â kilvennâk ralthuam vialte cu a chuh lai i hranchaw kha a phawt dih hna lai. 23Keimah lei i aṭang lomi cu aka doh i aka pumhpi lomi nih a ṭhek. 24Thlarau thur cu mi chungin a chuak i dinhnâk kawlin ti um lonâk ah a vak lengmang i dinhnâk hmun a hmu kho lo. Ka chuahnâk ka innah ka kir ṭhân ko lai, tiah a ti. 25Cun a kir tikah cu inn cu thiang te le rem tein a um. 26Cuhnuah a va kal ṭhân i amahnâk i a sual deuhmi khuachia pasarih a ratpi, cuka ah an lut i an um peng, cu minung nunning hmadung cu a hmasa nâkin a sual chinchin, tiah a ti. 27Cubia cu a chim lio ah mizapi chungin nu pakhat a rak au i, “Nangmah pawinâk nauin le nadin mi hnuk cu a van ava ṭha dah,” tiah a ti. 28Anih nih, “Pathian bia a thei i â nunpimi hna hi, mi vanṭha an si deuh,” tiah a ti. 29Cun mizapi kha a zual in an i zual i an i pumh lio ah, “Tuchan ṭhangthar hna hi mi ṭhalo ngai an si. Hmelchunhnâk an kawl tawn. Jonah hmelchunhnâk dah tilo cu hmelchunhnâk dang pêk an si lai lo. 30Zeitintiah Jonah cu Nineveh khuami caah hmelchunhnâk a si bantuk khan Mi fapa zong hi atu chanthar hna caah hmelchunhnâk a si ve lai. 31Chimlei bawinu kha biaceih ni ah atu chanthar hna sinah a tho ve lai i thiam lo a coter hna lai, zeitintiah a nih cu Solomon fimnâk ngai dingin van hram dengin a ra. Solomon nâk i a ngan deuhmi hika ah hin a um dah kaw. 32Nineveh mi hna zong kha, biaceih ni ah atu chanthar hna sinah an rak thoṭhân lai i thiamlo an coter hna lai, zeitintiah Jonah phungchimmi ruangah an i ngaihchih. Jonah nâk ngan deuh hika ah a um taktak dah kaw. 33Ahohmanh nih meiin an van tikah a kirkhawr ah siseh, ûm chungah siseh an chia ballo. Inn chung i a lutmi hna nih a ceu an hmuh khawh nâkhnga a chiahnâk ah an chiah tawn. 34Pum meiin cu mit hi a si. Cucaah na mit a ṭhat ahcun napum puluk in a ceu dih lai. Na mit a rawk ahcun napum cu a dihlak in a mui lai. 35Cucaah nanmah i ceu cu mui a si sual nâkhnga lo i ralring u. 36Na pumpuluk cu ceunâk in a khah ahcun, a ceu ngai ngaimi meiin nih a ceuhmi bantukin na pum cu ceuhdih a si ko lai. 37A chim lio ah farasih pakhat nih rawl ei a sawm. Cuticun a lut i rawl cu a dûm. 38Rawl ei lai ah akut a ṭawl lomi kha a hmuh tikah Farasih pa nih mak a ti ngai ngai. 39Bawipa nih, “Nannih Farasih hna nih hrai le khêng lênglei kha thiang tein nan ṭawl tawn, asinain nan chunglei cu hakkauhnâk le sualnâk in a khat. 40Mihrut hna! lenglei Sertu nih chunglei zong a ser lo maw? 41Nan ngeih ciami in mi sifak hna bawm hna ngat u, cuticun nan caah zeizong vialte a thianghlim cang lai. 42Nannih Farasih mi hna, ngaihchia nan va sidah. Zeitintiah puṭinan, khamhhmuai le thlai phunkip kha cheuhra cheukhat nan pêk, diknâk le Pathian dawtnâk kha zeiah nan rel fawn lo. Hi hna hi pei nan tuah deuh awk a si cu, a dang zong daithlanh hlei loin. 43Farasih hna, ngaichia nan va si dah. Zeitintiah Sinagog ah hmaichuang i ṭhut le, chawdawr hmun i kuttlaih kha nan uar. 44Nannih nawlbiacawnpiaktu le Farasih mi depde hna, ngaihchia nan va si dah. Zeitintiah mi nih a tangah thlan a um ti hngal lo i a kalnâk he nan i lo, tiah a ti. 45Cuhnuah nawlbia hngaltu pakhat nih a sinah, hi na sîk hna nâk bia nih kan nih zong a kan hnawr ve, a si lo maw?” tiah a ti. 46Anih nih, “Nawlbia hngaltu hna nannih zong ngaihchia nan va si dah, a rit ngaimi thil le harnâk cu mi cungah nan chawnh luaimai, cu thilrit cu nan kut dong par hmanh in tongh nan duh lo. 47Nan caah ngaihchia a va si dah! Zeitintiah profet hna thlân kan remh nan ti, an hringsortu hna thahmi an si. 48Cucaah nan pupa hna tuahmi cu nan hngalhpi hna i nan hnatlâkpi tinâk a si, annih nih an thah, nannih nih an thlân nan remh. 49Cucaah Pathian fimnâk zongnih hitihin a chim. ‘An sinah profet le lamkaltu kha ka thlah hna lai, a cheu an rak thah hna lai i a cheu an rak serhsat hna lai, 50cuticun vawleiser hramthawk in profet vialte thisen mawh cu atu chanthar hna sinah phorhter a si lai, 51Abel thisen an chuah ri in, ṭempal le biakṭheng karlak i Zakariah an thahmi thisen tiangin, a mawh cu atu chanthar hna sinah phorhter a si lai. 52Nannih nawlbia hngaltu hna, ngaihchia nan va si dah! Zeitintiah fimnâk tawh cu nan thuh. Nanmah le nan lut duh lo, luh a duhmi hna zong nan kham hna,” tiah a ti. 53Cubia an sin i a chim lio ah, nawlbia cawnpiaktu le farasih hna nih Amah cu fak piin sual an phawt, sawinâk ding ngia in an el leng mang, 54Amah sual an phawt khawh nâkhnga, a chimmi bia lila in foihter an timh i an bawh ko.

Currently Selected:

LUKA 11: HAKABSI

Highlight

Copy