JOHN 7

1Cu thil hna hnu ah Jesuh nih Galili ram a ṭol i Judah mi nih thah an timh ruangah Judia ramah a kal duh lo. 2Judah mi Deu Thô kha a nai cang. 3A unau hna nih, “Hika hin Judia ramah va kal, na zultuhna nih na tuahmi hi an hmuh khawh nâkhnga. 4Zeitintiah mah minthannâk a kawlmi nih a thli in thil an tuah bal lo. Hi thil hna hi na tuah taktak ahcun vawlei hmai ah va langhter ngat,” tiah an ti. 5Zeitintiah a unau le hmanh nih Amah kha an zum lo. 6Jesuh nih, “Ka cân a phân rih lo, nannih cân tu cu phanh lo cân a um lo. 7Vawlei nih nannih an in hua kho hna lo, an tuahmi Ṭhatlonâk kha ka hngalhter tawn hna caah kei tu cu an ka huat. 8Nannih Thô ah vakal u, kei cu hi Thô ah hin ka kal rih lai lo, ka cân a phanh rih lo caah,” tiah a ti hna. 9Cubia a chim lio ahcun Galili ah a um ko rih. 10Asinain a unau hna thô i an kal hnu ah, anih zong lang lo dingin a thlithup in a kal. 11Cuticun Judah mi nih tho ah an kawl, “Khuazeiahdah a um?” tiah an ti. 12Amah kongah mizapi an i caih len i a cheu nih, “Mi ṭha a si,” an ti. A cheu nih, “Si hlah, mizapi a hlen tawn,” tiah an ti. 13Judah mi an `ihruangah langhngan in a konglam an chim ngam lo. 14Thô laifang ah Jesuh cu ṭempal ah a kal i a cawnpiak hna. 15Judah mi nih, “Hi pa hi cawng loin zeitindah ca a thiam khawh?” an ti i mak an ti ngai ngai. 16Jesuh nih a leh hna i, “Ka cawnpiakmi bia hi keimah ta a si lo, aka thlahtu ta a si. 17Amah duhnâk tuah a duhmi pauh nih ka cawnpiakmi hi Pathian sin in maw a si, keimah ṭawnchawm dah a si a hngalh ko lai. 18Mah ṭawnchawm a chimtu nih amah sunparnâk a kawl, sihmanhsehlaw a thlahtu sunparnâk lawng a kawltu cu midik a si i Amah ah dinlonâk zeihmanh a um lo. 19Moes nih nawlbia an pe hna lo maw? Asinain nan lakah a zulmi pakhat hmanh nan um lo. Zeiruangahdah thah nanka timh?” tiah a ti. 20Mizapi nih an leh i khuachia nih an tuah ko hih. Ahonihdah thah an in timh? tiah an ti. 21Jesuh nih, “Rian pakhat ka ṭuan i nan dihlak in mak nan ti. 22Hi ruangah dah kaw Moses nih cuarpar tannâk kong an pêk hna cu. Moses chuahtermi a si lo, hringtu pa hna chuahtermi a si. Sabbath ni zongah cuanpar nan tan fawn. 23Mi nih Sabbath ni ah cuarpar a tan i Moses nawlbia buar a si lo ahcun, Sabbath ni i mi ka damter ruangah ka cungah nan thin a hung lai maw? 24“A langhning lawngin thil hi zohhlah u, dik le fel tein ruat tuah u.” tiah a ti. 25Jerusalem i mi cheukhat nih, “Hipa hi maw thah an timhmi pa cu? 26Zohhmanh u, ralṭha in bia a chim ko ṭung, zeitihmanh in an ti fawn lo. Hotu hna zong nih Krih a si taktak hi an hngalh cang dahra? 27Asinain kannih nih hipa hi a chuahnâk tiangin kan hngalh dih fawn,” tiah an ti. 28Cuticun ṭempal i a cawnpiak lio ah Jesuh a au i, “Nanka hngalh, ka chuahnâk tiangin nan hngalh. Asinain keimah nawl i a rami ka si lo. Aka thlahtu hi mi taktak a si i Amah cu nan hngal lo. 29Asinain Amah cu ka hngalh, Asin in a chuakmi ka si i Amah thlahmi ka si,” tiah a ti. 30Cucaah tlaih an timh, asinain a cân a tlin lo caah ahohmanh nih kut in an tawng lo. 31Mitampi nih Amah cu an zumh i Krih a rak phâk tik zongah, Hi pa nâkin hmelchunhnâk tam a tuah hlei hnga maw?” tiah an ti. 32A kong i mizapi an i caih len kha Farasih hna nih an rak theih, cuticun Farasih hna le tlângbawi hna nih Amah tlaitu dingah palik kha an thlah. 33Jesuh nih, “Cân tawi te nan sinah ka um rih lai, cu hnu ah aka thlahtu sinah ka kir cang lai. 34Nannih nih nanka kawl lai i nanka hmu lai lo, ka umnâk zongah nan ra kho lai lo,” tiah a ti. 35Cuticun Judah mi an i caih i kan hmuh lo dingin hipa hi khawzei kal dah a timh hnga? Grik mi hna sin i â ṭhekmi hna sinah kal in, Grik mi cawnpiak a timh a si hnga maw? 36Nanka kawl lai i nanka hmu kho lai lo, ka umnâk zongah nan ra kho lai lo, a timi hi zeidah a sullam a si hnga?” tiah an ti. 37Thô ni donghnâk nisunglawi bik timi ah, Jesuh a dir i a au, “A ti a hâlmi pauh ka sinah ra seh law, ding seh. 38Cathiang nih a chim bangin aka zummi pauh cu a chungah tinung a luang lai, tiah a ti. 39Cubia cu Amah zumtu hna nih Thlarau an ngeihnâk ding a chimmi a si, Jesuh kha thangṭhat in a um rih lo caah Thiang Thlarau kha pêk a si rih lo.. 40Mizapi lakah mi tampi nih cu bia an theih tikah, “Hi pa hi profet a si hrimhrim ko,” tiah an ti. 41Midang nih, “Hihi Krih cu a si,” tiah an ti. Cheukhat nih, “Krih cu Galili ram in a rak chuak hnga maw? 42Krih cu David hrinthlâk in, David khua Bethlehem ah a chuah awk a si tiah Cathiang nih a chim ko lo maw?” tiah an ti. 43Cuticun Amah ruangah zapi lakah ṭhennâk a um. 44Cuhnuah a cheu nih tlaih an duh, asinain ahohmanh nih an kut in an tawng lo. 45Palik hna cu Farasih le tlângbawi sinah an ra i, “Zeiruangahdah nan rat pi lo?” tiah an rak ti hna. 46“Khipa bantukin ahohmanh nih bia an chim bal lo,” tiah an leh hna. 47Farasih hna nih, “Nan nih zong an hlenve cang hna mu,” 48Hotu hna le Farasih mi lakah Amah zumtu pakhat tal an um cang maw? 49Hi mizapi, nawlbia zong a hngal lomi hna hi, chiatserh dah kaw an si cu,” tiah an ti. 50Nikodimu (zan i Jesuh sin i a rami, anmah lak i pakhat) nih an sinah, 51“A tuahmi le chimmi theih hlanah, kan nawlbia nih mi thiamlo a coter kho maw?” tiah a ti. 52Annih nih, “Galili mi maw na si ve? zoh law, hlat, Galili in profet an chuak bal maw?” tiah an ti. 53Cun mikip an in cio ah an ṭin.

Currently Selected:

JOHN 7: HAKABSI

Highlight

Copy