JOHN 1

1A hramthawk ah Bia a um, Bia cu Pathian sinah a um, Bia cu Pathian a si. 2Amah cu a hramthawk in Pathian sinah a um. 3Zeizong vialte hi Amah in ser a si, sermi vialte hi Amah lo in sermi zeihmanh a um lo. 4Amah ah nunnâk a um, cu nunnâk cu minung hna ceunâk a si. 5Ceunâk cu muihnâk ah a ceu i muihnâk nih cucu a hngal lo. 6Pathian thlahmi pakhat a um i a min cu Johan a si. 7Cupa cu hngalhpitu ah a ra, ceunâk bia cu hngalhpitu le, amah thawngin mi vialte nih an zumh nâkhnga. 8Cupa cu ceunâk cu a si lo. Ceunâk bia hngalhhpitu ah a rami a si. 9Ceunâk taktak mikip ceuhtu cu vawlei ah hin a ra lio. 10Amah cu vawlei ah a um cang i vawlei hi Amah in ser a si, vawlei nih Amah cu a hngallo. 11Ami hna sinah a ra i ami hna nih an rak cohlang lo. 12Asinain Amah cohlangtu pauh cu Pathian fa i cannâk nawl kha a pêk hna, Amin a zumtu hna cu. 13Cu hna cu thisen i hrin an si lo, pumsa duhnâk i hrin an si lo, pa duhnâk i hrin an si lo, Pathian hrin an si. 14Bia cu titsa ah â cang i kan sinah khua a sa, a sunparnâk kan hmuh. Pa Fa ngeihchun sunparnâk bantukin, zângfahnâk le biatak in a khat. 15Johan nih aw chuah in a hngalhpinâk bia a au pi i, “Ka hnu i ara hngami nih aka chawhkanh cang, zeitintiah Amah cu ka hmai i a rak um cangmi a si, tiah a kong ka chimmi kha Amah hi a si,” tiah a ti. 16A tlamtlinnâk kan co cio, zângfah hnu i zângfah chinnâk he. 17Zeitintiah nawlbia cu Moses hmangin pêk a si, asinain zângfahnâk le biatak cu Jesuh Krih in a um. 18Zeitikhmanh ah Pathian cu ahohmanh nih an hmu ballo. Fapa ngeihchun, Pa `angchungah a ummi nih Amah cu a phuan cang. 19Judahmi hna nih Jerusalem khua in an tlângbawi hna le levi mi kha Johan sinah an thlah i “Mi zeidah na si” tiah an hal tikah Johan nih; 20zeihmanh phehlo tein â phuang i, “Krih ka si lo,” tiah a rak ti hna. 21Annih nih, “A si ah, ahodah na si kun, Elijah na si maw? tiah an hal. Anih nih, “Ka si lo,” tiah a ti. Profet na si maw? an ti i “Ka si lo” tiah a leh hna. 22Annih nih, “Ahodah na si kun? A kan thlahtu sin i kan chim khawh nâkhnga, na kongah zeidah na chim lai? tiah an ti. 23Anih nih, “Profet Isaiah nih a rak chim bangin, ‘Bawipa lam dinter u,’ tiah ramcar i au aw kha ka si,” tiah a ti. 24An thlahmi cu Farasih an si. 25Cun a sinah, “Krih, Elijah, profet na silo ahcun zeiruangahdah Baptisma na pêk? tiah an hal. 26Johan nih a leh hna i keinih tiin Baptisma kan pêk hna, asinain nan lakah mi pakhat nan hngalh lo in a dir ko. 27Amah hi a si, ka hnu i a ra ding, keimah nâk i a ngan deuhmi cu; a kedan hri phoih awk hmanh ah kâ tlak lo,” tiah a ti. 28Cu thil hna cu Jordan varal Bethabara khua Johan nih Baptisma a pêknâk hmun ah a cangmi a si. 29A thaizingah Johan nih Jesuh asin i a rat kha a hmuh i, “Zohhmanh u! Pathian Tuufa, vawlei sualnâk a kalpitu khi! 30Khipa khi dah kaw, ka hnu in a rami, keimah nâk ngan deuh, ka um hlan hmanh i a um cangmi,” tiah ka chimmi kha. 31Amah cu ka rak hngal lo, asinain Israel mi hna sin i langhter a si khawh nâkhnga, ti i Baptisma pêk awkah ka ra,” tiah a ti. 32Johan nih hitihin a bia a hngalhter, “Thlarau cu thuro bangin van in a ṭum kha ka hmuh i a cungah â fu. 33Amah cu ka rak hngal lo, asinain ti i baptisma pêk aka fialtu nih ka sinah, “A cungah Thlarau a ṭum i a cungah â futnâk na hmuhmi kha cu Pa cu Thiang thlarau i Baptisma petu ding cu a si lai, a ka ti. 34Ka hmuh cang i hihi Pathian Fapa a si kha ka hngalhter cang,” tiah a ti. 35A thaizingah Johan cu a zultu pahnih hna he an dir. 36Jesuh â chawleh kha cuan in, “Zohhmanh u! Pathian Tuufa khi,” tiah a ti. 37Lamkal pahnih nih an chimmi kha an theih i Jesuh cu an zulh. 38Jesuh nih amah an zulh ti kha a hmuh, â mer i an sinah, “Zeidah nan kawl,? tiah a ti. Annih nih, “Rabbi (cucu Cawnpiaktu tinâk a si ) khuazeiahdah na um?” tiah an ti. 39Anih nih, “Ra u law, nan hmuh lai,” tiah a ti hna. An ra i a umnâk ah an hmuh, cuni cu chun nitlak a sinah an um( cucu zanlei suimilam pali tiang hrawng a si). 40Johan chimmi an theih i Jesuh a zultu pahnih lak i pakhat cu Andria, Simon Peter unau a si. 41Anih nih a hmasa bik ah amah unau Simon a hmuh i a sinah, “Mesiah” (cucu Krih tinâk a si) kan hmuh tiah a ti. 42Cun amah cu Jesuh sinah a ratpi, Jesuh nih a rak zoh i, “Jonah fapa Simon na si, Kifa an in ti cang lai,” tiah a ti. (cucu lungtum tinâk a si ) 43A thai zingah Jesuh cu Galili ramah kal a duh, cun Filip kha a hmuh i, “Ka zul” tiah a ti. 44Filip cu Bethsaida khuami a si, cucu Andria le Peter umnâk khua zong a si. 45Filip nih Nathanael a hmuh i, “Akong Moses nawlbia le Profet hna nih an rak ṭialmi, Nazaret Jesuh, Josef fapa cu kan hmuh cang,” tiah a ti. 46Nathanael nih, “Nazaret khua in thilṭha a chuak kho maw?” tiah a ti. Filip nih a sinah, “Rakzoh hmanh,” tiah a ti. 47Jesuh nih Amah a rak panhtu Nathanael cu a hmuh i a kong a rak chim, “Zohhmanh u, Israel mi taktak, hleithawinâk a ngeilo pa khi,” tiah a ti. 48Nathanael nih, “Zeitindah naka hngalh?” tiah a ti. Jesuh nih, “Filip nih an auh hlan i theipi kung tang i na um lio ah kan hmuh cang.” tiah a leh. 49Nathanael nih, “Rabbi, Pathian Fapa na si! Israel Siangpahrang na si,” tiah a leh. 50Jesuh nih, “Theipi kung tangah kan hmuh ka ti ruangah maw na zumh? Hi nâk in a ngan deuhmi thil zong na hmuh te lai,” tiah a ti. 51Anih nih, “Biataktein, biataktein kan chimh, hi hnu ah, â ong mi vanah, Pathian vanmi Mi Fapa cung i an ṭum an kai kha nan hmuh te lai,” tiah a ti.

Currently Selected:

JOHN 1: HAKABSI

Highlight

Copy