ACT 11

1Lamkaltu hna le unau dang, Judia ram i a ummi hna nih Gentel mi zong nih Pathian bia an pom ve nâk kong kha an theih. 2Peter cu Jerusalem khua a phâk tikah cuarpar tanmi hna nih an rak chalh i, 3“Cuarpar tan lomi innah na lut i rawl na ei,” tiah an ti. 4Asinain Peter nih a hramthawk in â chang thliahmah in thil umtuning kha a chimh hna. 5Joppa khua ah thla ka cam, mangcang hlanin ka um i langhnâk ka hmuh, bawm, puan nganpi i khihmi van in an run `humhmi kha ka hmuh i ka pawngah a um. 6Cu thil cu zeidah a si hnga tiah ruahpah in ka zoh i lei cung i ke pali ngei saṭil hna le, ramsa hna le, a lawn in a lawnmi hna le vanva kha ka hmuh hna. 7Aw nih, ‘Peter, tho, that law, ei,’ tiah a ti. 8Asinain keinih, ‘Eihlah ê, Bawipa! Zeitintiah a thiang lomi le a thûrmi ka kâ ah a lut bal lo,’ tiah ka ti. 9Asinain van i aw nih avoi hnihnâk ah, ‘Pathian nih a thianter cangmi kha, nangnih a thiang lo ti hlah,’ tiin a ka leh. 10Cubantuk lawngte in voithum tiang a um i thil vialte cu vanah kaiter in a um ṭhân. 11Cu lio ah ka tlunnâk inn hmai ah mi pathum Sisaria i a ka autu dingah thlahmi an rak dir cang. 12Cuticun Thlarau nih lungawṭawm lo tein anmah zul cawlh dingin a ka thlah. Hi unau paruk hna zong nih anka zulh i an innah kan lut. 13Cun cupa nih kan sinah, a inn chung i vanmi a hmuhning le a sinah Joppa khua ah mi thlah law, Simon Peter va ṭhi hna seh, 14anih nih bia an chimh hna lai i cu pa chimmi thawngin nang le na inchungkhar hna cu khamhnâk nan hmuh lai, a timi kha anka chimh. 15Phungchim ka hun thawk i a hlan ah kan cung i a rak phanh bantuk khan Thiang Thlarau a rung phân. 16Cuticun Bawipa bia, “Johan nih tiin baptisma an pêk hna i nannih cu Thiang Thlarau in baptisma nan in lai a timi kha ka hun hngalh ṭhân. 17Cucaah Bawipa Jesuh kan zumh tikah Pathian thilpêk kan comi bantuk kha an sinah pêk a si ve ahcun kei nih hin Pathian cu ka el kho hnga maw? tiah a ti. 18Cu bia cu an theih tikah an dai i, “Cutiasiahcun Pathian nih Gentel mi zong nung dingin ngaihchih a sian ve hna a si cu,” tiah Pathian an thangṭhat. 19Steven kong ah serhsatnâk a ummi ruangah â ṭhekmi hna kha, Foinisia ram le, Saiparas tikulh le Antiok khua tiangin an kal i Judah mi sin dah ti lo aho sin hmanh ah bia kha an chim lo. 20Asinain an lak i cheukhat cu Saiparas tikulh le Sairin khua mi an si i cu mi hna cu Antiok khua an phâk tikah, Grik mi hna sinah bia cu an chim i Bawipa Jesuh kong kha an chim. 21Bawipa kut nih a umpi hna i mi tampi nih an zumh i Bawipa leiah an i mer. 22Cu thawng nih Jerusalem kawhhran hnakhaw a phân, cun Barnabas kha Antiok khua tiangin an hei thlah. 23A phâk tikah Pathian zângfahnâk a hmuh tikah â lawm ngaingai, lungthin tak tein Bawipa i tlaih dingin thazâng a pêk hna. 24Zeitintiah amah cu miṭha a si i Thiang Thlarau le zumhnâk in a khatmi a si. Cuticun Bawipa sinah mi tampi an i chap. 25Cuhnuah Barnabas cu Saul kawl dingin Tarsus khua ah a kal. 26A hmuh tikah, Antiok khua ah a ratpi, kumkhat chung kawhhran hna he an i pawlkawm i mi tampi an cawnpiak hna. Antiok khua ah hin dahkaw zultu hna cu “Kristian” tiah hmasabik an ti hna cu. 27Cu cân ah profet mizeimaw Jerusalem khua in Antiok khua ah an kal. 28An lakah mi pakhat, a min Agabus timi a dir i, “Vawlei vialte ah mangṭam fak piin a tlung lai tiah Thlarau hngalhternâk bia a phuan. Cu mangṭam cu Klaudias Sizar a si lioah a rak tlung. 29Cuticun zultu hna nih an tikhawhtawk cio in Judia ram i unau hna sinah bomhnâk kuat an timh. 30Cuthil cu tlam an tlinter i Barnabas le Saul kut in upa hna sinah an kuat.

Currently Selected:

ACT 11: HAKABSI

Highlight

Copy