Romafoɔ 15

Monsɔ afoforɔ ani, na ɛnyɛ mo ho mmom

1 # Rom 14.1 Na yɛn a yɛyɛ den no, ɛsɛ sɛ yɛsoa wɔn a wɔnyɛ den no mmerɛyɛ na yɛansɔ yɛn ara ani. 2#1 Ko 9.19; 10.24; 10.33 Momma yɛn mu biara nsɔ ne yɔnko ani mma deɛ ɛyɛ, na n’ase atim. 3#Dwom 69.9 Na Kristo nso ansɔ ne ho ani, na mmom sɛdeɛ wɔatwerɛ sɛ: Wɔn a wɔbɔɔ wo ahohora no ahohora agu me so. 4#Rom 4.23-24; 1 Ko 10.11 Na biribiara a wɔatwerɛ ato hɔ no, wɔatwerɛ ama yɛn nkyerɛkyerɛ, sɛ yɛmfa boasetɔ ne twerɛ nsɛm no mu awerɛkyekyerɛ so nnya anidasoɔ. 5#Flp 3.16 Na boasetɔ ne awerɛkyekyerɛ Nyankopɔn mma monnwene adeɛ korɔ wɔ mo mu, sɛdeɛ Kristo Yesu kwan teɛ no, 6na mode akoma korɔ ne anokorɔ ahyɛ Onyankopɔn, yɛn Awurade Yesu Kristo n’Agya, animuonyam.

Kristo gye Yudafoɔ ne amanaman mufoɔ

7Enti monnye mo ho mo ho, sɛdeɛ Kristo nso agye yɛn ama Onyankopɔn animuonyam no. 8#Mat 15.24; Aso 3.25 Na mese: Kristo ayɛ twetiatwafoɔ somfoɔ de akyerɛ Nyankopɔn nokorɛ sɛ ɔbɛhyɛ bɔ a wɔahyehyɛ agyanom no mu den; 9#Rom 11.30; Dwom 18.49 na Nyankopɔn mmɔborɔhunu nti amanaman mufoɔ ahyɛ no animuonyam, sɛdeɛ wɔatwerɛ sɛ:

Yei nti mɛkamfo wo amanaman mu,

na mato dwom ama wo din.

10 # Deut 32.43 Na ɔkaa bio sɛ:

Mo amanaman mufoɔ, mo ne ne man nni ahurisie,

11 # Dwom 117.1 Na bio:

Mo amanaman mufoɔ nyinaa, monyi Awurade ayɛ,

na mo aman ahodoɔ nyinaa nkamfo no!

12 # Yes 11.10; Adi 5.5 Na bio Yesaia ka sɛ:

Yisai nhini ne deɛ ɔbɛsɔre

abɛdi amanaman so bɛba;

ɔno na amanaman ani bɛda ne soɔ.

13Na anidasoɔ Nyankopɔn mfa gyidie mu anigyeɛ ne asomdwoeɛ nyinaa nhyɛ mo ma, na moaboro so anidasoɔ mu, Honhom Kronkron ahoɔden mu.

Deɛ nti a Paulo de nnam retwerɛ krataa

14Me nuanom, megye to mu wɔ mo ho sɛ mo nso, papayɛ ahyɛ mo ma, na nimdeɛ nyinaa ayɛ mo ma tɔ, na motumi tutu mo ho fo nso; 15#Rom 1.5; 12.3 nanso deɛ enti a mede nnam bebrebe metwerɛɛ nsɛm yi bi mebrɛɛ mo ne sɛ, mede rebɛkae mo bio ne adom a Onyankopɔn de adom me, 16#Rom 11.13; Flp 2.17 sɛ menyɛ Yesu Kristo somfoɔ amanaman no mu, menkɔyɛ Nyankopɔn asɛmpa no ho asɔfodwuma, na amanaman mufoɔ nyɛ afɔdeɛ a ɛyɛ dɛ a wɔate ho Honhom Kronkron mu. 17Enti mewɔ Kristo Yesu mu ahohoahoa Nyankopɔn fam nnoɔma mu.

18 # 2 Ko 3.5; Rom 1.5 Na merensi me bo sɛ mɛbɔ biribiara din gye deɛ Kristo nam me so ayɛ ama amanaman mufoɔ setie wɔ asɛm ne adwuma mu, 19#Mar 16.17 nsɛnkyerɛnneɛ ne anwanwadeɛ tumi so, Honhom tumi so; na maka Kristo asɛmpa no awie firi Yerusalem ne nkuro a atwa ho ahyia so akɔduru Iliriko. 20#2 Ko 10.15-16 Nso faako a mebɔɔ mmɔden sɛ meka asɛmpa no nyɛ deɛ wɔabɔ Kristo din hɔ pɛn, na manto obi fapem so, 21#Yes 52.15 na mmom sɛdeɛ wɔatwerɛ sɛ:

Wɔn a wɔnkaa wɔn ne ho asɛm no bɛhunu,

na wɔn a wɔnteeɛ no bɛte aseɛ.

Paulo pɛɛ sɛ ɔkɔ Roma

22 # Rom 1.13 Yei na ɛtaa sii me kwan a enti mantumi amma mo nkyɛn. 23#Rom 1.10-11 Na afei, sɛ menni adwuma biara wɔ ha bio, na mfeɛ bebree na me kɔn dɔ sɛ meba mo nkyɛn nti, 24#1 Ko 16.6 da biara a mɛtu kwan makɔ Spania no, m’ani da so sɛ, mebɛfa hɔ a, mɛhunu mo anim, na sɛ megye m’ani kakra wɔ mo nkyɛn ansa a, moagya me kwan akɔ hɔ.

25 # Aso 18.21; 19.21; 20.22 Na seesei deɛ, merekɔ Yerusalem makɔsom ahotefoɔ no. 26#1 Ko 16.1; 2 Ko 8.1-4; 9.2; 9.12 Na Makedonia ne Akaia de fɛ aboaboa nnoɔma bi ano de rekɔma ahotefoɔ a wɔwɔ Yerusalem no mu ahiafoɔ. 27#Rom 9.4; 1 Ko 9.11 Ɛyɛɛ wɔn fɛ, nanso na wɔde wɔn ka; ɛfiri sɛ amanaman mufoɔ anya wɔn honhom mu nnoɔma no bi a, ɛsɛ wɔn nso sɛ wɔde honam mu nnoɔma bɛsom wɔn bie. 28Enti menya mewie adeɛ yi yɛ, na mede akyɛdeɛ no mema wɔn a, mɛfa mo nkyɛn makɔ Spania. 29#Rom 1.11 Na menim sɛ meba mo nkyɛn a, mɛba no Kristo asɛmpa nhyira mayɛ mu.

30 # 2 Ko 1.11; Flp 1.27; 2 Te 3.1 Nanso, anuanom, menam yɛn Awurade Yesu Kristo ne Honhom dɔ so mesrɛ mo sɛ monko me abia wɔ mpaeɛ a mobɔ Onyankopɔn ma me no mu, 31na wɔabɛyi me afiri asoɔdenfoɔ a wɔwɔ Yudea no nsam, na me som a merekɔsom Yerusalem no ayɛ ahotefoɔ no fɛ, 32#Rom 16.20 na menam Nyankopɔn pɛ so maba mo nkyɛn anigyeɛ mu, na me ne mo abɛdwodwo yɛn ho. 33Asomdwoeɛ Nyankopɔn ne mo nyinaa ntena. Amen.

Currently Selected:

Romafoɔ 15: ASW

Highlight

Copy