Lukas 5
5
Ɗai zi hitri na puɗu n'avut
Mat. 4.1-22; Mark. 1.16-20; Yoh. 5.35-47; 21.1-11
1Mefeŋ ktai, Yesu a ɗiya ɵimaɗi bal na Genezaret, firiɗi ɗai e tipisi sini buri e ɵini seŋ na wiini Alaw, 2A tala hulamai sulu amai wulani bal ca, ɗai zi tum na warni ɗa e niyi azumai yaw, e ɗa mi avaɗi edi. 3A niya warni ktai arbani hulum n'abakai hanɗa, a hulum n'abai na wiini Simun. A miɗini buri a torasi edi arba sek agwi. Asakal par a sumnasi warni hulum par dam a hitrasi firiɗi ɗai ɗa.
4Hlai n'a vada gaini seŋ zi miɗi ya, a miɗini wiini Simun: Toroɗi edi warni yem na hulum sek, ɵi avaki ɗa kapai ki yimi hilif. 5Simun a wiyini seŋ a miɗini: Epin-geza, tiyi mi fini na ɗa aŋ tum ɵa, mi yimi wala kai, amma pini seŋku ɗa, aga mu ɵa ava ɗa, 6won hlai n'e ɵiŋ li ɗa, e yimi hilif viya haa avaɗi a dara a ɓasa edi. 7E hûwdiɗi marɗi na gaiɗi n'e ɗa war hulum n'abai na zamai ɗa buri e hilisi e zini piɗi. Nagai e hilisi e vi hulamai n'abakai na sulu paŋ haa a dara a buɗuha. 8Won hlai n'a tala hanɗa, Simun Peter a hurga azumai wuzani Yesu a muɗa: Epiɗ-ɗai, yimaɗi warku edi sa par kaai, ta mu ɗif na tuwur. 9Buri hunai te yimiɗi, ni gaiɗi nagai n'e ɗa gaini paŋ lai burini hilif n'e yimiŋ ɗa. 10Yakob gaini Yohana n'alini Zebedewus na marni Simun ɗa, hunai te yimiɗi nɵa lai. Yesu a miɗini wiini Simun: Ku huna kai, wuzamu sek aga ku tuma ɗa e ɗi ɗai. 11Nɵa, e wiyisi hulamaiɗi n'abakai ɗa amai wulani daŋ, e wiyisi e tipi pini.
Yesu a zuula ɗif ktai na dugum
Mat. 8.1-4; Mark. 1.40-45
12Mefeŋ ktai, Yesu a na fu warni fuŋ n'abai ktai, ɗif na gaini veglek zi dugum sini a luɓasi, won hlai n'a tala Yesu, a bula sini azumai, a pa arni azumai midini afti, a siiwaŋ maini nɵa muɗa: Epiɗ-ɗai, na ɓa ku dara ku bundaŋa hilu pla kai ɗi! 13Yesu a wuti tini edi, a tikiti sini a muɗa: Mu dara, bunda hilu, tizaw, veglek zi dugum ɗa a hinaŋ. 14Asakal par a gidini mini buri a muɗa hanɗa wiini ɗif kai, amma a miɗini: Ku hala, ku siŋka suku arni pai zi ɓaka, ku za ɓaka burini zi n'edi aŋ hilu maini na Musus a ɗoŋ ɗa nɵa, hanɗa aga a za aŋ zaida buriɗi. 15Ɗai e miɗi gaini ɗa a suwa pra, a suwa pra, kûreɗ ɗai ɗa e diŋgisi viya viya, e ɵini seŋ n'a hitraŋ ɗa aŋ piyi zûûli na war veglekɗi par lai. 16Amma Ni a yima sini edi warni baŋa a siiwa.
Yesu a zuula ɗif na galni gaini mri
Mat. 9.1-8; Mark. 2.1-12
17Mefeŋ ktai ɗa, Yesu a na fu aŋ hitriɗi Farisekai gaiɗi tamai zi gadai e ɗi fu ca ca, e hilisi war fuŋ n'agogoi na war Galeliya gaini na war Yudiya gaini na war Yeruzalem par ɗa lai, spakni Alaw a na fu miɗini buri a zuula veglek. 18Ɗai e cûsi gaini ɗif na galni gaini mri su tiɗi kaai miɗini wala n'e libiŋ gaini ta. E piyi futi aŋ kiŋ amlai, aŋ tikiŋ azumai wuzani Yesu. 19Won hlai n'e nivi baŋa tiɗi ɗai buri e kiŋ amlai kai buri firiɗi ɗai ɗa, e niyi amai midini dalam, e miili baŋa edi agwi, e wiŋsi azumai warni ɗaw gaini sogom miɗini wala n'e libiŋsi gaini waŋ. E tikiŋ azumai arbaɗi ɗai wuzani Yesu. 20Won hlai na Yesu a tala yimiɗi a muɗa: Mu hunuku tuwurku li. 21Ɗai zi ɗû wazagai gaiɗi Farisekai e tiki piɗi e hiini e miɗi: Ɗif hanɗa ni asiya ɗa? Na kapai a tirka Alaw maini hanɗa ɵa ɗa! Na a kiɗa aŋ hina tuwur ɗa asiya, Alaw kiini ktai kai ɗi? 22Yesu a sɗa hiiniɗi ɓa, a zilbiɗi a miɗiɗi: Tiki ki hiini nɵa buri ma ɗa? 23Na gop ɗa a na wata ɗa? Aŋ muɗa ɓa: Mu hunuku tuwurku li ɗa, zaw aŋ muɗa ɓa: Faka amai, hala ɗi? 24Hanɗa, a za kapai a yima midiki ɓa: Ahini ɗif spakni a na midiɗi yai buri a hina tuwur, a muɗa sini ɗif na galni gaini mri, mu na muɗuku: Faka amai, a tika wala n'e libiŋsi gaini ɗa, a hala aha. 25Won hlai ni tizaw, ɗif a faka amai wuzani arɗi, a tika walani n'e libiŋsi gaini ɗa, a hala aha, a sa kol sini Alaw. 26Nagai paŋ e bindi hiyak, e kûli Alaw, hunai te yimiɗi gara, e miɗi: Girna mu tulumu na ɗa a wala n'a za duk kai.
Fet na ahani Levi
Mat. 6.9-13; Mark. 2.13-17
27Asakal hanɗa a niya anene, a nava ɗif zi tar ktai yikini ɓa Levi, gaini simni mini bro na wiini tar ɗa dam, a miɗini: Tapasi pa. 28Ɗif a fakasi amai, a hinasi wazagaini paŋ, a tapa pini Yesu.
29Levi a ziti fet n'amai burini ahani, ɗai zi tar e diŋgisi viya gaiɗi na maafanai zamai viya lai e simni aŋ simi gaiɗi. 30Farisekai gaiɗi ɗai zi ɗû wazagai ɗa, e ŋûriyi, e miɗiɗi wiiɗi ɗaini zi hitri: Tiki, ki simi lai, ki ci lai gaiɗi ɗai zi tar, gaiɗi ɗai na tuwarai lai ɗa buri mada? 31Yesu a wiyiɗi seŋ a muɗa: N'e piyi doktor ɗa, e ɗi ɗai n'e ɗa nga ɗa kai, amma e ɗi zi veglek. 32Mu halasi aŋ yikiɗi sini bindi na gamai ɗa, e ɗi na jre ɗikat kai, amma na tuwarai.
Yesu gaini tikini-sai
Mat. 9.14-17; Mark. 2.18-22
33E miɗini: ɗai zi hitri na wiini Yohana, gaiɗi na wiiɗi Farisekai e tiki sai kûreɗ-kûreɗ, a siiwi lai, amma na wiiku ɗa e simi gaini simi sal, e ci lai ɗa buri ma ɗa? 34Yesu a miɗiɗi: Ki siɗi aŋ ziɗi dewele wiiɗi marmakaini Epiɗi drai aŋ tiki sai won hlai na ni a na gaiɗi ɗi? 35Mefeŋ aga a gizi, n'Epiɗ-drai aga a yima edi arbaɗi par, nɵa aga e tiki sai war mefeŋ ni ɗa, 36A miɗiɗi seŋ zi siŋka maini ktai: Ɗif a sɗa aŋ ɓasasi sini sapa na hehe par aŋ tikaŋ arni sapa na wel kai, na ɓa a za li ɵa ɗa, a ɓasasi sapa na hehe na ɗa kadai meere, a kiɗa a diŋga gaini sapa na wel n'e tikiŋ arni kir kaalai. 37E mi vin na hehe warni galon na wel kai, na ɓa a za li ɵa ɗa, vin na hehe aga a luɓa galon ɗa edi, a ma azumai lai, galon ɗa aga a tuura edi lai. 38Vin na hehe ɗa, a ma warni galon na hehe lai, 39asiya ɗi paŋ n'a ca li vin na wel ɗa, a firiya vin na hehe kai, buri a muɗa: Na wel ɗa a pɗem.
Currently Selected:
Lukas 5: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
