Lukas 22
22
E kiti miɗi buri e yimi Yesu gaini yel
Mat. 26.1-5, 14-16; Mark. 14.1-2, 10-11
1Fet na wiini peŋ na is arni kai, n'e yikiti ɓa: Fet na wiiɗi Paska, te na fu gobi. 2Paakai n'abakai zi ɓaka gaiɗi ɗai n'e ɗû wazagai e piyi yel n'e fiɗiŋ edi gaini buri hunai a na fu piɗi wuzaɗi ɗai.
3Nɵa, Satan a niya warni Yudas ni n'e yikiŋ ɓa: Iskariyot, a na fu arbaɗi na doogo pi sulu. 4A hala a katasi mini gaiɗi paakai n'abakai zi ɓaka, gaiɗi abakaiɗi ɗai zi gɗam ɗa lai, miɗini yel n'aga a saŋ war tiɗi gaini ɗa. 5E firiyi, e kiti miɗi buri e sini farai. 6A yima seŋɗi, a tika pini aŋ paya futi na kapai a saŋ war tiɗi gaini na ɗai e siɗi warni kai ɗa.
Yesu a zizina simi na miɗi fet na wiiɗi Paska
Mat. 26.26, 17-19; Mark. 14.12-16
7Mefeŋ na wiini peŋ na gaini is arni kai, na ɗai e fiɗi wala na miɗi fet na wiiɗi Paska woni ɗa, 8Yesu a ɵina Peter gaini Yohana a miɗɗi: ki hili, ki dumu simi na miɗi fet na wiiɗi Paska kapai mu sumuŋmu. 9E miɗini: Ku firiya ɓa mi hili mi diŋ ɗa wata ɗa? 10A wiyiɗi seŋ a muɗa: Won hlai na ki niyi li warni fuŋ n'abai ɗa, aga ki nivisi ɗif ktai a halasi arki par gaiɗi argini zi yem wulani, tiki futi pini warni dalam n'aga a niya aha warni ɗa. 11Ki miɗini wiini epin-dalam ɗa ɓa: Api-zi-hitri na wiyi ɓa: Dilimi n'aga mu suma simi na wiiɗi fet na wiiɗi Paska gaiɗi ɗaiŋa zi hitri woɗi ɗa, t'aŋ wata ɗa? 12Aga a siŋkitiki dilimi n'amai, n'amai etaz na gaini zizini ta, aga ki zizini wazagai zi simi ɗa warɗi. 13E hili, e nivi wazagai ɗa maini na e miɗiŋɗi nɵa, e zizini simi na miɗi fet na wiiɗi Paska ɗa.
Ɓirwini ɓuk
Mat. 26.20, 26-29; Mark. 14.17, 2-25; 1 Kor. 11.23-26
14Won hlai na ler a za li, a sumna azumai aŋ simi gaiɗi Apostelai na wiini, 15a miɗiɗi: Mu firiya ɓa sai mu suma simi na wiiɗi fet, na wiiɗi Paska hanɗa gaiki wuzani hlai na mu sɗa gir. 16Buri mu miɗiki, aga mu sumaŋ kir kai, haa sɗa n'a za burini a va li amai warni fuŋ-n'Alaw. 17A tika kup na gaini vin warɗi, a sa tese sini Alaw a muɗa: Tikiti, ɓirwiti arbaki. 18Buri mu miɗiki Tiyana par aga mu sa siyemni alini luwuŋ zi vin ɗa kir kai haa pai n'Alaw te halasi.
19Asakal par a tika peŋ, asakal n'a sa tese ya a ɓurwaŋ, a siŋɗi a muɗa: Hanɗa a sa n'a sa edi buriki, ki zi hanɗa kapai midiki a kɵa gaya. 20A tikiti kup ɗa, a za gaiɗi nɵa lai, asakalni simi par a muɗa: Kup hanɗa a bonu na hehe war felŋa n'a ma edi buriki.
Yesu a muɗa ɓa tege aga a za pini
Mat. 26.21-25; Mark. 14.18-21
21Gaini hanɗa paŋ ɗa, ni n'aga a saŋa edi ɗa a na azumai gaya na aŋ suma. 22Ahini ɗif aga a yima edi maini n'aŋ gaini ɗû ɵa, amma gir gara burini ɗif n'aga a saŋ edi ɗa. 23E tiki piɗi aŋ zilbi arbaɗi marɗi e miɗi: Arbamu ɗa ɗif n'a kiɗa a za wala hanɗa asiya ɗa?
N'abai n'arbamu asiya ɗa?
Mat. 20.24-28; 19.28; Mark. 10.41-45
24Sispai a faka arbaɗi, arbaɗi ɗa, n'aga a ɗa aŋ abai ɗa asiya ɗa? 25A miɗiɗi: Paakai na midini afti ɗa e ŋi midiɗi ɗaiɗi aŋ abakai, nagai n'e kirpiɗi ɗa, e firiyi e yikiɗi ɓa: Ɗai na pɗamai. 26Amma arbaki tiki ɗa aga a za nɵa kai, amma n'abai n'arbaki tiki ɗa, aga a za sini maini n'agwi na piki nɵa, n'a ɵa wuzaɗi ɗai ɗa, maini ni n'a za ɵeŋ nɵa lai. 27Kadai tiɓ ɗa, abai ɗa asiya ɗa? A ni na azumai dam aŋ simi ɗa zaw, zaw a ni n'a kinisi simi ɗi? A ni na azumai dam aŋ suma ɗa kai ɗi? Amma ta gaini hanɗa paŋ mu na arbaki na ɗa maini ni n'a kasi simi ɗa nɵa.
28Tiki ɗa, ki ɗi ɗai na ki pli miki gaya kai war girŋa. 29Buri nɵa mu sitiki pai ɗa aŋ wiiki, maini n'Api a sitiŋa wiyata ɗa nɵa. 30Kapai ki simi gaya, ki ci gaya lai warɗi pai na wiya. Kapai ki simni midini paramay aŋ ziɗi sariya wiiɗi pinziba na doogo pi sulu na wiiɗi Izrayel.
Yesu a muɗa ɓa, Peter aga a ɓuɓura mini burini
Mat. 26.3-35; Mark. 14.27-31; Yoh. 13.36-38
31Simun, Simun, Satan a paya aŋ siriki edi maini algama nɵa, 32amma mu siiwa buriku, kapai yimiku a vada edi marwai kai, nɵa won hlai na ku ɗiyasi li ɗa, siɗi gdaŋ wiiɗi marku. 33Peter a miɗini: Epiɗ-ɗai, koo war daŋgai, koo mini mri, sai mu hala gaiku. 34Yesu a waya seŋ a miɗini: Peter, mu muɗuku, girna haa yugur a yika ta ɗa, aga ku ɓuɓura muku azi hu ɓa: Ku sɗaŋa kai.
Guɓa gaini sak gaini kaɵkar
35A miɗiɗi pra: Won hlai na mu ɵiniki edi gaini guɓa tiki kaalai, sak kai, harabak eziki kaalai ɗa, wala ktai a sûwiki ɗi? 36A miɗiɗi: Amma tiyana, ɗif na guɓani a na ɗa, a tikaŋ tini n'aŋ gaini sakni nɵa, na kaɵkarni aŋ kai ɗa a wura sapani edi kapai a wura gaini lai. 37Buri mu miɗiki: wala n'ag'aŋ ɗû ɗa, sai va amai sa: E pɵiŋ maa arbaɗi nagai na maafanai, buri ɓa: wazagai n'a ɗosi mada paŋ ɗa a ŋaya aŋ vidi. 38E miɗi: Epiɗ-ɗai, an na sulu. A miɗiɗi: A kiɗa ta.
Yesu a siiwa amai midiɗi huwuŋ zi luwuŋ olive
Mat. 26.36-46; Mark. 14.32-42
39A niyasi anene maini n'a na zaŋ kureɗ nɵa, a hala siɗi huwuŋ zi luwuŋ olive, ɗaini zi hitri e hili pini lai. 40Won hlai n'a co warni hlai ni ɗa, a miɗiɗi: Siiwi kapai ki mili edi mini tanai par. 41A yima sini edi siɗi par dai dai kriyit zi bili ta, a hala edi siɗi par maini ɵiŋkini kriyit ktai nɵa, a hurga azumai a siiwa a muɗa: 42Apa, na ɓa ku rgaŋ warku ɵa lai ɗa, gir hanɗa, ku hinaŋsi aŋ za sa kai, amma ku hinaŋ aŋ za pini diri na wiya kai, amma pini diri na wiiku. 43Nɵa ɗif zi ɵeŋ na war fuŋ-n'Alaw par a siŋka sini arni buri a sini gadaŋ. 44Hunai te yimaŋ haa a siiwa gaini kurfuk a suwa pra, arcukni a bunda maini fel n'a tuɗuwa azumai nɵa. 45Asakal siiwa par a fakasi amai a halasi siɗi ɗaini zi hitri, a niviɗisi ɗa e kwimi haa e kili weseŋ. 46A miɗiɗi: Ki kili weseŋ buri mada? Fiki amai, siiwi, kapai ki mili edi mini tanai par.
Yimi na e yimi Yesu
Mat. 26.47-56; Mark. 14.43-50; Yoh. 18.2-11
47A ɵa seŋ na mini edi kai hai, a tala ɗai e ɗa hilisi, ɗif n'e yikiŋ ɓa Yudas, ktai n'arbaɗi na doogo pi sulu ɗa wuzaɗi ta, a toro gobi sini Yesu, a kɵa amai wulani, aŋ ɵiɓini wuti. 48Yesu a miɗini: Ku saŋa edi gaini kɵiku n'amai wula aŋ ɵiɓiŋa wuti ɗi? 49Nagai n'e ɗa gaini n'e tili wala n'aga a za ɗa, e miɗi: Epiɗ-ɗai, mi mili kaɵkaryi ɗa amai ɗi? 50Ktai arbarɗi a bla ɵimaɗi ɵeŋ na wiini pai n'abai zi ɓaka ɗa, a purta ɵimaɗi na wus ɗa edi. 51Amma Yesu a muɗa: Suuwi, ki zi kai, asakal a tetema ɵimaɗi ɗif, a zuulaŋ lai.
52Nɵa Yesu a miɗiɗi wiiɗi paakai n'abakai zi ɓaka gaiɗi abakaiɗi ɗai zi giɗimi tempel gaiɗi n'abakai n'arbaɗi ɗai n'e hilisi aŋ yimiŋ ɗa, maini nɵa: Ki hilisi gaini kaɵkar, gaini amaraŋa lai maini na ɓa mu gorɓolo ɵa buri mada? 53Yuvai paŋ mu na fu amlai gaiki war tempel, amma ki yimiŋa kai. Hanɗa a ler na wiiki gaini spak na war gegeŋ.
Peter a ɓuɓura mini burini Yesu
Mat. 26.57-58, 69-75; Mark. 14.53-54; Yoh. 18.12-18, 25-27
54Won hlai n'e yimiŋ li ɗa, e hili gaini, e kiŋ aha war dalamni pai n'abai. Amma Peter a ɵaɗi piɗi edi gaigai par su. 55E pi afu a pakatai su, e simni mini ca, Peter a halasi a sumna arbaɗi dam lai. 56Ahiyagwi zi sɗa ktai te sɗaŋ mini afu dam, te mula arɗi sini te talaŋ te muɗa: Ɗif hanɗa a na gaini par. 57Amma a ɓuɓura mini a muɗa: Muni mu sɗaŋ kai. 58Asakal par agwi, ɗif zamai a talaŋ a muɗa: Tuku lai, ku ktai arbaɗi. Amma Peter a muɗa: Mu ktai n'arbayi kai.
59A za gobi ler ɗaw ɗi, ɗif zamai a pa pini seŋni pra a muɗa: A jre ɗif hanɗa a na gaini par, buri ni a ɗif na Galeliya lai. 60Peter a waya seŋ a muɗa: Ɗif, na ku muɗaŋ na ɗa mu sɗaŋ kai! na koo. Won hlai ni dama, hlai n'a na muɗa hai ɗa, Yugur a yika. 61Nɵa Epiɗ-ɗai a bundasi arni a tala Peter, Peter miɗini a kɵa gaini seŋ n'EPIƊ-ƊAI a miɗiŋsi wuzani hlai par ɓa: Girna haa Yugur a yika ta ɗa, aga ku ɓuɓura muku buriya azi hu. 62Peter a niya anene, a co anene ɗa a tuwa gara. 63Ɗai n'e giɗimi Yesu e zini yewere, e ɵiɓiŋ lai. 64E biriŋ sapa arni e zilbiŋ: Miɗiyi haw, n'a ɵuɓuku ɗa asiya ɗa? 65E tirkiŋ gaini tirki zamai zamai viya lai.
Yesu, wuzaɗi ɗai zi kiti seŋ
Mat. 26.59-66; Mark. 14.55-64; Yoh. 18.19-24
66Won hlai na hlai a sɗasi li edi n'abakai n'arbaɗi ɗai, gaiɗi paakai n'abakai zi ɓaka, gaiɗi ɗai zi ɗû wazagai lai e tipi e kisi Yesu amlai wuzaɗi ɗaiɗi zi kiti seŋ. 67E miɗi: Na ɓa tuku ku Kristu ɗa, miɗiŋyi. A waya seŋ a miɗiɗi: Na ɓa mu miɗiŋki maa aga ki yimi duk kai. 68Na ɓa mu zilbiki aga ki wiyiŋa seŋ kaalai. 69Amma tiyana par ɗa, Ahini ɗif aga a sumna war hlai zi hormo na wiini Alaw zi spak paŋ ɗa. 70Nɵa nagai paŋ e miɗi: Tuku k'Ahini Alaw ɗi? A miɗiɗi: Ki miɗiŋ ɵa na ɗa, ki ɗi tiki. 71E miɗi: Mu zumu gaini zaida zamai ɗa a mada, tumu gaini mudumu dama mu ɵunumu na mini par ya.
Currently Selected:
Lukas 22: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
