Yohana 10
10
Ɗif zi giɗimi gaini adumaini
1Jre, jre, mu miɗiki Ɗif n'a niya amlai warni farani adumai mini magala par kai, amma a prasi midini hlai ɗa, ɗif hanɗa a ɗif zi mihill, a gorɓolo. 2Amma ni n'a niya amlai war mini magala par a ɗif zi giɗimi na wiini adumai. 3Ɗif zi giɗimi a mala mini hlai edi burini, adumaini a ɵina wulani, a yika adumaini gaini yiki, a mulaŋsi anene lai. 4Won hlai n'a mulaŋsi li anene paŋ ɗa, a ɵa wuzani, adumai a hala pini lai, buri ɓa a sɗa wulani ya. 5A kiɗa a hala pini ɗif n'a sɗaŋ kai ɗa kai, aga a pra edi wuzani buri a sɗa wulaɗi ɗai na morkokoi kai.
6Yesu a miɗiɗi warni seŋ zi siŋka maini hanɗa, amma nagai e ɵini ezini seŋ n'a miɗiŋɗi edi kai.
Ɗif zi giɗimi na pɗem
7Yesu a miɗiɗi pra: Jre, jre, Ta mu magala na wiini adumai, 8nagai n'e hilisi wuza ɗa paŋ e ɗi mahalakai gaiɗi gorɓolokai, amma adumai a ɵina piɗi kai. 9Ta ɗa mu mini magala, ɗif n'a niya li amlai sa par ɗaw ɗa aga a nava kûri, aga a niya amlai, a niya anene a nava hlai zi kuzum lai. 10Ɗif zi mihill ɗa a halasi buri a hala, buri a fuɗa, buri a tuura wazagai edi, amma ta mu halasi ɗa aŋ siɗi suŋfa kapai a za siɗi abai ta.
11Ta ɗa mu ɗif zi giɗimi na pɗem, ɗif zi giɗimi na pɗem a sa sini edi burini adumaini. 12Ɗif zi gɗam n'a za sda burini farai, ni a ɗif zi giɗimi na gaini futini kai, na adumai ɗa a wiini kaalai, won hlai n'a tala li belemke a na halasi ɗa, a pra edi, a hina adumai ɗa ɵar, belemke a yima adumai ɗa, a ɵaraŋ edi lai. 13Ni a za sda burini vrak, hinini a na miɗini adumai ɗa kai.
14Ta mu ɗif zi giɗimi na pɗem, mu sɗa adumaiŋa, adumaiŋa a sɗaŋa lai. 15Maini n'Api a sɗaŋa, ta lai mu sɗa Api lai nɵa, mu sa suŋfaŋa edi burini adumaiŋa. 16Adumaiŋa zamai a na, n'a na amlai warni fara hanɗa kai, ni lai a dewele ɓa mu payaŋsi, aga a ɵina wula, aga a bunda aŋ fara ktai, ɗifni zi giɗimi ktai lai.
17Api a daraŋa buri ɓa mu sa suŋfaŋa edi ta, kapai mu waya pini aŋ tikaŋ asakal par. 18Ɗif a kiɗa aŋ tikaŋ ta par kai, mu saŋ edi pini diriŋa, spakŋa a na buri mu saŋ edi, spakŋa a na buri mu tikaŋsi lai, hanɗa a gadai na mu navaŋ sini Apa par ɗa. 19Ɓraw a za arbaɗi Yudiyakai pini seŋ hanɗa, 20viya arbaɗi e miɗi: Ksalai aŋ miɗini, a ɗif zi dûûli, ki ziɓiri seŋni buri maɗa? 21Zamai e miɗi: Hanɗa a miɗi na wiini ɗif na ksa aŋ miɗini ɗa kai koo. Ksalai a mala arai ɗif na melveŋ edi ɗe!
Ɗai e bili Yesu arɗi kai
22Fet na wiini milini mini tempel a za war Yeruzalem, a za na ɗa amsai. 23Yesu a paya amlai warni tempel pini balak na wiini Salmun. 24Yudiyakai e hiriŋ azumai e miɗini: Miɗiyi haw ɗa, tuku ku Kristu ɗi?, Aga ku hiniyi war siɗi kai ɵa haa kas wata ɗa? 25Yesu a waya seŋ a miɗiɗi: Mu miɗiŋki ya, amma tiki ki diri ki yimi kai, wala n'a za zaida ɗa a sɗa na ta mu zaŋ war yikini Api ɗa. 26Amma na ɓa tiki ki yimi kai ɗa, a za na ɗa buri ɓa ki ɗi adumaiŋa kai. 27Adumaiŋa a ɵina wula, ta mu sɗaŋ, a hala pa lai. 28Ta mu sini suŋfa n'a vada kai, aga a ba edi kai zaŋ, ɗif a kiɗa a hûltiɗi edi war ta par kai. 29Wala na Api a saŋa ɗa abai a suwa paŋ, ɗif a kiɗa a hultaŋ tini Api par kai. 30Ta gaini Apa mi ɗi wala ktai.
31Yudiyakai e mili kriyit buri e fiɗiŋ edi. 32Yesu a miɗiɗi mu siŋkiki wazagai na pɗamai na sini Apa par viya, na ki fiɗiŋa edi burini ɗa a na wata ɗa? 33Yudiyakai e wiyi seŋ e miɗini: mi fuɗuku edi gaini kriyit burini sɗa na pɗem ɗa kai, amma burini tirki na ku tirka Alaw ɗa, tuku ku ɗif, amma ku za suku aŋ Alaw. 34Yesu a wiyiɗi seŋ a muɗa: Aŋ gaini ɗû war gadai zi ɗû na wiiki ɓa, mu muɗa ya ɓa tiki ki ɗi alawai nɵa kai ɗi? 35Nɵa e yikiki aŋ alawai na ɗa, e ɗi nagai na seŋni Alaw a muɗa siɗi ɗa, ɗû hanɗa a kiɗa a haza edi kai. 36Tiki ki miɗi wiini ni n'Api a varaŋ edi, n'a ɵinaŋsi warɗi yai lai ɓa: Ku na tirka Alaw, buri mu muɗa ɓa m'Ahini Alaw ɗa! 37Na ɓa mu za na ɗa a sɗa na wiini Apa kai ɗa, ki yimi wiiki pa kai. 38Na ɓa mu na zaŋ ɗa, koo ki yimi pa kai tekeɗeɗi ɗa, ki yimi pini sɗa hanɗa, ki yimiŋ midiki pɗem ɓa, Api aŋ wara ta, ta m'aŋ warni Api lai. 39E piyiŋ aŋ yimiŋ pra, amma e kiɗi aŋ yimiŋ kai.
40A waya anene kata duɓani ra Yurdan par won hlai na Yohana a sa baptisme woni avut, a sumna warni lai. 41Ɗai viya e hilisi sini e miɗi: Yohana a za wala ktai zi siŋki kai, amma wala na Yohana a muɗaŋ midini ɗif hanɗa paŋ ɗa a jre. 42War hlai ni ɗai viya e yimi warni.
Currently Selected:
Yohana 10: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
