Niyi n'edi 3
3
1Musus a na fu aŋ giɗima adumai na gaini haakai na wiini Yetro, pai zi ɓaka na Madiyan, na suwulni. Mefeŋ ktai a ka farai ɗa edi par miɗini basga na kaɗataŋ, gobi siɗi huwuŋ na wiini Alaw na yikiɗi ɓa Horeb. 2Ɵeŋ na wiini EPIƊ-ƊAI a siŋka sini arni, arni elesni afu par arbani kukuɓ par, Musus a tala afu a na ya, amma luwuŋ a ya kai. 3Musus a hiina a muɗa: Mu gunasi nɵa par mu tala wala zi siŋki n'abai hanɗa haw. Luwuŋ zi hedek ɗa a ya kai ɗa maɵa maɵa ɗa? 4Won hlai n'EPIƊ-ƊAI a tala ɓa Musus a na guna buri a tala wala n'a za ɗa, a yikaŋsi amlai arbani luwuŋ zi hedek ɗa par: Musus, Musus; Musus a wiyini seŋ: M'aŋ na. 5EPIƊ-ƊAI a miɗini: Ku torosi sini hlai hanɗa gobi kai, wa harabak n'azuku edi, buri hlai na ku ɗiya woni ɗa, a hlai na sɗik. 6A muɗa: Ta m'Alaw na wiiɗi tamaiku, m'Alaw na wiini Abraham, m'Alaw na wiini Isaak, m'Alaw na wiini Yakob lai. Musus a bara sapa arni bar, buri a huna ɓa aga a tala Alaw gaini arni. 7EPIƊ-ƊAI a muɗa: Mu tala gir n'aŋ siɗi ɗaiŋa war Egipte ɗa, mu ɵina tuwi n'e ɗa tûwi won hlai na ɗai n'abakai na midini sda zi gir e ɗa ɵiɓiɗi ɗa. A jre, e ɗa siɗi gir. 8Ta mu niyasi azumai aŋ piliɗi edi war tiɗi ɗai n'Egipte ɗa par, mu miliɗi edi warɗi afti hanɗa par, mu kiɗi midini afti na pɗem, n'abai, na emelni ami gaini fiyaw lai a ka warni. Afti na wiiɗi Kanaaniyakai, Hittitekai, Amoritekai, Perizitekai, Hivitekai gaiɗi Yebuzitekai lai. 9Tiyana ɗa, tuwiɗi aliɗi Izrayel a wasi haa amai sa ta, mu tala gir na e ɗa siɗiŋ tiɗi ɗai n'Egipte lai ɗa, 10tiyana ɗa, faka amai, hala sini Faraw, ku miliɗisi aliɗi Izrayel na ɗaiŋa edi war Egipte par.
Alaw a siŋka yikini wiini Musus
11Musus a miɗini wiini Alaw: Ta mu siya ɗa na kapai mu hala sini Faraw aŋ miliɗisi ɗai na Izrayel edi war Egipte par ɗa? 12Alaw a miɗini: Ta m'aŋ gaiku. Wala n'a siŋka ɓa mu ɵunuku mu ta ɗa a hanɗa. Won hlai na ku miliɗisi aliɗi Izrayel edi war Egipte par li, tuku gaiɗi nagai lai aga ki hûrgû azumai wuza amai midiɗi huwuŋ hanɗa.
13Musus a miɗini wiini Alaw: Aftini, ta aga mu hala siɗi aliɗi Izrayel, aŋ miɗiɗi ɓa: Alaw na wiiɗi tamaiki a ɵinaŋasi siki, amma na ɓa e zilbiŋa li ɓa: E yikiŋ maɵa ɗi ɗa, aga mu wiyiɗi seŋ maɵa ɗa? 14Alaw a miɗini wiini Musus: E yikiŋa ɓa Mu na. A miɗini: Aga ku miɗiɗi wiiɗi aliɗi Izrayel maini nɵa: “Mu na” a ɵinaŋasi siki. 15Alaw a miɗini wiini Musus pra: Aga ku miɗiɗi wiiɗi aliɗi Izrayel maini nɵa: EPIƊ-ƊAI Alaw na wiiɗi tamaiki, Alaw na wiini Abraham, na wiini Isaak na wiini Yakob lai a ɵinaŋasi siki. Hanɗa a yikiŋa na haa kureɗ. Haa hlai n'a vada kai n'a vada kai, aga e yikiŋa maini nɵa. 16Hala, ku tipiɗi n'abakai n'arbaɗi aliɗi Izrayel paŋ azumai, ku miɗiɗi ɓa: EPIƊ-ƊAI Alaw na wiiɗi tamaiki, Alaw na wiini Abraham, na wiini Isaak, na wiini Yakob lai a siŋka sini ara a muɗaŋa maini nɵa: Mu rga wara buri mu zina piki, buri gir n'e ɗa e ziŋki war Egipte ɗa. 17Seŋŋa a ɗiya ɓa, mu milikisi edi war gir n'Egipte par aŋ kiki midini aftiɗi Kanaaniyakai gaiɗi Hititekai gaiɗi Amoritekai, gaiɗi Perezitekai gaiɗi Hivitekai gaiɗi Yebuzitekai lai, a afti na emel n'ami gaini fiyaw lai a ka warni. 18Nagai aga e ɵini muku. Tuku gaiɗi n'abakai n'arbaɗi ɗai n'arbaki, aga ki hili aha sini pai n'Egipte aŋ miɗi gaini. Ki miɗini ɓa: EPIƊ-ƊAI Alaw na wiiɗi Hebrekai a siŋka sini aryi. Tiyana ɗa siyi futi aŋ hili edi war basga aŋ zi ɓaka zi yi wiini EPIƊ-ƊAI Alaw na wiyi. Hili hanɗa aga a za mefeŋ hu. 19Mu sɗa edi gaglai ɓa pai n'Egipte aga a hiniki aŋ hili kai. Sai na ɓa dewele a za miɗini li. 20Nɵa aga mu halaɗi miɗini gaini spak, aga mu za wazagai n'abakai zi hiila midini afti n'Egipte, asakal hanɗa aga a hiniki ki hili. 21Aga mu za yum siɗi ɗaiku, kapai ɗai n'Egipte e hiini buriɗi, kapai ki hili sek ɗa, ki hili gaini tiki piki ca kai. 22Muni na Izrayel paŋ te zilba wazagai zi arzaŋ, zi or gaini sapa lai tiɗi muni na ɵimaɗi, zaw na te na aha gaiɗi aŋ fuŋ dam. Ki siŋɗi midiɗi aliki na maɵagai gaiɗi na falakai aŋ libi. Gaini hanɗa aga ki dûgûsi wazagaiɗi ɗai n'Egipte.
Currently Selected:
Niyi n'edi 3: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
