Niyi n'edi 1
1
Simni na war bege na wiiɗi aliɗi Izrayel gaini pli n'edi na war Egipte par
Aliɗi Izrayel e bindi aŋ bagakai aha war Egipte
1Hanɗa a yikiɗi aliɗi Izrayel n'e hilisi aha war Egipte gaini Yakob, asiya ɗi paŋ gaini pakataini pakataini.
2Ruben, Simeyon, Levi gaini Yuda,
3Isakar, Zabulon gaini Benyamin,
4Dan, Neftali,
Gad gaini Aser lai.
5Pinzibani Yakob e zi paŋ ɗai doogo doogo muguzak. Amma Yosef, ni a na fu aha war Egipte wuzaɗi par. 6Asakal par Yosef a mra, tawalakaini e mri lai; vna ni ɗawwa a vada edi. 7Aliɗi Izrayel e sisiɗi viya, e tûsi viya, e bindi viya midini afti, e bindi gdaŋai lai.
8Asakal par pai ktai n'a sɗa Yosef kai a suma midiɗi Egipte. 9A miɗiɗi wiiɗi ɗaini, tili vokɗi aliɗi Izrayel ɗa a za abai ta, spakɗi a suwumu lai. 10Mi piyumu dabarai zamai siɗi kapai e sisiɗi wuzaɗi sek a suwa kai, ɵa kai na ɓa gaw a za li ɗa, aga e diŋgi gaiɗi gawmu, e hutumumu, e niyi edi miɗini aftimu par lai. 11Ɗai n'Egipte e miliɗi ɗai n'abakai miɗini sda zi gir midiɗi ca ca kapai e ziɗi gir gaini sda zi dewele. Nɵa e rgi fuŋ n'abakai: Pitom gaiɗi Ramses aŋ fuŋ na Faraw a giɗima wazagaini zi simi woni. 12Won hlai n'e ɗa riyi girɗi amai ɗa, e sisiɗi wuzaɗi sek, e tûsi a suwa pra, e tiki hlai wuzaɗi sek, ɗai e bindi e hûniɗi aliɗi Izrayel. 13Nɵa ɗai n'Egipte e bindiɗi aliɗi Izrayel aŋ bagakaiɗi e tiki sda na guma midiɗi gaini hiinini haw kai, 14e biziɗi hlai arɗi gaini sda zi gir hanɗa: E diiɓi afti, e wii brik, e zi sda zamai zamai n'edi war vowai lai, gaini sda zamai zamai viya lai, hanɗa paŋ a sda zi gir zi bege n'e tikiŋɗi midiɗi gaini hiinini haw kai ɗa.
Faraw a ziɗi gir wiiɗi aliɗi Izrayel
15Arbaɗi Hebrekai ɗa, falakai zi pûkû falakai e ɗa sulu, na ktai yikiɗi ɓa: Sifra, na zamai Puwa lai. Faraw a miɗiɗi maini nɵa: 16Won hlai n'aga ki pûkûɗi falakaiɗi Hebrekai, ki tili pini ahiyagwi pɗem, na ɓa a wus ɗa, ki fiɗiŋ edi, na ɓa te muni ki hiniti karɗi, 17amma falakai zi pûkû falakai hanɗa, e ɗi ɗai n'e hûni Alaw gara, e zi maini na pai n'Egipte a miɗiŋɗi nɵa kai, e hiniɗi aliyagoi na maɵagai ɗa karɗi, e fiɗiɗi kai. 18Nɵa pai n'Egipte a yikiɗi a miɗiɗi: Tiki ki zi nɵa buri maɗa, ki hiniɗi aliyagoi na maɵagai karɗi ɗa buri ma ɗa? 19Falakai zi pûkû falakai e wiyini seŋ wiini Faraw: Falakaiɗi Hebrekai hanɗa e ɗa maiɗi falakai n'Egipte ɵa kai. Nagai gdaŋai, muni zi pûkû falakai te cosi ta ɗa, nagai e pûkû ya, e pûkû ya. 20Alaw a ziɗi pɗem wiiɗi falakai zi pûkû falakai, aliɗi Izrayel e bindi viya, e bindi gdaŋai lai.
21Alaw a siɗi ali wiiɗi falakai zi pûkû falakai ɗa buri ɓa e hûniŋ. 22Nɵa, asakal par Faraw a sa miɗi wiiɗi ɗaini paŋ maini nɵa: Ahi na wus paŋ n'a wa li ki biliŋ agoɗom war ra Nil, amma na muni ki hiniti karɗi.
Currently Selected:
Niyi n'edi 1: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
