Sdaɗi Apostelai 9
9
Bindi na wiini Sawlus
Sdaɗ. Apost. 22.3-21; 26.9-20
1Sawlus na a va gaini suwar gaini hiini na wiini fiɗi n'edi siɗi ɗai zi hitri na wiini Epiɗ-ɗai, a hala sini pai n'abai zi ɓaka. 2A zilbaŋ buri a sini letre tini kapai a kaŋ siɗi abakai na miɗini Sinagogne na war Damaskus ɗa, na ɓa e nivi li maɵagai zaw falakai n'e tikiti futi pini Alaw ɗa a yimiɗi, a rgiɗisi a kiɗisi war Yeruzalem.
3A na fu warɗi futi blaŋ aŋ hala war Damaskus sek, won hlai ni tizaw, gaglai ktai a halasi amai war fuŋni Alaw par, a wulɗa, hlai na sini paŋ a bunda gaglai. 4A kɵa azumai, a ɵina wule ktai a miɗinisi maini nɵa: Sawlus, Sawlus, ku sɗaŋa gir ara buri maɗa? 5A waya seŋ a miɗini: Tuku ku siya ɗa, Epiɗ-ɗai? Ta, mu Yesu, na ku siɗini gir arni na ɗa. 6Amma faka amai, ku hala aha war fuŋ n'abai ɗa, aga e sunkuku wala n'aga ku zaŋ ɗa. 7Ɗai n'e ɗa gaini war morkoi ɗa, e ɗiyi ca, hunai a kitiŋiɗi faɵ e ɵini wulani ɗif a muɗa, amma e tili ɗif kai. 8Sawlus a faka amai, arni edi ca, amma a tala wala kai, ɗai na gaini e yimiŋ tini, e kiini pini aha war Damaskus. 9A sumna haa mefeŋ hu, a tala kai, a suma kai, a ca yem kaalai.
10Ɗif zi hitri ktai yikini Ananiyas a na fu a Damaskus, Epiɗ-ɗai a yikaŋ war wala na a siŋka arni ɓa: Ananiyas. Ananiyas a waya seŋ: M'aŋ na Epiɗ-ɗai. 11Epiɗ-ɗai a miɗini: Hala warɗi futi n'e yikiti ɓa: Futi na ɗikat, ahani Yudas, ku zilba ɗif ktai n'e yikiŋ ɓa: Sawlus na Tarsis par buri aŋ war siiwa. 12A tala ɗif ktai n'e yikiŋ ɓa Ananiyas, a niyasi aha sini, a mula tini miɗini kapai arni a mala edi. 13Ananiyas a wiyini seŋ a miɗini: Epiɗ-ɗai, mu ɵina miɗi ɗai viya, gir na ɗif hanɗa a ziŋɗi wiiɗi ɗaiku na sɗik war Yeruzalem ɗa, 14won na maa, spak a sa tini siɗi paakai n'abakai zi ɓaka par buri a yimiɗi nagai paŋ n'e yiki yikuku war miɗi ɗa. 15Amma Epiɗ-ɗai a miɗini: Hala wiiku buri ɗif hanɗa a wala na mu varaŋ aŋ za sda gaini, buri a ka yikiŋa edi sini pinziba na zamai, wuzaɗi paakai lai, siɗi ɗai na Izrayel ɗa lai. 16Ta dama aga mu siŋkini gir paŋ n'aga a sɗaŋ burini yikiŋa. 17Ananiyas a hala, won hlai na a co aha warni dalam ɗa, a tika tini miɗini Sawlus a muɗa: Sawlus, tawala, Epiɗ-ɗai Yesu na a siŋkasi sini arku warɗi futi na ku halasi warɗi ɗa, a ɵinaŋasi kapai arku a mala edi, ku va gaini Seze-sɗik lai. 18Won hlai ni tizaw, wala a yakasi arni par maini fotorok ɵa, arni a mala edi, a faka amai, a nava baptisme. 19Asakal na a suma ta ɗa, a nava gdaŋ.
Sawlus a ɓaka labar miɗini Kristu war Damaskus
A sumna burini hlai n'agwi gaiɗi ɗai zi hitri n'e ɗa a Damaskus ɗa. 20Gaini yafai kai a tika pini aŋ ɓaka seŋ war Sinagogne ɓa: Yesu a Ahini Alaw. 21Nagai n'e ɵini mini ɗa e bindi hiyak e miɗi: Hanɗa a ni na aha warɗi Yeruzalem ɗa, a na ka a ziɗi gir wiiɗi nagai n'e yiki yiki hanɗa war miɗi ɗa kai ɗi? A halasi won na aŋ yimiɗi nagai n'e yiki yiki hanɗa war miɗi, aŋ kiɗi wuzaɗi paakai n'abakai lai kai ɗi? 22Amma Sawlus ɗa, spakni a riya amai sek sek, a yimiŋɗi midiɗi Yudiyakai n'e ɗa a Damaskus ɗa ɓa, Yesu ɗa a Kristu, nagai e siɗi seŋ na e wiyiŋni ɗa kai. 23Mefeŋ yaw askal par Yudiyakai e rgi warɗi buri e fiɗiŋ edi, 24Sawlus a sɗa titimi na wiiɗi ba, mini magalani fuŋ n'abai n'a na su su ɗa, e tiki hangalɗi sini girvudi gaini duvuk paŋ kapai e fiɗiŋ edi. 25Amma ɗaini zi hitri ɗa e tikiŋ duvuk, e wiŋsi miɗini ɵaga ɗaw gaini dologo.
Sawlus aha warɗi Yeruzalem
26Won hlai na a cosi a Yeruzalem ɗa, Sawlus a paya aŋ tapa gaiɗi ɗai zi hitri ɗa, amma ɗai paŋ hunai piɗi wuzani ta, e yimi ɓa a bunda aŋ ɗif zi hitrai ya jre nɵa kai. 27Nɵa, Barnabas a yimaŋ gaini, a kaŋ siɗi Apostelai, a miɗiɗi miɗini tel na Sawlus a tala Epiɗ-ɗai warɗi futi, miɗini miɗi n'EPIƊ-ƊAI a muɗa gaini, miɗi na a muɗa edi war Epiɗ-ɗai Yesu a Damaskus ɗa gaini hunai kaalai, gaini giriŋi kaalai. 28Sini mefeŋ ni par a tapa gaiɗi Apostelai e hili e wiyisi, e hili e wiyisi a Yeruzalem piɗi marɗi. A muɗa seŋ war yikini Epiɗ-ɗai ɗa gaini hunai kai, gaini giriŋi kaalai. 29A muɗa, a sispa lai gaiɗi Yudiyakai n'e miɗi seŋ grek ɗa, amma nagai e piyi ɓa e fiɗiŋ edi. 30Tawalakai zi yimi ɗa, e siɗi ɓa e kiŋ a Sezariya, woni par e ɵiniŋ a Tarsus.
31Nɵa tipi paŋ na Yudiya, na Galeliya gaini na Samariya lai e simni ɵeɗ. Tipi hanɗa e wili amai, e piyi warni hunai na pini Epiɗ-ɗai, e riyi amai wuzaɗi pini arai-zi-pi na e niviŋ war Seze-sɗik.
HAA SINI KOŊƊI YAI NA PUƊU PAŊ
Zûûli na wiini Enee
32Peter a na vuga midini afti paŋ ɗa, a hala siɗi na sɗik n'e ɗa war Lida lai, 33A navasi ɗif ktai n'e yikiŋ ɓa Enee woni, ezini gaini mri ca, a za buza mitwis miɗini walani zi feŋ ɗa waŋ. 34Peter a miɗini: Enee, Yesu Kristu a zuuluku, faka amai, tuku dama zizina walaku zi feŋ ɗa. Tizaw tar a faka amai. 35Ɗai na Lida gaiɗi na Saron lai e tiliŋ e yimi pini Epiɗ-ɗai.
Tapita te bunda karɗi
36War Yope, muni ktai te na fu, te muni zi hitri, e yikiti ɓa Tapita, a waya edi ɓa Dorkas, a siŋka ɓa: Wudrai. Te za sda na pɗamai viya gara, te zina piɗi na hurofai lai. 37War mefeŋ ni ɗa, te kɵa veglek, te mra lai. E miti yok, e tikiti amai warɗi dilimi n'amai etaz ta. 38Won hlai na ɗai zi hitri e ɵini ɓa Peter a na a Lida na te na gobi gaiɗi Yope ɗa, e ɵini ɗai sulu sini aŋ siwiŋ, e miɗi: Safasi kai, halasi siyi witaw. 39Peter a fakasi, a halasi gaiɗi. Won hlai na a cosi ɗa, e kiŋ pini amai warɗi dilimi n'amai zi etaz ɗa, falakai na greŋ war ɗa paŋ e hilisi gaini tuwi, e siŋkini rob gaini sapa na Dorkas te zaŋ won hlai na te na ka gaiɗi ɗa. 40Peter a birgiɗi ɗai paŋ anene, asakal hanɗa a bunda arni sini kopoŋ a muɗa: Tapita, faka amai. Nɵa, te mala arɗi edi, won hlai na te tala te sumna amai dam. 41A wiiɗi tini, a ɗiyiti amai, asakal par a yikiɗisi na sɗik gaiɗi falakai na war greŋ ɗa lai, a ɗiyiti wuzaɗi karɗi. 42Labar hanɗa a wa edi war Yope paŋ, ɗai viya e tiki piɗi e yimi war Epiɗ-ɗai lai. 43Peter a sumna mefeŋ yaw war Yope ahani Simun ktai, a ɗif zi ɵûɗi amur.
Currently Selected:
Sdaɗi Apostelai 9: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
