Sdaɗi Apostelai 12
12
E fiɗi Yakob edi, e ɵi Peter war daŋgai
1War mefeŋ ni ɗa, Pai Herod a yimiɗi ɗai zamai arbaɗi tipi, a ziɗi gir arɗi lai, 2maa a fuɗa Yakob na tawalni Yohana ɗa edi gaini kaɵkar. 3Won hlai na a tala ɓa sɗa hanɗa a siɗi firiyi wiiɗi Yudiyakai ɗa, a paya aŋ yima Peter lai, hanɗa a za war mefeŋ na wiini peŋ na Is arni kai ɗa. 4A yimaŋ a kaŋ warɗi daŋgai, a mula askarai zi gɗam mini vok puɗu, vok paŋ ɗa ɗai warni puɗu puɗu, e giɗimi ler hu hu lai, kapai asakalɗi fet na wiiɗi Paska par ɗa, e zini sariya wuzaɗi ɗai. 5Peter a na fu warɗi daŋgai, amma tipi e siiwi Alaw burini gaini kurfuk.
Peter a navasi pli n'edi warɗi daŋgai par
6Herod a firiya a kaŋ wuzaɗi sariya, duvuk ni ɗa, peter a faana arbaɗi askarai sulu, jaɓ sini sulu lai. Anene mini hlai par ɗa, ɗai zi gɗam mini hlai ca aŋ giɗimiti daŋgai ɗa lai. 7Amma agwiya ɗa, ɗif zi ɵeŋ na war fuŋni Alaw a luɓasi, gaglai a ŋala amlai warni hlai n'aŋ warni ɗa, ɗif zi ɵeŋ a tika tini paɵani, a gigizaŋ a ɵiyaŋ amai a muɗa: Faka amai witaw. Jaɓ ɗa a yakasi amai par tini. 8Ɗif zi ɵeŋ na war fuŋni Alaw a miɗini: Rga santirku wuzaku, harabakku azuku lai. A za hanɗa lai, wa sapaku suku, halasi pa. 9Peter a niyasi, a tika futi pini. Wala na ɗif zi ɵeŋ na war fuŋni Alaw azaŋ paŋ na ɗa, a hiina ɓa a jre kai, a hiina ɓa a siŋka arni na ɗa a wala. 10Won hlai n'e vigiɗisi ɗai zi gɗam n'avut ɗa vug, n'ag'aŋ sulu vug, e cûsi mini magala zi kawai n'aŋsi aha sini fuŋ n'abai ɗa sek ɗa, mini magala a mala edi wuzaɗi kiini. E niyisi anene, e hili warɗi futi ktai, war hlai ni ɗa, ɗif zi ɵeŋ a yima sini edi sini a hinaŋ kiini.
11Won hlai na Peter arni a giliya li, a muɗa: Tiyana mu sɗa fakat ɓa, Epiɗ-ɗai a ɵinasi ɗifni zi ɵeŋ, a plaŋasi edi tini Herod par, mini meefeŋ na wiiɗi Yudiyakai n'e firiyi e ziŋ sa ɗa par lai. 12Won hlai na hinini a wayasi sini li, a hala war dalamɗi Mariya na emini Yohana na znani ɓa Markus, ɗai viya e ɗi fu woni aŋ siiwi. 13Won hlai na a ɵiɓa mini hlai ɗa, ahiyagwi zi sɗa ktai n'e yikiti ɓa Rode te halasi mini hlai aŋ zibura. 14Te sɗa wulani Peter ɗa ba, firiyi a viti haa mini hlai te malaŋ kir kai, te lawa te sa labar aha sek ɓa, Peter aŋsi anene mini hlai zaw. 15Ɗai e miɗiɗi: Ku duula ɗa a dûûli zaw, amma te pa kaŋ ɓa a na ɗa ɵa. Nagai e miɗi ɓa a ɗifni zi ɵeŋ. 16Amma Peter a ɵiɓa mini hlai wuzani sek, e miliŋ edi ɗa, e bindi hiyak won hlai n'e tiliŋ. 17A hûwdiɗi tini buri e miɗi kai, a miɗiɗi maɵa ɗa Epiɗ-ɗai a yimaŋsi edi warɗi daŋgai par. A muɗa: Ki miɗi seŋ hanɗa wiini Yakob gaiɗi tawalakai lai. Asakal par a niyasi anene, a hala warni hlai zamai. 18Won hlai na hlai a sɗa li edi, dûrgûzi n'abai a faka amai arbaɗi askarai, e miɗi: Peter ɗa a za maɵa ɗa? 19Herod a payaŋ, amma a navaŋ kai, a zilbiɗi ɗai zi gɗam ɗa ta ta, a sa futi buri e fiɗiɗi edi lai. Asakal par a hala a Yudiya par a sezariya buri a sumna woni.
Mri na wiini Pai Herod Agripa
20Herod Agripa ɗa, arbani gaiɗi ɗai na Tirus, gaiɗi na Sidon lai ɗa a hala pɗem kai, amma nagai ɗa e kitisi miɗi e hilisi sini, e tiki Blastus ɗif zi giɗimiti dilimi na wiini pai ɗa, e piyi ɵeɗ buri ɓa, aftiɗi ɗa a nava simini ɗa sini afti na wiini pai ɗa par. 21War mefeŋ na gaini ɗiyi zaw ɗa, Herod a wa sapani zi pai ɗa sini, a sumnasi amai par midiɗi paramaini a miɗiɗisi: 22Won hlai na ɗai e ɗa ɗûûli, e miɗi: Hanɗa a wulani ɗif mirɗek, a wulani Alaw. 23War hlai ni tizaw, ɗif zi ɵeŋ na war fuŋni Alaw a za wala ktai sini ta buri a sini kol wiini Alaw kai. Atla a sumaŋ amai karni par dam haa suŋfani a wa edi. 24Nɵa seŋ na wiini Epiɗ-ɗai a wa tini edi, a riya wuzani sek sek. 25Barnabas na gaini Sawlus, won hlai n'e vidisi li gaini ɵeŋɗi na war Yeruzalem ɗa, e wiyi sek ɗa, e yimi Yohana na znani ɓa Markus ɗa piɗi kaai.
Currently Selected:
Sdaɗi Apostelai 12: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
