Mt 17

Yesus atsende nyòl a nkol a yob

Mk 9,2-10; Lk 9,28-36

1A mvus mëlu mësaman, ndò Yesus anganòṅ Petrus ai Yakob ban manyaṅ woe Yohannes, ndò angabed ai bò a mod nkol a yob, hë bò bò. 2Ndò angatsende bò a mis, asu die angafyè anë nlo-dzobo, biyie bie bingafyè anë mfyè nen. 3Atëm na, bëngayen Moses ai Elias bëlègè ai bò. 4Petrus abodo nkòbò, nyè ai Yesus na: A Nti, eboga enë bia mviè ha#17,4Petrus atsog na Edzoe duma Messias esò ya.. Ngë wadiṅ, mayi bia loṅ bibëm bilè, wa dzia, Moses dzia, Elias dzia. 5Angënë akobògò nala, ndò fò nkut mfyè ongayali bò a yob, kiṅ esòò a nkut ete na: Ndindiṅ mòn wama hili a mafuu nnëm. Mivogolo nyè. 6Eyòṅ bëyègè bëngawog nala, bëbudubu ai mësu a si, bëngambara eyëgan. 7Ndò Yesus angasubu, anamba bò, nyè ai bò na: Tëbëgan, mibë timan mbara.#17,7Bod beziṅ bënganòṅ ebug dzi a Mbëmbë Foe Markus na: 17,(21) E kan nyili enë dzam kulëban hë ai ngogëlan ai eki bidi. 8Bëkui mis, bëntaa hë Yesus etam. 9A bësusu a nkol a si ha, ndò Yesus abende bò na: Të miakad tò mod ziṅ e dzam di, akui anë mòn mod ayi tëbë a sòṅ mimbim#17,9Akui-lë sòṅ Yesus latyan na aboo ki fë a si anë mbim, atëlë tëtëlë, asu te e bod bëngatil Nlaṅ woe bafëm kad dzo na Yesus ayi tëbë a sòṅ mimbim, mëyian yë na badzo na ayi kui a sòṅ.. 10Ndò bëyègè bëngasili nyè na: Asu dze bësaṅa bëkalara badzo na Elias ayean tari sò#17,10-13Biayëm Nlaṅ profet Elias na andzëki wu. Abui Yuden bëtsogo na ayi dugan sòṅ a mëmos më mvua, asu yë na azu komëzan Yuden asu nkat mvua.? 11Nyè ai bò na: Elias ayean fò sòṅ na azu kpaèn mam mësë. 12Ndò makad mina na: Elias angasò ya, hë da, ndò bandzëki nyè yëm, dzam da, bëbòbò nyè e dzom esë bëngabë tama. Nala ngò mòn mod ayi bi mintye a mò maba. 13Ṅwogan a hi bëyègè bazu wog na, angabë akada bò adzo Yohannes Ndu-Bodo.

Yesus asye ndoman mod ebëlë mbë nsisim

Mk 9,14-29; Lk 9,37-42

14Ndo bëngakui a ntumba bod ongabë, ndò mod angasubu, alaban a si ai mëbòṅ, 15nyè na: A Nti, yënë të mòn wama ngòl, amu afè kanda, mintye mibëlë nyè abui. Biyòṅ biziṅ bili, akuu a ndoan, ngë ki na a mëndim. 16Mëngasò ai nyè abë bëyègè boe, hë da, bandzëki bi ngul ya asye nyè. 17Ndò Yesus angadzo na: A mvòṅ bod minë të ai ṅyëbë, mitoa fë dzongo ba! Mayi tòbò ai mina akui abog afe? Mayi mina dzibi akui ve? Zaan ai ma nyè va! 18Yesus ateran ai nyè, ndò nsisim angakodo nyè a nyòl, ndò mòngò angasyeban okòn woe etye etye te. 19Eyòṅ bëyègè bëngaligi ai nyè, bësubu nyè babi, bò na: Asu dze biandzëki bi ngul ya atsidan nyè? 20Nyè ai bò na: Asu ṅyëbë onë mina abòd. Bëbëla emen makad mina na, ngë mibëlë ṅyëbë okui anen anë fes ndoṅ, mikada nkol hi na: Kodogo ha, okë ali, ngë onkodo ana. Tègè ai e dzom ziṅ yakad mina. [ 21#17,21 Batsidan ki akyaè dili së na ai, gogëlan ai nkian bidi. ]

Yesu adzo eyòṅ bèè na ayi wu, akui a sòṅ

Mk 9,30-32; Lk 9,43-45

22Atoban bëngatoban a Galilea, Yesus nyè ai bò na: Bayi kuan ai mòn mod a mò më bod, 23abog te bëwoe nyè, akui a sòṅ a amos lala. Nnëm ontoa bò a mëlunga abui.

Yesus ayaan toya

24Ndò bënganyian a Kafarnao, bënòṅò bë toya bësòò abë Petrus, bò na: Dze yë yëgëlë waan ayaan ki toya nga? 25Nyè na: Ayaan. Anyian anganyian a nda, Yesus atsigi nyè osu, nyè na: Wayen adzo di ya, a Petrus: Eyë bëdzoe ya si banòṅ toya abë za, yë a bòn baban, yë a bëdzin? 26Mbol angadzo na, a bëdzin, ndò hm Yesus afèd na: Kë bòn bënë hm fili a! 27Dzam da, asu yë na të biavë bò mintsogan mifë, këlë woa nlòb a maṅ, onòṅ e kòs osu yayi bi, oyaa dzò anyu, wayi kòb nsaṅ mòni ete. Onòṅ nsaṅ te, oyaan ai bò asu bia wa.

Currently Selected:

Mt 17: NTE12

Highlight

Copy