Mt 10
10
Yesus avë bë awom ai bëbèè ngul
Mk 3,13-19. 6,7; Lk 6,12-19. 9,1
1Ndò angaloe bëyègè boe awom ai bëbè#10,1-4 Yesus atòb bë awom ai bëbèè, nala watyan na ayi na adugan kom e mënda më bod awom ai mëbè ya Israel asu abog mvua, asu Edzoe Zamba., avëë bò ngul ya atsidan bëbe minsisim, ai alëdë akòn asë ai mintye misë. 2Moe bë apostel awom ai bëbè ma: E nyò osu Simun, ya baloe na Petrus (Akoa), ai Andreas manyaṅ woe, Yakòb man Zebede, ai Yohannes, manyaṅ, 3Filip ai Bartolomeus, Tomas ai Mateus, nnòṅò ntòlò, Yakob man Alfeus ai Tadeus, 4Simun man Kananea ai Yudas man Iskariot ya angakuan ai nyè.
Yesus alom bë awom ai bëbèè a esye
Mk 6,8-11; Lk 9,2-5
5Ndò Yesus angalom bë awom ai bëbè ba, abende bò na: Të miakë a tisòn bëdzin, të nyii a tisòn bësamaritan#10,5 Mbëmbë Foe awoge ai ayòṅ Israel osusua yë na bakë ai nyè a bëhaiden bënë.. 6Tarigan kë a mintomba ya nda Israel ya mingadzaṅ. 7A miakë, miyedëgan na: Edzoe ya yob esubu ya babi. 8Ledëgan minkokòn, vëlëgan mimbim, fubugan minzëzam, tsidëgan bëbe minsisim; Mingabi a zëzë, vaan a zëzë. 9Të miakus mvòt ngë silba, të miafudi mòni a bikpè bian. 10Të bi mfëg dulu, tò biyie bibè, tò ngob, tò ntum. Mbò esye ayean ai maan moe. 11E dzal ngë tisòn miayi nyian ete, dzëṅan e mod anë dzin ete. Tòbëgan abë nyè akëlë kui anë miatye. 12Eyòṅ mianyian a nda ziṅ, sugan nda te. 13Ngë nda te yayean ai dò, mvoè#10,13 Eyòṅ Yuden basugan, badzo na «Shalom alekem», «mvoè ebòò ai mina». Mësugan mëte mmò fë babënyaṅ baban ya nkòbò Arab bëbëlë a biakad wog na «Salam alekum». dzaan etòbò ete, ngë yayean ki ai dò, mvoè dzaan edugan abë mina. 14E mod ayi ki mina nòṅ, ngë avogolo bibug bian, eyòṅ miakui a nda te ngë a tisòn te, kudan mbulug onë mina a mëkol a si. 15Makad mina bëbëla na, a amos nkat, si Sodoma ai Gomorra yayi yen mbëṅ alodo tisòn te.
Efëma ai mindzug biazu
Mk 13,9-13; Lk 12,2-11. 12,51-53. 21,12-19
16Yënë sik, malom mina anë mintomba a zaṅ mvu afan. Mitòbògò ntsë anë nyò ai evovoe anë abëṅ. 17Të miabaman ai bod, amu bayi kuan ai mina a mënda-mëdzo, bëyidi mina a mënda më ngogëlan maban. 18Bayi kë ai mina osu bëdzoe ai minkukuma hë asu dama. Nala ngò miayi ma bòòlò a mis maban ai a mis mëyòṅ. 19Eyòṅ bakuan ai mina, të miasaṅan ai mbol miayi kòbò. A awola te, miayi vëëban e dzam miakòbò. 20Së ki mina miayi kòbò, dzam da, nsisim esya waan wayi kòbò abë mina. 21Manyaṅ ayi kuan ai manyaṅ a awu, esya akuan ai mòn, bòn bayi luman ai bëbonde, bëwoe bò. 22Bod bësë bayi mina fëm hë asu dama. E nyò ayi bò azombo akui a mëmana ayi nyiiban. 23Ngë bëtsidan mina dzal ziṅ, tuban e di avòg. Amu makad mina bëbëla na, miayi ki kòdan bëtisòn bë Israel a nyòl, së na mòn mod adugan sò. 24Ṅyègè alod ki ṅyëgëlë, mbò bisye alod ki esya nti. 25Layean ai ṅyègè na akui anë ṅyëgëlë, mbò esye akui anë esya nti. Ngë baloe mod dzal na Belzebul, ngamëna ai e bod bënë a nda dzie. 26Të miambara bò. Dzom ziṅ esòli ki, a yangâkui ki a ngëëṅ; e dzi enë a asoe yayi yëmban. 27E dzi makad mina a dibi, mikòbògò a ngëëṅ; e dzi miawog a mbog alò, yëdëgan a mindil a yob. 28Ndò fë mibë mbara e ba bawoe nyòl, tègè ai ngul ya awoe nsisim. Midaṅa mbara e nyò anë dzam dzèè nyòl ai nsisim a tolendoṅ. 29Bëmvelkuma bëbè bakuan a etun kaba a? Hë da, tò mbòg ya ete asë ki dzam ku a si ngë esoa ayëbë ki dò. 30Esil dzaan esë ya nlo enë nlaṅan. 31Mibë mbara: minë ai mfi alodo bëmvëlkuma ntèd.
Wayean mëm Kristus a mis më bod
32E nyò osë angâmëm ma a mis më bod, ma mëngâmëm nyè a mis më Tara ya anë a yob. 33E nyò angâsye ma a mis më bod, ma mengâsye nyè a mis më Tara y'anë a yob.
Mandzëki sòṅ ai mvoè, masò ai nyamëla
34Mibë kë tsog na masò miè mvoè a si. Mandzë sòṅ ai mvoè a si, mëngasò ai nyamëla okëṅ. 35Mëngasò na mazu tsam mòn ai esya, ngòn ai nyia, mbòm ai nkyè. 36Ndò fë minziziṅ miayi sò mod a nda-bod dzie ben#10,36 Mi 7,6. 37E nyò adiṅ esya ngë nyia alodo ma, e nyòlò te ayean ki ai ma. E nyò ki adiṅ ndoman dzie ngë ngòn dzie alodo ma, ayean ki ai ma. 38E mod anòṅ ki klos dzie angazu atoṅ ma, ayean ki ai ma. 39E nyò akam enyiṅ dzie ayi dzò dzèè; e nyò ki adzèè enyiṅ dzie asu dama ayi dzò baala.
Maan
Mk 9,41
40Ngë mod abò mina afaṅ, ma abò afaṅ te. E nyò ki abò ma afaṅ, abò dò e nyò ya angalom ma. 41E mod abëlan ai profet hë asu yë na anë profet, ayi bëlë maan më profet. E nyò ki abëlan ai sosoo mod mbëṅ hë asu yë na anë sosoo, e nyòlò te ayi bëlë maan më sosoo mod. 42E mod ki angânyuu mbòg ya abobod di elè mëndim mavòbi hë asu yë na bënë bëyègè, makad mina bëbëla na, angadzèè ki maan moe.
Currently Selected:
Mt 10: NTE12
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
MKPAMAṄ AMVOE Nouveau Testament en langue Ewondo © Bible Society of Cameroon, 2012.