Lk 24

1Ndò a amos osu ya sòndò, ai ndib kidi, ndò bakë a sòṅ, bëbëgë e mimbòn ya bëngakomëzan. 2Ndò bakòb akòg atoa mfëṅëlan a mbè sòṅ a mgbag, 3ndò banyian, të yen mbim Yesus Nti. 4Ndò hm labò na, mbol fëg engadzaṅ bò a adzo di, bod bëbè bësòò bò kòb ha, bëbëgë biyie bifumu eyëgan. 5Bëngakòn wòṅ, ndò baluu mësu a si, e bod ba bò ai bò na: Dze miadzëṅ vëvëë mod a zaṅ mimbim? 6Asëki ha, akui a sòṅ. Tsogan mbol angakad mina hala angënë a Galilea 7na layean na mòn mod akabëban a mò bësëm, abomban a klos, abog te atëbë a sòṅ a amos lala. 8Ndò badugan tsog bibug bie. 9Ndò bakodo a sòṅ, bëmana lèè bë awom ai mbògò ai e bod bësë bëvòg e mam mësë ma. 10Bëngabë na: Maria Magdalena, ai Yoanna, ai Maria nyia Yakob, ai e bininga bëvòg bëngabë ai bò. Bëngabë kada apostel e mam ma, 11apostel bëngayen të mam mëte hë anë mam minnal, ndò bandzëki bò yëbë. 12Ndò Petrus akodo a si, akëlë mbil a sòṅ, ndò alëmbë a nnëm ete, antala hë bandas etam, ndò angadugan a nda, akama e dzam angabò di.

Bëyègè bakë a Emmaus

Mk 16,12-13

13Amos te oben, bod bëbè ya taṅ dzaban bëngabë bëkëlë a dzal ziṅ, lëtoa dzam bò kilomèra awom ai ebè ai Yerusalem, dzal te atoa dzoe na Emmaus. 14Bëngazu hm të balèè bò a bò e mam mësë ya mëngabò ma. 15Ndò hm labò na, a bëlèègè ha, bëlaṅëdan, ndò Yesus azu bò kòb, angakë ai bò esamba. 16Mis maban mëmana bò kanga ha, bò tègè nyè yëm. 17Nyè ai bò na: Mam mëfe mëben mialaṅëdan ai mò a zen ma? Ndò baku bivol, mëlunga a nnëm a tuud. 18Ndò mbòg ayalan, (angabë dzoe na Kleopas) nyè ai nyè na: Yë wa etam onë nnëṅ a Yerusalem na wayëm ki e mam mabòban ete e mëlu ma nga? 19Nyè ai bò na: Mam mëfe? Bò ai nyè na: E ma matyan ai Yesus ya Nazaret. Yesus te angabë ngungul profèt a mimboan ai a nkòbò a mis më Zamba ai a mis më nnam osë; 20akyaè ya bëfada bënen ai bëtëbë bë osu, bëdzoe ban bakab nyè a ntol awu, ndò babome nyè a klos. 21Bia bingabë bifidigi na ṅnyè anë e mod azu kode Israel. Ndò hm fë, a e mam mësë ma, amos lala hi ngë mam mëte mëbò ana. 22Dzam da, bininga bëziṅ ya ngab dzan bëbede bia minnëm a yob: bëkun kë a sòṅ, 23ndò mbol bandzëki yen mbim woe, ndò bësò bia kad na bëyen benglès, mbò bëkad bò na avëë. 24Ndò bod bëziṅ ya esamba dzan bëkë a sòṅ, bëkòbò fë hë anë bininga bëdzo, dzam da emen ṅnyè tègè yen. 25Ndò adzo ai bò na: A e bod minë adid ai atòṅ nnëm ya ayëbë e mam mësë ya bëprofèt bëngakòbò! 26Nga Kristus angabë ayean dzugi mam mete, azu sòṅ nyian a duma die? 27Angatimi hm bò e mam matyan ai nyè a ntilan#24,27Biyòṅ biziṅ bili, bialaṅa Bibel na «Mfufub Ntilan», biyòṅ bifëe hë na «Ntilan». Dzom ziṅ yadaṅ ki tsende hala. osë, atarigi abë Moses ai bëprofèt bësë.

28Ndò bakui babi ai e dzal bëngabë këlë ete, ndò abò hë anë ayi kë ai dulu osu. 29Ndò bayag nyè a kiṅ, bò na: Tòbògò ai bia, amu ngoge engasus ya, ndò amos oyimbi ya. Ndò anganyian, atòbò ai bò. 30Ndò hm labò ha na, mbol angabë atoa ai bò a tëbëlë ha, ndò anòṅ mbaṅëla, afubu, abëgë, avëë bò; 31ṅyaan hm mis maban mayaaban hi, ndò bayëm nyè. Nyè adzaṅa bò a mis. 32Ndò badzo bò a bò na: Nga minnëm mihë dig bia a abum eyòṅ ahë lèè ai bia a zen, e kan ahë yaè bia ntilan? 33Awola te ben, ndò bakodo a si, bëdugan a Yerusalem, ndò bakòb bë awom ai mbògò ai e bod bëngabë ai bò bëtoa nkoan, 34bëkada na Nti atëbë fò a sòṅ bëbëla: Simun ayen nyè. 35Ndò bò fë balèè e mam ya zen ai mbol ya bëngayëm nyè eyòṅ abëgë mbaṅëla.

Yesus ayene bëyègè boe

Mt 28,16-20; Mk 16,14-18; Yoh 20,19-23; Bap 1,6-8

36Bëkòbògò e mam ma, antëlë bò a zaṅ, ndò adzo ai bò na: Mvoè ai mina. 37Mësis ai wòṅ bikuu bò a nyòl, bëtsogo na bayen kon. 38Nyè ai bò na: Dze miambara na? Ndò ki asu dze miasoo a minnëm mian? 39Bëbëgan mò mama ai mëkol mama. Mamen fò nyò! Namëngan ma, miyen, amu kon ebëlë ki nyòl ai bives akyaè ya miayen mëbëlë di. 40Akòbògò nala, ndò angalëdë bò mò ai mëkol. 41Mbol bëngabë të ṅyëbë asu mintag ya nnëm, bëkama fë, nyè ai bò na: Yë mibëlë e dzom ya adi ha? 42Ndò bavë nyè etun mbuman kòs. 43Ndò anòṅ, angadi bò a osu na. 44Nyè ai bò na: Bibug biama ya mëngakad mina hala mëngënë ai mina, na e mam mësë mënë ntilan a mvende Moses ai a bëprofèt ai bësalmen, mëtyan ai ma, mayean dzalëban. 45Ndò hm ayaè bò minnëm na bëwog ntilan. 46Nyè ai bò na: Eyë anë ntilan nala na Kristus ayi bi mintye, atëbë a bëkon a amos lala, 47abog te bëyedan mëyòṅ mësë avëṅan asu evaa minsëm a dzoe die. Atarigi a Yerusalem, 48mina minë bëbòòlò bë mam mëte. 49Ndò hm malom mina ekaa Tara. Mfa waan, tòbògan a tisòn ha ntye miabë ki bi ngul ya yob.

Akëlë-yob Yesus

Mk 16,19-20; Bap 1,9-11

50Ndò angakë ai bò a Betania, ndò abede mò a yob, angafubu bò. 51Ndò lazu bò na, eyòṅ angabë afubugu bò ha, ndò akaèn ai bò, anòṅëban a yob. 52Bò bëngalugu nyè. Ndò badugan a Yerusalem ai abui mintag, 53bëntoa a tempel kòm esë, bëluugu Zamba.

Currently Selected:

Lk 24: NTE12

Highlight

Copy