Lk 15

Nkana e man ntomba ya angadzaṅ

Mt 18,12-14

1Bënòṅò bë ntòlò bësë ai bësëm bëngabë bëzaag nyè babi na bavogolo nyè. 2Bëfarisea ai bësaṅa bëkalara bëngasòg nyè, bò na: E nyò asoan ai bësëm, adzaag fë ai bò! 3Ndò azu bò ku nkana vi, nyè na: 4Mod mbe ya abë mina, ngë abëlë mintomba ntèd, mbòg ya ete odzaṅa, ayi bò të lig mintomba mëwom ebul ai ebul mivòg a nkod-nnam, akëë atoṅ e hi onë ndzaṅan, akui anë ayen wò? 5Ṅnyie anë ayen wò, abede wò a mëban, angatag, 6asò a nda dzie, aloe bëmvoe boe ai bod bë ngòdò, nyè ai bò na: Fonan ai ma, amu mëyen ntomba wama ya ohë bë ndzaṅan. 7Makad mina na nala ngò mintag miayi bò a yob asu nsëmë mbòg ya avëṅan, alodo anë asu bësosoo mëwom ebul ai ebul ya bayaṅan ki ai avëṅan.

Nkana nsaṅ mòni ya ongadzaṅ

8Mininga mbe, ngë abëlë minsaṅ mi mòni awom, adzèè nsaṅ mbòg, ayi bò të nòṅ alamba, avoe nda, angatoan dzëṅ, akëlë kui anë ayi wa yen? 9Abog te ayi loe bëmvoe boe ai bod bë ngòdò, nyè ai bò na: Taan ai ma, amu mëyen nsaṅ mòni wama ya mëngadzèè. 10Makad mina, nala ngò mintag minë a zaṅ benglès bë Zamba asu nsëmë mbòg ya avëṅan.

Nkana e mòn ya angadzaṅ

11Nyè na, mod ziṅan gabë abëlë bòn bëbè. 12Ndò e nyò angabë mòngò ete adzo ai esya na: A tara, vaa ma e ngab akuma yakyëbë ai ma#15,12Mòn osë angabë dzam sili esya ngab-elig dzie hala esya abë ki wu. Dzam da, nala ongabë yenëṅe ki mbëṅ a mis më bod.. Ndò angamana bò kab akuma. 13A mvus ban mëlu, e mëligi-mvua nyò amana togan byem bie, ndò ayëm zen a nnam oyab, amana ndaman akuma die ai mbë enyiṅ. 14Amana angamana ndaman byem bisë, ndò mod zie angakui a nnam te, antoa a mëyaṅan. 15Ndò akë lad ai mod ziṅ ya nnam te, mod te alomo nyè a mëfub moe na akala ngoe#15,15Yuden bënë të namba ngoe. Nkana walëdë na e ndoman nyi engabi e mëyaṅan malod nyè nkoṅ. Anòni ngoe, ambëlë ozaṅ ya adi bidi bi ngoe!, 16angayi të du na adii ki të e bënyia mëkaba ya ngoe edzaag, tègè ai e mod avë nyè. 17Ndò abindi a nnëm woe ete, nyè na: Yë abim anë abui bësye bë tara bawu bidi hali, ma nyò mazu wu zie mu! 18Mazu tëbë#15,18Lukas adzo ha na e ndoman nyi yayi tëbë, amu e dzam angabò angabë hë anë mod ongaku mbëg, ndò hm ndoman te engadugan ya tëbë, akë ai dulu mfa esya anë., mëkë abë tara, mëkad nyè na: A tara, mëngabèan yob, mëbèan fë wamen, 19mayean ki fë na bëloe ma na nyò mòn. Bëlan ai ma anë mbòg ya bësye boe. 20Ndò atëbë a si, akëlë abë esya. Esya angayi nyè yen angënë oyab nali, ndò mëki matsig nyè a fyè; atye mbil, avëë nyè mò, ndò awuban ai nyè. 21Mòn nyè ai nyè na: a tara, mëngabèan yob, mëbèan fë wamen; makyëbë ki fë na bëloe ma na nyò mòn. 22Esya nyè ai bod bisye na: Zaan ai edud eyie yadaṅ nyëb abui, mibòdò nyè dzò, mibòdò fë nyè okene a wò, ai ngob a mëkol, 23mizu hm fë ai mòn nyag mëvòṅ, miwoe, abog te bidi, bibò abog. 24Amu e mòn wama nyò angabë ṅwuan, ndò angadugan ya nyiṅ; angabë ndzaṅan, ndò adugan yene. Ndò bëngatari na babò abog.

25Ntol mòn woe ongabë a afub. Eyòṅ angasubu babi a nda, angawog mëzik ai abog; 26ndò aloe mbò-esye mbòg, asili nyè mbol nala watyan. 27Mbò-esye nyè ai nyè na: Manyòṅ ṅnyè asò, ndò esoa atsig mòn nyag mëvòṅ mbol adugan nyè yen atoa mvoè. 28Awogo fò olun, të yi na anyian a nda. Ndò esya akui a nsëṅ, aloe nyè. 29Nyè ai esya na: Bëbëgë abim mimbu mësye ya wa, tègè wa daṅ tò mvende ziṅ, ndò wabë ya ki ma vë man ekëla asu yë na mëbò abog ai bëmvoe bama. 30Hë da eyòṅ e nyò mòn nyò ya amana ya wa di akuma ai bininga bë ebamba asò, owoe nyè man nyag mëvòṅ. 31Nyè ai nyè na: A mòn wama, wa onë ai ma abog asë, e dzom esë yawoge ai ma yawoge ai wa. 32Bihë yean bò abog, biwog mintag, amu e manyòṅ nyò ahë bë ṅwuan, ndò adugan ya nyiṅ, angabë ndzaṅan, ndò asòmban ya.

Currently Selected:

Lk 15: NTE12

Highlight

Copy