Yoh 6

Yesus avë bakuda bëtan bidi

Mt 14,13-21; Mk 6,30-44; Lk 9,10-17

1A mvus hala, ndò Yesus adaṅ a maṅ më Galilea, Tiberiad#6,1Maṅ më Tiberiad mmò fë mënë maṅ më Galilea; baloe fë mò na maṅ më Genesaret. Herodes Antipas ṅnyè angabonde tisòn Tiberias a ntsag ma, abòò fë na tisòn te ebò edzëdzala ya Galilea.. 2Mod nkunda angabë abyege nyè, amu bëngayen e ndëm angabò a nyòl minkokòn. 3Ndò Yesus abed a nkol, antoa hala ai bëyègè boe. 4Paska, abog Yuden, angabë babi. 5Abede Yesus angabede mis, ayënë na mod nkunda bod azu abë nyè, nyè ai Filipus na: Eyë biayi kus bëmbaṅëla ve na e bod ba bëdi? 6Ndë angabë akòbògò nala, abobolo nyè. Amu emen angabë të ayëmë e dzam ayi bò. 7Ndò Filipus ayalan nyè na: Tò bëmbaṅëla a taṅ minsaṅ mi mòni mintèd mibè bayi ki bò yean na mod osë anòṅ man etun. 8Ndò mbòg ya bëyègè boe, Andreas, manyaṅ Simun Petrus, adzo ai nyè na: 9Man mòngò anë ha, abëlë bëmbaṅëla bë ovug bëtan, ai mimbuman mi kòs mibè. Ndò hm ki, nala ngò onë dze asu abui bod di? 10Yesus nyè na: Toegan bod a si. Bilòg bingabë abui hom te. Ndò e bod ba bamana tòbò a si, bëtoa, dzam bò tòzin etan. 11Ndò Yesus anòṅ bëmbaṅëla, avëë ngaṅ, angakab e bod bëmbë toa a si, dzam dëda fë ai kòs, e taṅ bëyiig. 12Eyòṅ bëngadzie, ndò adzo ai bëyègè boe na: Koegan e bitun bimana ligi, asu yë na të dzom ziṅ yandaman. 13Ndò bëngakoan, bëdzala biad bitan ai bitun bëmbaṅëla bi ovug bitan bingaligi e bod bëdzaag. 14Ayen bod bëngayen e ndëm angabò nyi, bò na: E mod nyò ṅnyè fò anë e profèt ayean sòṅ a si-ndon bëbëla. 15Mbol Yesus ayëmë na bayi na bazu nyè bi asu yë na bëtele nyè nkukuma, ndò angakë a nkol a yob, nyè etam.

Yesus awulu a mëndim a yob

Mt 14,22-27; Mk 6,45-52

16Eyòṅ ngoge engasus, ndò bëyègè boe basus mfa ya maṅ, 17ndò babed a efunga, bëngakë a maṅ a yat, a Kafarnao. Ndò dibi lëngasus ha, hala Yesus abëki bò sòṅ bye. 18Maṅ mëngayobo fò ai mod nkulu evundu. 19Hala bësubu ya ai mal dzam bò kilomera etan, bëntala Yesus awulugu a maṅ, asubugu a mal mëngabë, bëngakòn wòṅ. 20Nyè ai bò na: Mamen, të miambara. 21Bëngayi na banòṅ nyè a efunga, ndò fò efunga yakui e hom bëngabë këlëg.

Yesus anë mbaṅëla enyiṅ

22E kidi lende ya hala, nkunda ongabë otëlë a maṅ oyab nali; bëngayen na efunga efë engabë ki ete, hë dzia, ai na Yesus andzëki kë ai bëyègè boe a efunga, hë da bëyègè mbò bëngakë etam. 23Bifunga bifë bingasò a Tiberiad babi ai e hom bëngadi bëmbaṅëla eyòṅ Nti angavë ngaṅ. 24Eyòṅ hm nkunda bod ongayen na Yesus asëki ete, tò bëyègè boe të ai bò, ndò babed a bifunga, mbò bakë a Kafarnao ba, bakë badzëṅ Yesus. 25Ndò batoban ai nyè a maṅ a yat bò ai nyè na: A Rabbi, osò kui mu abog afe? 26Yesus nyè ai bò na: Amen, amen, makad mina na: Miadzëṅ ma, së ki asu miyen ndëm, dzam da, mbol midi bëmbaṅëla, midzie fë. 27Syean e mbaṅëla andaman kig, hë atòbògò fò akui a enyiṅ kòm, a mòn mod ayi mina vë. Amu yë na, ṅnyè esya angakomodo. 28Bò ai nyè na: eyë binë dzam sye mimboan mi Zamba ya? 29Yesus nyè ai bò na: Esye Zamba enë na, miyëbë e nyò emen angalom. 30Bò ai nyè na: Ndëm fe wabò, asu yë na biyen, biyëbë fë wa? Wabò dze ben tug? 31Bëtara bò bëngadi hm manna a nkod-nnam, e kan enë ntilan na: Angavë bò mbaṅëla ya yob na bëdi#6,31Sal.78,24. 32Yesus nyè ai bò na: Amen, amen, makad mina na: së ki Moses ṅnyè angavë mina mbaṅëla ya yob, dzam da esya wama ṅnyè avë mina mfaṅ mbaṅëla ya yob. 33Amu yë na, mbaṅëla Zamba anë e mod asò a yob, avaa fë si-ndon enyiṅ. 34Bò ai nyè na: A Nti, nga wavë bia mbaṅëla te kòm esë! 35Yesus nyè ai bò na: Ma mënë mbaṅëla enyiṅ: e mod azu abë ma, ayi ki wog zie, ndò fë e nyò ayëbë ma ayi ki wog ekode tò eyòṅ. 36Dzam da, mbol mëkad ya mina, tò miafaṅan ma yen, miayëbë ki. 37E dzi esë Tara avë ma yayi sò abë ma, ndò fë mayi ki tsidan e nyò azu abë ma a nsëṅ, 38amu mëngasò a yob, së ki asu yë na mabò ṅyian wama, hë ṅyian e nyò angalom ma. 39Ṅyian e nyò angalom ma onë hm na, e dzi esë angavë ma, të madzèè dzò, dzam da, mëkuli dzò a sòṅ a amos mvua. 40Amu ṅyian Tara onë na: e nyò osë ayen mòn, ayëbë fë nyè, abëlë enyiṅ kòm, ma mëkuli fë nyè a sòṅ a amos mvua. 41Yuden bëngasog ai nyè mbol angadzo na: Ma mënë mbaṅëla ya asò a yob, 42bëngadzo na: Së Yesus, man Yosèf nyò a? Biayëm esya ai nyia a? Eyë angazu ya dzo ya na: Mëngasò a yob? 43Yesus nyè ai bò na: Mibë kë miasòg a zaṅ mina mina. 44Mod ziṅ asëki dzam sòṅ a bë ma, ngë e Tara angalom ma andzëki nyè dudu; ma mayi nyè kuli a sòṅ a amos mvua. 45Anë ntilan abë profèt na: Zamba ayi bò yëgëlë bò bësë#6,45Is.54,13. E mod osë awog e dzam lasò abë Tara, ayègè fë, azu abë ma. 46Asëki hala na mod ziṅan gayen ya Tara, ngë së ki e nyò asò abë Zamba, e nyòlò te angayen ya Tara. 47Amen, amen, makad mina na: e nyò ayëbë, abëlë enyiṅ kòm. 48Ma mënë mbaṅëla enyiṅ. 49Besoa bëngadi manna a nkod-nnam, bëwuu fë. 50E nyò anë mbaṅëla ya asò a yob, asu yë na e mod osë adi nyè abë wu. 51Ma mënë mbaṅëla avëë#6,51Yesus anë mbaṅëla avëë, amu anë ebug, atoa fë mëtunëṅa. ya asò a yob. Ngë mod adi mbaṅëla te, ayi nyiṅ kole, ndò fë mbaṅëla mayi vë anë nyòl dzama asu enyiṅ si-ndon. 52Yuden bëngasog bò bò ha, bò na: Eyë e nyò anë bia dzam vë nyòl dzie ya na bidi? 53Yesus nyè ai bò na: Amen, amen, makad mina na: Ngë miandzëki di nyòl mòn mod, minyuu fë mëki moe, miabëlë ki enyiṅ abë mina. 54E mod adi nyòl dzama, anyuu fë mëki mama, abëlë enyiṅ kòm, ndò fë mayi nyè kuli a sòṅ, a amos mvua. 55Amu nyòl dzama enë mimfaṅ bidi, mëki mama mëtoa mimfaṅ mënyu. 56E nyò adi nyòl dzama, anyaag fë mëki mama, atoa abë ma, ma fë abë nyè. 57E kan e Tara ya avëë angalom ma, ma mënyiṅi fë hë etòm Tara, e mod adi ma, ṅnyè ayi nyiṅ etòm dzama. 58E nyò ṅnyè anë mbaṅëla ya angasò a yob, së ki e kan bëtara bëngadi, bëwuu. E nyò adi mbaṅëla nyò, ayi nyiṅ a kòm ya kòm. 59Angakòbò e mam ma, ayëgëlë a sinagoge a Kafarnao.

Bibug bi enyiṅ kòm

60Mbol abui dzam ya bëyègè boe bëngawog, bò na: nkòbò hi onë alèd. Za anë wa dzam wog? 61Mbol Yesus angayëm na bëyègè boe balaṅëdan asu te, nyè ai bò na: Dze yë nala waandṅgele mina nga? 62Ngamëna ki eyòṅ miayi yen mòn mod abëdë mfa angabë osusua? 63Nsisim ngò wavë enyiṅ; nyòl esëki ai mfi. E bibug mëkad mina binë nsisim, bitoa fë enyiṅ. 64Dzam da, bod bëvòg ya abë mina bayëbë ki. Amu Yesus angabë ayëmë, atarigi fò a mëtari, e bod bayëbë ki, ai e mod angabë na akuan ai nyè. 65Nyè na: Asu te ndò mëkad mina na, mod ziṅ asëki dzam sòṅ a bë ma ngë Tara andzëki nyè vë ngul te. 66Asu te abui bëyègè bëngakodo nyè a esamba, tègè fë bad wulu ai nyè. 67Yesus nyè ai awom ai bëbè na: Dze, yë mina miayi fë kë? 68Simun Petrus nyè ai nyè na: A Nti, biayi kë abë za? Obëlë bibug bi enyiṅ, 69ndò bingayëbë ya, biayëm fë na wa onë Mfufubu Zamba. 70Yesus nyè ai bò na: Së ma mëngatòb mina awom ai bëbè a? Tò a hm nala, mbòg ya abë mina anë mbë nsisim. 71Angabë adzoo ai Yudas, mòn Simun Iskariot. Amu ṅnyè angabë ayi kuan ai nyè, nyè fë atoa mbòg ya bë awom ai bëbè.

Currently Selected:

Yoh 6: NTE12

Highlight

Copy