Yoh 5

Yesus abò mod mvoè a etam mëndim

1A mvus hala, abog Yuden angabë, ndò Yesus abed a Yerusalem#5,1Yesus akarëga kë a mëbog a Yerusalem.. 2A Yerusalem, a mbè mintomba, etam ziṅ enë, baloe dzò a nkòbò ebrea na Betsada; enë ai mimbè mitan. 3Abui minkokòn, mindindim, mimbombog, mingabë toa etere. [ 4#5,4 Amu englès Zamba akarega sus ai mebog a etam mendim, mendim mëngafonan.E mod osu atari sus a mendim a mvus ye na mafoṅan, asyeban okòn ose abëlë. ] 5Mod ziṅan gabë hala, okòn woe otòbò ya mimbu mëwom mëlè ai ebu. 6Eyòṅ Yesus angayen nyè atoa hala, ayëmë fë na atòbò ya nala kòm, nyè ai nyè na: Yë wayi na wabò mvoè? 7Nkokòn wò ai nyè na: mabëlë ki e mod akë ai ma a etòg, eyòṅ mëndim mëngafoṅan ya: eyòṅ esë makë kui, hë mod mfë atari ya sigi we. 8Yesus nyè ai nyè na: Tëbëgë, nòṅò enòṅ dzoe, owulu. 9Etye etye te, e mod nyò abò fò mvoè, ndò anganòṅ enòṅ dzie, angawulu. Amos te ongabë amos sabbat. 10Yuden bò ai e mod angabò mvoè nyò na: Ana onë sabbat, ndò wabëlë ki ngul ya abëgë enòṅ dzoe. 11Nyè ai bò na: E mod abò ma mvoè, ṅnyè akad ma na: Nòṅò enòṅ dzoe, owulu. 12Ndò basili nyè na: Mod mbe akad wa na: Bodogo enòṅ, owulu? 13E mod angasyeban angabë ayëmë ki, amu Yesus angasolan ai abui nkunda angabë hom te. 14A mvus hala, ndò Yesus atoban ai nyè a tempel, nyè ai nyè na: Wa nyòlò obò ya mvoè, të hm fë wabad sëm, mbë dzam alodo nala aza toban ai wa. 15E mod nyò akodo hala, akë lèè Yuden na Yesus ṅnyè angabò nyè mvoè. 16Yuden bëkaè hm na basiṅ Yesus mbol angabò e mam ma a amos sabbat. 17Yesus angayalan bò na: Tara#5,17-18Yesus adzo na Zamba anë esya, nala watyan na anë man Zamba. angënë asye, azaag kui etoa dzi, ndò fë ma, masye. 18Bëngadzëṅ dzëṅ abui na bawoe nyè etòm dzi na, ṅnyè asolege sabbat, ṅnyè adzo na Zamba anë esya woe, nala ontoa na, bò Zamba bënë nkoṅ.

Mòn abëlë ngul edzoe

19Yesus nyè ai bò na: Amen, amen, makad mina na: Mòn asëki dzam bò dzom ziṅ ai emen, ngë andzëki yen esya abò dzò. E mam esya abò, nala ngò fë mòn abò mò. 20Amu yë na, esya adiṅ mòn, ndò angalëdë nyè e mam abò, ndò fë ayi nyè lëdë mëfë alodo nala, asu yë na mikam. 21Amu, e kan ya esya ahëlë mimbim, avaa enyiṅ, nala ngò fë mòn avë e nyò osë ayi na avë enyiṅ. 22Amu, tò esya abò ki mod ziṅ nkat, dzam da, angavë mòn woe nkat osë, 23asu yë na bod bësë bëkam mòn anë bakam esya. E mod akam ki mòn, akam ki tò esya ya angalom nyè. 24Amen, amen, makad mina na e mod awog ebug dzama, ayëbë fë e nyò angalom ma, abëlë enyiṅ kòm, ndò fë akë ki a nkat, dzam da, alod ya a enyiṅ, asòò a awu. 25Amen, amen, makad mina na, awola lazu, ndò ben hm di, a bëwu bayi wog kiṅ mòn Zamba, ndò e ba bayi wog bayi nyiṅ. 26Amu, e kan esya abëlë enyiṅ abë emen, nala ngò fë angavë mòn nala na abëlë enyiṅ abë emen. 27Ndò angavë nyè ngul ya abò nkat, amu anë mòn mod. 28Të miakam dò, amu awola lazu a e bod bësë bënë a mësòṅ bayi wog kiṅ dzie, 29abog te e ba bëngabò mbëṅ bayi kui, bëkëlë a akui-lë-sòṅ enyiṅ, e ba ki bëngabò abe, a akui-lë-sòṅ nkat. 30Mabëlë ki ngul ya abò dzam ziṅ ai mamen. E kan mawog, ndzò mabò nkat, ndò nkat wama onë sosoo, amu maadzëṅ ki ṅyian wama, madzëṅ hë ṅyian e nyò angalom ma.

Bëbòòlò bë Yesus

31Ngë mabòòlò mamen, mbòòlan wama osëki mfaṅ. 32Mod mfë#5,31-39Yesus abëlë abui bëwusnèt: Yohannes, mimboan mie, esya, Mfufub Ntilan. abòòlò ma, ndò mayëm na, mbòòlan abòòlò ma, onë mfaṅ. 33Mina bëben mingalom bod abë Yohannes, ndò angabòòlò sosoo. 34Mfa wama, manòṅ ki mbòòlan wama abë mod, dzam da makad e mam ma asu yë na mikodëban. 35Angabë alamba layoṅ, afyè fë, ndò mingayi na miatag etun abog a mfyè woe. 36Mfa wama, mëbëlë mbòòlan walod Yohannes: E mimboan Tara angavë ma na mëdzala miè, mimboan mite ya mabò, miabòòlò ma na Tara angalom ma. 37Ndò fë, e Tara angalom ma, angabòòlò asu dama. Miabë ya ki wog kiṅ dzie, tò ki ayen asu die, miabë ya ki yen, 38ndò fë ebug dzie etoa ki abë mina, amu miayëbë kiṅ e nyò angalom. 39Miasoṅ mfufub Ntilan, amu miatsog na miayi bëlë enyiṅ kòm etere. Ndë ngò wabòòlò ma. 40Ndò fë miayi ki na miazu abë ma asu yë na mibi enyiṅ. 41Manòṅ ki olugu a bod, 42dzam da, mazuzu ya mayëm mina na miabelë ki ediṅ Zamba abë mina. 43Mëngasò a dzoe tara, ndò miasoan ki ai ma. Ngë mod mfë akë sòṅ a dzoe die, misoan ai nyè. 44Eyë minë dzam ṅyëbë ya, eyòṅ mianòṅan duma a mina mina, dzam da të dzëṅ duma mbaṅ mòn Zamba? 45Të miakë tsog na ma mayi mina sòman abë Tara. E mod ayi mina sòman, ṅnyè anë e Moses ya mingafidi. 46Ngë miyëbëgë Moses, ngë miayëbë fë ma. Amu angatil atyan ai ma. 47Ngë miayëbë ki ntilan woe, eyë miayi ṅyëbë bibug biama ya?

Currently Selected:

Yoh 5: NTE12

Highlight

Copy