Yoh 21

Yesus ayene bëyègè boe zamgbal#21,1-25Bëngatil nlo kalara hi a mvus yë na Yohannes amana ya til nguma kalara mbëmbë foe woe.

1A mvus hala, ndò Yesus angadugan yene bëyègè a ntsag maṅ më Tiberiad. Na ngò angayene. 2Simun Petrus ai Tomas ya anë mëbëdan na Didimos ai Natanael ya Kana ya Galilea ai bòn bë Zebede, ai bëyègè bëfë bëbè bëngabë fufulu. 3Simun Petrus nyè ai bò na: Makë a nlòb#21,3A mvus abog Paska, bëyègè bëngadugan a Galilea, bëdugan tari na babò esye dzaban ya osusua.. Bò ai nyè na: Bia fë biazu ai wa. Ndò bakui, bëbëdë a efunga, ndò bandzëki bi dzom alu te. 4Ai kikidigi ai ndib, Yesus antëlë a kindig, dzam da bëyègè bëngabë ki bëyëmë na Yesus. 5Ndò hm Yesus adzo ai bò na: A bòngò, yë mibëlë man mbuman kòs? Bò ai nyè na: Kokoa. 6Nyè ai bò na: Woagan mvunda mfag wò mbo-nnomo ya efunga, miayi bi. Ndò bawoa, tègè fë ai ngul ya alindi dzò asu abui kòs. 7Ṅyègè ya Yesus adiṅi nyè ai Petrus na: Nti! Simun Petrus angayi wog na Nti, ndò afaṅ sanda, amu angabë nsò, asuman a maṅ, 8e bëyègè bëvòg bësòò ai efunga amu bëngabë ki oyab ai nkot si, dzam bò yat ntèd, bazu balindi mvunda kòs. 9Eyòṅ bëngasus a si, bëntala ndoan maag ai mbuman kòs ete ai mbaṅëla. 10Yesus nyè ai bò na: Zaan ai e kòs mindëm bi etoa dzi. 11Petrus abëdë, alindi mvunda a si, etoa ndzalan ai bod bë kòs ntèd ai mëwom mëtan ai elè. Afyaṅan bò na engabë abim abui te, mvunda të nyabi. 12Yesus nyè ai bò na: Zaan tsam akag. Tò mbòg ya a bëyègè boe të nyè zombo sili na: Wa onë za? Bëyëmë na Nti. 13Yesus asòòg, ndò anòṅ mbaṅëla, avëë bò, ai mbuman kòs dzam dëda. 14Nala ongabë eyòṅ lala Yesus ayenëṅe bëyègè boe ngë atëbë a bëkon.

Yesus ban Petrus

15Eyòṅ bëtsama akag ha, Yesus nyè ai Simun Petrus na#21,15-17Yesus asili Petrus biyòṅ bilè na yë adiṅ nyè, mbol ayëm na Petrus angasie nyè biyòṅ bilè.: A Simun man Yohannes, yë wadiṅ ma alodo eba? Nyè ai nyè na: Owe a Nti, wayëm na madiṅ wa. Nyè ai nye na: Nònëṅi mintomba miama. 16Ndò adugan nyè kad eyòṅ bèè na: A Simun man Yohannes yë wadiṅ ma? Nyè ai nyè na: Owe, a Nti, wayëm na madiṅ wa. Nyè ai nyè na: Nònëṅi bënyia mintomba bama. 17Ndò akad nyè eyòṅ lala na: A Simun man Yohannes, yë wadiṅ ma? Petrus antoa fò a mëlunga na asili nyè eyòṅ lala na: Yë wadiṅ ma? Nyè ai nyè na: A Nti, wayëm mësë, wayëm na madiṅ wa. Yesus nyè ai nyè na: Nònëṅi bënyia mintomba bama. 18Amen, amen makad wa, eyòṅ ongabë ntëgan, ofaṅa wamen eyie, okëlë mfag wadiṅ. Eyòṅ wayi yombo, wayi sam mò moe, mod mfë abòdògò wa, akëlë ai wa mfag wayi ki. 19Akòbògò nala, avaa mvulna akyaè awu ya ayiigi vë Zamba olugu ete. Ṅnyie anë angadzo nala, nyè na: Biege ma.

Yesus ban ṅyègè ya Yesus adiṅi

20Petrus avëṅan ai mvus, ndò ayen ṅyègè Yesus adiṅi, atoṅo bò -ṅnyè angabombo nyè a toe a bidi bi ngoge, nyè ai nyè na: A Nti, za ayi kuan ai wa?- 21Ayen hm Petrus angayen nyè, nyè ai Yesus na: A Nti, mfag enyò ki ya? 22Yesus nyè ai nyè na: Ngë mayi na alaṅan akëlë kui anë madugan zu, dze yabëbë wa ete? Mfag woe, biege ma. 23Foe eyaman hm fò a zaṅ babënyaṅ na ṅyègè te ayi ki wu. Yesus nyè andzëki dzo na ayi ki wu, angadzo hë na: Ngë mayi na alaṅan akëlë kui anë mazu, dze yabëbë wa ete? 24Enyò ṅnyè anë ṅyègè ya abòòlò mam mete, ndò fë angatil mò, ndò biayëm na mbòòlan woe onë bëbëla. 25Mam mëfë mënë abui a Yesus angabò. Ngë bëhë til mò mësë, matsog na tò si esë tègè ai afola asu bëkalara bëte.

Currently Selected:

Yoh 21: NTE12

Highlight

Copy