Bap 9

Saulus avëṅan man kristen a zen ya Damaskus

1Saulus antoa hë na andëgëlë bëyègè bë Nti, awoe fë bò. Ndò akë abë fada nen, 2adzaè nyè bëkalara asu mënda bikoan ya Damaskus#9,2 Damaskus anë tisòn ya nnam Siria. «Zen» engabë mkpamaṅ dòkten bëkristen. na, ngë ahë kòb bod bëziṅ bëbòò adzo zen, tò fam tò bininga, atindi bò ngadag, asò ai bò a Yerusalem. 3Abog akëlë ha, hala akui ya babi a Damaskus, etye etye na, ndò mfyè ongasò a yob, okuban nyè a nyòl hë anë zeyaṅ, 4ndò angaku a si, angawog kiṅ edzoo ai nyè na: A Saulus, a Saulus, a dze waluman ai ma? 5Nyè na: Wa za, a Nti? E nyò mbòg nyè na: Ma mënë e Yesus waluman ai nyè#9,5 Yesus ayen na e bita ya baluman ai bëyègè boe bialuman ai nyè emen.. 6Ndò hm, kodogo a si, onyian a tisòn; bayi wa kad e dzam wayean bò. 7E bod bëngabë ai nyè a zen ha bëngalaṅan mënyu mëyoo, bëwogo hë kiṅ, të yen tò mod. 8Ndò Saulus angatëbë a si; eyòṅ mis mëngayaaban nyè, të fë yen dzom. Bëngakë ai nyè, bëbëlë nyè a wò, ndò banyian ai nyè a Damaskus. 9Ndò angatòbò nala, mëlu mëlè, të yen, të di, të nyu.

10Ṅyègè ziṅan gabë a Damaskus, dzoe na Ananias; ndò Nti angadzo ai nyè a nlo na: A Ananias! Nyè na: Ma nyò, a Nti. 11Nti ai nyè na: Tëbëgë, okë a ndzòṅ baloe na tëtëlë ndzòṅ, odzëṅ mod dzoe na Saulus ya Tarsis#9,11 Tarsis angabë edzëdzala ya Silisia (Yënë afëb 721). Awe ngò Paulus angabyali., a nda Yudas. Amu akogëlan, 12ndò ayen mod a nlo dzoe na Ananias, mod te anganyian, abedëge nyè mò asu yë na adugan yen.#9,12 Yënë afëb 722 13Ananias nyè na: A Nti, mëwog ya abui bod bëkòbògò adzo e mod nyòlò, e bëbe bë mam bësë abò mimfufub#9,13 Mimfufub minë bëkristen, Bënë mimfufub asu ṅduan. mie a Yerusalem. 14Ndò fë bëfada bënen bavë nyè ngul ya abi e bod bësë baloe dzoe doe mu. 15Nti ai nyè na: Këlëg, amu mod te anë ntòban na abëgë dzoe dama a bëhaiden, ai minkukuma, ai bòn bë Israel. 16Amu mayi nyè lëdë e mam mësë ayi dzugi asu dzoe dama. 17Ndò Ananias angatye, anyian a nda, ndò abede nyè mò, nyè na: A Saulus, a madzaṅ, Nti alom ma, e Yesus ayene wa a e zen ozaag, asu yë na odugan yen, odzie fë ai Mfufub Nsisim. 18Etye etye na, byem bingasòdan nyè a mis anë bibas, angadugan yen. Ndò angakodo a si, aduuban. 19Ndò angadi bidi, anòṅò ngul.

Saulus ayedan mbëmbë foe a Damaskus

Angatòbò ai bëyègè ya Damaskus hala ban mëlu; 20Etye etye na, angayedan Yesus a mënda-bikoan na ṅnyè anë mòn Zamba. 21E bod bësë bëwogo nala bëngakam, bò na: Së e mod nyò ṅnyè angabë amanëṅa e bod baloe e dzoe di ai si a Yerusalem a? Së asu te ndò asò ha na azu bò faṅ ngadag, akë ai bò a bëfada bënen a? 22Ngul engafëdan naṅ Saulus a nyòl, angatoe Yuden ya Damaskus biboṅ, alëdëgë bò na Yesus ṅnyè anë Kristus mfaṅ.

23A mvus ban mëlu hala, ndò Yuden bëngawoe oyili na bawoe nyè#9,23 Bëngadzëṅ na bawoe Paulus eyòṅ angabë we eyòṅ bèè.. 24Ndò Saulus angayëm oyili waban. Bëfòmbògò mimbè mi dzal ai alu, ai amos, asu yë na bëwoe nyè. 25Ndò bëyègè boe bënganòṅ nyè ai alu asë, ndò basuu nyè ai mfim osë a nkoe etere.

Saulus anë a Yerusalem

26Eyòṅ angakui a Yerusalem, ndò angadzëṅ na anyian bëyègè a nyòl; hë da bò bësë bëmbarëga nyè, bò të ṅyëbë na anë ṅyègè. 27Ndò Barnabas anganòṅ nyè, akëlë ai nyè abë apostel, ndò angamana bò lèè akyaè angayen Nti a zen a yob ai mbol angakad nyè, ai mbol angakòbò ai fim esë a dzoe Yesus. 28Ndò angakaè na akë ai bò fufulu, asë ali, anë ali, a Yerusalem ha, akòbògò ai fim esë a ngul dzoe Nti, 29angalèè, alaṅëdan ai Yuden bë Grek, bëngadzëṅ na bawoe nyè. 30Ayëm babënyaṅ bëngayëm nala, ndò basigi ai nyè a Sezarea, bëlomo nyè a Tarsis.

31Ekoan nda-Zamba engabë a saaṅ a Yudea asë, ai a Galilea ai a Samaria, eloṅëban, ewulugu, ekama Nti, ebuguban ai nkëan Mfufub Nsisim.

Petrus abò Aineas mvoè

32Ndò hm labò ha na, Petrus akëlë awulu ha, ndò angasigi mfag e mimfufub ya mingabë a Lidas. 33Ndò angakòb mod ziṅ we, dzoe na Aineas, e mod nyò amana ya bò ntèd ha, abombo ya a enòṅ ha bisëb mwom. 34Ndò Petrus adzo ai nyè na: A Aineas, Yesus Kristus abò wa mvoè. Kodogo a si, wamen okom enòṅ dzoe. Etye etye te, ndò angatëbë. 35Ndò bod bësë ya Lidas bëngayen nyè, tò e ba ya Saron, ndò bëngavëṅan, bëngayëbë Nti.

Petrus ahëlë mbim Dorkas

36Mininga ziṅan gabë a Yopa#9,36 Yopa angabë tisòn ya maṅ. Baloe dzò ana na: Yaffa., dzoe na Tabita, nala watyan na: Ngòn nkògò. Angabë abòò abui mimbëmbë mi mam, atoa fë akab abui. 37Mëlu mëte, ndò angakòn abui, awuu. Ndò hm bëngamana nyè wòbò, bëboe nyè a nda-yob. 38Mbol ya Lidas anë babi ai Yopa, awogo bëyègè bëngawog na Petrus anë we, ndò balom nyè bod bëbè, bëngakogëlan ai nyè na: Zaag të a binë, të tigibi. 39Ndò Petrus angakodo a si, akëlë ai bò. Eyòṅ angakui a ete, ndò bakë ai nyè a nda-yob; minkus misë mitëtëlan nyè babi, miyono, bëngalëdë nyè biwòman ai biyie bisë ya Dorkas angatiṅ eyòṅ angabë ai bò; 40Ndò Petrus angakuli bësë a nsëṅ, ndò akud mëbòṅ, angakogëlan, ndò akilan mfag mbim ongabë, nyè na: A Tabita, tëbëgë. Ndò Tabita ayaè mis, ayënë Petrus, akomo etoa. 41Ndò asam nyè wò, atëlë nyè a si. Ndò azu loe mimfufub ai minkus, atëlë nyè bò a zaṅ, atala. 42Ndò adzo di angayëmëban a Yopa asë, abui bod bëyëbë Nti. 43Ndò angabombo ban mëlu a Yopa abë Simun, nkomo bikop.

Currently Selected:

Bap 9: NTE12

Highlight

Copy