Bap 2

Asò-lë Mfufub Nsisim

1Ndò hm, eyòṅ lëngabò na amos Pentekoste#2,1Pentekoste angabë mod ngul abog a mvus Paska. Ebug Pentekoste yatyan na «e nyò mëwom mëtana», asu bëdzemëṅe abog te mëlu mëwom mëtan a mvus Paska, asu yë na bakaṅ Zamba asu mëkoe bidi. Pentekoste angabë abog mëkoe bidi ai abog ya Zamba angavë ayòṅ die mvende a nkol Sinai. ongazu ya mana, bò bësë bëntoa hom mbòg. 2Etye etye na, ndò eduṅ engasò a yob, hë anë mod nkulu, ndò engadzie nguma nda osë bëngabë bëtoa ete, 3bëngayen ayëm lakë lakaban anë ndoan, angatòbò anë mod osë ya abë bò a nlo a yob, 4ndò bò bësë bëngadzie ai Mfufub Nsisim, bëtari hm na bakòbò a minkòbò mifë#2,4Abui minkòbò anë ndëm yë na Ebug Zamba enë asu mëyòṅ mësë., e kan nsisim ongabë obò na bëfala nkòbò. 5Yuden bëngabë bëtoa a Yerusalem, bëtoa bod bë ṅyëbë, bësòò a mëyòṅ mësë ya si. 6E mod eduṅ nyò angayi bò, mod nkunda bod abugi fò ha, bëmana koan, bëngakam, amu anë mod awogo bò anë bakòbò nkòbò woe. 7Fëg engadzaṅ fò bò, bëngakam, bò na: «Nga e bod bësë bakòbò ba bënë bod ya Galilea? 8Ndò eyë anë ya na biawog bò, anë mod a nkòbò waan ya bingabyali ai wa? 9Bia ha bod ya Partia ai Medina, bod ya Elam, ai e ba bëtoa a Mezopotamia, a Yudea ai a Kapadokia, a Pontus ai a Azia, 10Frizia ai Pamfilia, Egipten, bod ya basò a mfag Libia ya Sirena, ai e bëyëṅ basò a Roma, 11Yuden ai e ba bëngavëṅan a ṅyëbë Yuden, Kreta ai Arabia, biawog bò bëkòbògò minkòbò mian, bëlèègè biyëṅ bi mam bi Zamba». 12Fëg edzaṅa fò bò, bënzëmë, bëngadzo, anë mod ai e nyò mbòg na: «Na ngò watyan ya ana?» 13Bëvòg bëngamgbali fò bò, bò na: «Bënë mbilan wayn».

Petrus anòṅ nkòbò a amos Pentekoste

14Ndò Petrus angatëbë a si ai bë awom ai mbògò, ndò avë kiṅ, nyè ai bò na: «Mina e Yuden ai e bod bësë mitoa a Yerusalem, yëman e dzam di, mivogolo fë bibug biama. 15Amu së ki anë mbol miatsog na e bod ba basòg mëyòg, (amu bingënë bibëlë hë awola lala ya amos#2,15Awola lala ya amos angabë mëwola ebul kikidigi. Yënë fë afëb 695), 16hë da, dzam te ndò profèt Yoel angakòbò na: 17Layi bò na, a mëmos më mvua, Zamba ṅnyè akòbò nala, mayi soe Mfufub Nsisim wama abë mod osë, abog te bëndoman baan ai bëngòn baan bayi kèè na bakòbò anë bëprofet, binanga bian biayi yen mam a nlo, minnom mingayen biyëyëm a nlo; 18abog te ma mayi soe nsisim wama a nyòl bësye bama, fam ai bininga, mëmos mëte, bëngakòbò anë bëprofet. 19Mayi bò biyëṅ bi mam a yob ete, ai mëndëm a si, mëki ai ndoan ai nkut otsida. 20Nlo-dzobo ayi vëṅan dibi, ngòn evëṅan mëki, osusua yë na amos duma ai amos nen Nti wazu. 21Ndò layi bò na, e mod osë ayi loe Nti ayi kodeban#2,21Yoe 2,28-32.. 22A bod ya Israel, vogolan e bibug bi; E Yesus man Nazaret ya Zamba angatele mina a zaṅ ai mimboan mi ngul, ai biyëṅ bi mam, ai e mëndëm Zamba angabò a mò moe a zaṅ dzaan, akyaè ya mina bëben miayëm, 23Yesus te ṅnyè mingawoe, mibomë nyè a klos a mò më e bod bayëm ki mvende, abog ya angatilban, Zamba ayëmë fë nala, ndò angavë mina nyè, 24ṅnyè hm Zamba angakuli a sòṅ, atii angatii mësuṅ më awu, mbol awu angabë ki nyè dzam bi nkom. 25Amu David adzo asu die na: Mayen Nti atëlë ma osu abog asë, amu atëlë ma a mbo-nnomo na mëzaa nyaman. 26Asu te nnëm wama wafon, oyëm wama otaga, alodo anë nyòl dzama yanyiṅ ai afidi, 27amu wayi ki ma voan nsisim a bëkon, tò ki na odzoge na mfufubu woe aboe a si. 28Ongalëdë ma mëzen më enyiṅ, wayi ma dzala ai mintag a mis moe#2,28Bs 16,8-11. 29A babëdzaṅ, dzogan ma mëtoan mina kad adzo tara David bëbëla na, Angawu, adzëban, ndò fë sòṅ dzie enë abë bia azaag kui amos hi. 30Mbol angabë profèt, ndò angayëm na Zamba angakani nyè sòṅ na mod ya abum die ayi tòbò a etoa-edzoe dzie#2,30: Bs 132,11; 2Sam 7,12-13. 31Mbol angayen dò osusua, ndò akòbò adzo akui-lë sòṅ Kristus na: Ayi ki laṅan a tolendoṅ, ndò fë nyòl dzie yayi ki boe a si#2,31Bs 16,10. 32Yesus te ṅnyè Zamba avëlë a bëkon, ṅnyè bia bësë binë bëbòòlò boe. 33Mbol mbo-nnomo Zamba angabede nyè, ndò anganòṅ ekaa Mfufub Nsisim abë esya, asoe nyè, akyaè ya miayen, miwogo fë di. 34Amu, tò anë David andzëki bed a yob, adzo na: Nti angadzo ai Nti wama na: Tòbògò ma a mbo-nnomo 35akëlë kui anë mabò minziziṅ mie etele mëkol dzoe#2,35Bs 110,1. 36Ndò hm, nda-bod esë ya Israel eyëmë na e Yesus ya mina mingabomë a klos, ṅnyè Zamba atele Nti ai Kristus». 37Awogo bëngawog nala, nnëm ongakod bò a abum ha, bò ai Petrus ai apostel bëvòg na: «Bibò hm ya, a babëdzaṅ?» 38Petrus nyè ai bò na: «Tsendëgan, mod osë ya abë mina aduuban a dzoe Yesus Kristus#2,38Bëngabë duu bod a dzoe Esya, ai Mòn ai Mfufub Nsisim. Petrus adzo ha na ṅduan a dzoe Yesus, asu yë na të bod batsog na ṅduan Yohannes wakë osu. asu evaè minsëm dzaan, abog te miayi bëlë efaè Mfufub Nsisim. 39Amu, mina, ai bòn ban, ai e bod bësë bënë oyab, ai e taṅ bod esë Nti Zamba waan angaloe, mina minë ai ngaga». 40Angabë hm fë alëbë bò, akòbògò ai bò nala ai abui bibug afë, nyè na: «Mikodeban ya a zaṅ e mvòṅ bod dzongo nyi». 41E bod ba bëyëbë fò ebug dzie, bëduuban, ndò bod bëngabagëban bò a yob amos te dzam bò bakuda bëlè. 42Bëngabë mban a ayëgëlë apostel, bëtoa ai bò fufulu, tò a mbëgan mbaṅëla#2,42Mbëgan mbaṅëla onë mimfufub mëtunëṅa. Apostel bëkarëga koan na babëg mbaṅëla fufulu, dzam da, bëkarëga fë di zëzë bidi fufulu, bidi bi anyaṅ, bëloege biè na «Agapè»., tò a ngogëlan. 43Mod osë angabë hë wòṅ, abui biyëṅ bi mam ai mëndëm bibòòban a mò bë apostel. 44E bod bësë bëyëbëgë bëngabë hom mbòg, bëbëlë dzom esë fufulu, 45bëngabë manëṅa kuan ai akuma, ai byem bi mò biaban, bëngakab biè a zaṅ bò a bò ha, anë mod, abim ayaṅan ai dò. 46Amos osë, bò bësë, nnëm mbòg mbòg, bëkëlë a tempel#2,46Bëkristen bë osu bëkarëga toban a tempel ai a mënda mënda. Bëbaala mëmvende më Yuden., bëbëgë mbaṅëla a mënda maban, bëkaban bidi ai mintag, ai dzin a nnëm, 47bëluugu Zamba, bod bësë bëkama bò. Nti abaag bò e bod bëkodeban a yob amos osë.

Currently Selected:

Bap 2: NTE12

Highlight

Copy