Bap 12

Bawoe Yakob, bëfudi Petrus a mbog

1Dzam bò abog te, ndò nkukuma Herodes#12,1E Herodes nyò angabë ndie Herodes nen. Angabë fë dzoe na Herodes Agrippa osu. angafod bod ya nda-Zamba mò a nyòl na andëgëlë bò. 2Ndò angawoe Yakob#12,2Yakob, manyaṅ Yohannes, mòn Zebede., manyaṅ Yohannes, ai nyamëla okëṅ. 3Mbol angayen na nala waanyëb Yuden a nnëm, ndò hm angakë ai nala osu, abò na bëbi Petrus (Engabë a mëlu më mbaṅëla saṅ); 4Abi angabi nyè, ndò afudi nyè a mbog, avëë nyè bikoa bëzimbi binyii na bëkala nyè, amu ayii na avë nyè nnam a mvus Paska. 5Ndò hm bëngabaala Petrus a mbog ha. Nda-Zamba engakogëlan hm fò ai Zamba asu die ha abui.

Englès akuli Petrus a mimbog

6Abog angakui na Herodes angayi ya na alëde nyè a nsëṅ, alu te aben, Petrus akëlë oyò a zaṅ bëzimbi bëbè, atoa mfaṅ a n a mësuṅ mëbè, bënòni bëkalëga a mbè a yob. 7Ndò englès Nti angasò, mfyè ongafyè a nda ha. Ndò akud Petrus a avël, ahëlë nyè, nyè na: Kodogo a si avol; Ndò mësuṅ mëngasòdan nyè a mò. 8Englès nyè ai nyè na: Tindigi kanda a angëdëg, obòd fë ngob dzoe. Ndò abò nala. Nyè ai nyè na: Bòdò ewòman dzoe, obie ma a zut. 9Ndò angakui, angabie nyè, të yëm na e mam mayënan ma ai englès mënë bëbëla. Angabë atsogo na ayen a nlo. 10Ndò azu lod abë nkala osu, ai e nyò bèè, bëngakë a mbè bikye wakë a tisòn, ndò ongayaaban ai oben, bëkui, bëngakë a ndzòṅ ziṅ; etye etye na, englès aligi nyè. 11Petrus atomo nyòl, nyè na: Mëyëm ya bëbëla na Nti alom englès woe, ndò akode ma a mò më Herodes, ai a e dzam nnam Yuden ohë lam. 12Eyòṅ angatoan yëm nala, ndò akë a nda Maria, nyia Yohannes#12,12Yohannes Markus: Manyaṅ Barnabas. Angabë eyòṅ ai Barnabas ban Paulus a esye misòn. ya baloe na Markus, mfag abui bod bëngamana koan, bëkogëlan. 13Ndò angakud a mbè ya nsëṅ, ndò man mininga bisye dzoe na Roda angazu a mbè ; 14Ayëm angayëm kiṅ Petrus, ndò andzëki yaè mbè ai e mintag mimbë bëlë nyè, adugan dugan mbil a nda, ndò akad bò na Petrus atëlë a mbè a nsëṅ. 15Ndò badzo ai nyè na : Wakòn a nlo ! Nyè të hë ayin na adzo te anë ete. Bò na : Englès woe nyòlò. 16Petrus nyè anë hë akud a mbè. Ndò bayaè, bëyënë nyè, bëngakam. 17Ndò avë bò ndëm ai wò na bëku bivol, angalèè bò mbol Nti angakuli nyè a mbog, nyè na : Kaṅan kad Yakob#12,17Yakob mòngò, mòn Alfeus, angabë manyaṅ Yesus. Ṅnyè angabë e bisòb osu ya Yerusalem. ai babëdzaṅ e mam ma. Ndò angakui, akëlë hom mfë.

18Ai mëlende më kidi, ndò mod enyënyam angabò a zaṅ bëzimbi ha, bësiligi e dzam ayenan ai Petrus. 19Herodes nyè na bëkë badzëṅ nyè. Mbol hm bëngabò tègè nyè yen, ndò akaè na asili bëzimbi minsili ; avëë abende na bëwoe bò. Ndò akodo a Yudea, akëlë a Sezarea, antoa we.

Herodes awu

20Angabë awogo mbë olun ai bod ya Tir, ai e ba ya Sidon. Ndò bò bësë bakui kiṅ dzia ha, bësò nyè yen, hala te bëmana ya kom ai Blastus, e mod asye a etun-nda nkukuma, ndò basili na bakom etòm a evovoe, mbol eyë bidi bisòò a nda nkukuma asu dzal daban. 21Amos ya bëngayili, ndò Herodes angabòd biyie bi nkukuma, ndò atòbò a etoa edzoe, angakòbò ai bò, 22bod bëngabam, bò na: Kiṅ Zamba, së ki enyi mod! 23Etye etye te ndò englès Nti angabimi nyè, etòm ya na andzëki vë Zamba duma; Bitum bingadi nyè, ndò angasuu ṅhëbë.

24Ebug Zamba enganaṅ, ebulban. 25Ndò Barnabas ban Saulus bëngadugan a Yerusalem, adzala bëngamana dzala esye dzaban, bësòò ai Yohannes ya bëloege na Markus.

Currently Selected:

Bap 12: NTE12

Highlight

Copy