Mathai 26

Isu bung bädü hethang aeceng pa

Mar 14:1-2; Luk 22:1-2; Joh 11:45-53

1Isu lä honi phüng na mätu pyng ea äma üng äkähui na tea thui pa dy. 2Äni ma “Käni netä pyng-a Cäqengja te pawi lä tyng ai dy näte nang ce lä mäny ö by dy. Honi kätü-a khimi lawngtä lä Kai, Khimi üng Cäpaw, bung thinglang qawng-a täheng hethang täre na kö thung-a a ai dy” näkha näpa.

3Tupyng-a mäthykung käleng na hai mätawngky na lä mäthykung kälengky Kaiafa üng ing-a aekäcö ö dy. 4Äni ce lä Isu bung kangru-a ne kha bädü hethang aeceng ö vi dy. 5Äni ce ma “Pawi käni-a mä-ai lä äni bung ne te dang y lyng. Khimipui na aepuilung ö vi ai” näkha näpa.

Bethani vang-a Isu üng älö-a situi bälawng pa

Mar 14:3-9; Joh 12:1-8

6Isu lä Bethani vang-a ängang käsi mang vai saite Simon üng ing-a awng. 7Äni ca te kätü-a nawngmädi lawngtä lä kung pa dy. Äni lä ävang ting bärai saite rimui kähawi kälung kanglung pilang bung-a khai vi. Nawngmädi ma Isu üng älö-a rimui tui bälawng pa dy. 8Äkähui na hokä nung ea lä kädawtho kha “Ätephüng-a hikä rimui tea hini nawngmädi lä täpang aetütü te mei. 9Hini rimui jaw dylä, phawisae awng mang-a dang ai. Honi phawisae lä khimi kangtang na tea py te lä hawiky” näkha äma ce tingtawi aethui ö dy.

10Äni ce thui te Isu ma mäny ea “Ätephüng-a nang ce lä nawngmädi tea bälungbi hai ö te mei. Kai tea äni ma sa saite lä hawi te kae ecy. 11Mätang saite na lä nang ce hai mangtä awng jawjaw te kae. Kai lä nang ce hai mangtä awng jawjaw he y lyng. 12Kai üng äro bung ö hethang äni lä aerü rüng kha kai üng ätabung qawng-a rimui tui hai bälawng te dy. 13Tängai ö. Khimi ce ma Angthang Kähawi thui saite älawngpre qütä-a lä hini nawngmädi ma sa saite äphüng thui kha äni ce lä sämai jaw ö vi ai” näkha näpa.

Judae lä Isu bung a hethang bälung aedü pa

Mar 14:10-11; Luk 22:3-6

14Tupyng-a äkähui lawng hawlai netä thung üng Judae Iskriota lä mäthykung käleng na tea ly pa dy. 15Äni ma “Isu bung nang ce kö thung-a a dylä, kai tähang tangkae pjaetä py ai mei” näkha düng pa. Äni ce ma Judae tea tangkae pjae ruithungtä py pa dy. 16Tupyng-a Judae lä Isu bung a hethang älang kähawi mäqang pa dy.

Areng üng kädüngbö

Mar 14:12-21; Luk 22:7-14; Joh 13:21-30

17Täkaw aepae saite aesi qa y te pawi üng angcü käni-a äkähui na lä Isu tea ly pa dy. Tukha äni ce ma “Nang üng Cäqengja te pawi kädüngbö ca hethang kai ce lä mani mityng-a aerü rüng pa ai mei” näkha düng pa.

18Isu ma “Nang ce lä märü thung-a hini khimi tea ly ö ba. Äni tea kai ce üng särae ma Säthaw ma kai tähang khai saite kätü lä aenai dy. Nang üng ing-a kai üng äkähui na hai mangtä Cäqengja te pawi sa hethang ngai ti” näkha täru vi näpa ba.

19Isu ma thui te kätyng äkähui na lä Cäqengja te pawi üng kädüngbö tähang sa rüng pa dy.

20Kädüng tyng te kätü-a, Isu lä äkähui lawng hawlai netä na hai mangtä bö aw kha ca ö dy. 21Äni ce lä bö ca te thüng-a, Isu ma “Tängai ö. Nang ce thung üng khimi lawngtä ma kai bung lä täre na kö thung-a a ai” näkha näpa.

22Äkähui na lä bälung hawi y phi te hai ma “Areng ä, hini lä kai mei” näkha lawngtä pyng-a lawngtä ma Isu tea düng pa ö dy.

23Isu ma äni ce tea “Kai hai mangtä täkaw hai pangkae-a täpaw kha ca saite khimi lawngtä vi. 24Caekäcai ma tärü te kätyng Kai, Khimi üng Cäpaw, lä dü vi ai. Tungaila Kai, Khimi üng Cäpaw, bung täre na kö thung-a a saite khimi lä tähang si. Honi khimi aepeng y khyry dylä, äni tähang lä hawiky” näkha näpa.

25Tupyng-a äni bung täre na kö thung-a a saite Judae Iskriota ma Isu tea “Särae ä, kai mei” näkha düng pa.

Tukha Isu ma “Nang ma thui te kätyng kae dy” näkha näpa.

Areng üng kädüngbö phüng

Mar 14:22-26; Luk 22:14-20; 1 Kor 11:23-25

26Isu hai äkähui na lä kädüngbö ca ö te thüng-a Isu lä täkaw la kha Säthaw tea kawng te lo thui pa dy. Tupyng-a täkaw tea täpe kha äkähui na tea “Hini täkaw lä kai üng ätabung vi. La kha ca ö” näkha äni ce tea py pa dy.

27Tupyng-a cäpje tui bynglyng tea la kha Säthaw tea bälaw pyng-a äni ce tähang py pa be dy. Äni ma “Nang ce angxynlyng na hini bynglyng nei ö. 28Hini cäpje tui lä awng mang saite khimi na üng hunghö tähang bälawng te kai üng äthi vi. Hini äthi lä Säthaw hai khimi ce säla-a aenai saite vi. 29Tängai ö. Kai pä-ai üng pre-a nang ce hai mangtä cäpje tui kangthae nei haile y rytä kai lä cäpje tui tea nei y dy” näkha näpa.

30Tupyng-a Isu lä äkähui na hai ae-awi haetä thui pyng-a Olive kung na awng saite me anghung mang-a ly ö dy.

Isu ma Peterae aephae ai te phüng thui rüng pa

Mar 14:27-31; Luk 22:31-34; Joh 13:36-38

31Tupyng-a Isu ma äni ce tea “Caekäcai thung-a tärü saite lä, Kai lä beram rui saite kung bung bädü kha beram na lä aehui sangxang ö vi ai” näkha awng. “Honi kätyng vaidüng nang ce angxynlyng na ma kai bung lä khaisö kha aehui pa öng vi ai. 32Tungaila Säthaw ma kai bung kädü thung üng mätha haile tyng pyng-a, Kalile khö-a kai lä nang ce ly y kälang-a ly mang vi ai” näkha näpa.

33Peterae ma Isu tea “Khimi kälang angxynlyng na ma nang bung khaisö ngaila kai lä manila nang bung khaisö y lyng” näkha näpa.

34Isu ma Peterae tea “Tängai khü Peterae ä, Vaidüng kärung-a aekhawng y te kälang-a nang lä ‘Äni tea mäny y’ näkha qengthungtä thui vi ai” näkha näpa.

35Tungaila Peterae ma Isu tea “Kai lä nang hai mangtä dü hethang ea mäteng ma nang bung mäny y näkha aephae y lyng” näkha thui pa dy.

Tukha äkähui kälang angxynlyng na la hini kätyng thui ö bawi pa dy.

Kesamani angkhaw thung-a Isu aetang pa

Mar 14:32-42; Luk 22:39-46

36Isu hai äkähui na lä Kesamani ämüng awng saite angkhaw haetä-a ly ö dy. Isu lä äkähui na tea “Kai lä ho-a aetang te thüng-a nang ce lä hini mityng-a aety ö ba” näkha täru pa dy. 37Tupyng-a Isu lä Peterae hai Zebede üng cäpaw Jaeko ni Johan bung äma hai mangtä ka pa dy. Äni lä bälung mätang te hai bälungbi phi vi dy.

38Tukha Isu ma äni ce tea “Kai lä dü aenai te khytä bälungbi phi vi dy. Nang ce lä hini mityng mang awng kha kähawi-a aering ö ba” näkha näpa.

39Tupyng-a Isu lä äjecäcaw ly kha älawng qawng-a aebo ea “Ä-ai ä, nang lä äte angxynlyng na tea sa haw te kae. Hini mätangbälai saite kai aeting y hethang säbawng kü jo. Tungaila kai üng aely kängai kätyng hang sy. Nang ma üng aely kängai kätyng kae sy” näkha aetang pa dy.

40Tupyng-a Isu lä äkähui lawng thungtä na tea aekö haile tyng kha, äni ce lä i ö qu ea awng te nung pa dy. Isu ma Peterae tea “Nang ce lä tänaeritä mäteng ma i y käla kai hai mangtä aering haw y vi dy nang mei” näkha düng pa. 41Isu ma äni ce tea “Nang ce lä hunghö sa hethang bärawi bäleng saite thung-a qa y hethang aetang kha aering ö baw. Bälung hai lä hunghö sa hethang ngai y ngaila ätabung lä aethaw awng y” näpa.

42Tupyng-a Isu lä ly haile tyng kha “Ä-ai ä, hini mätangbälai saite kai te üng mäthuija haw y kha nang ma üng aely kängai kai aeteng dylä, tyng kae sy” näkha aetang pa dy. 43Isu äbaeni vawi haile tyng te kätü-a äkähui na lä ämi aemö phi kha i ö qu te nung pa vi dy.

44Tukha Isu lä ämäthung tho haile be kha angcü üng kätyng aetang haile pa be dy. 45Tupyng-a äkähui na tea vawi haile kha “Nang ce lä vaihi khytä i kha aehae ö te vi rawng mei. Kai, Khimi üng Cäpaw, bung lä hunghö sa te na üng kö thung-a a te kätü tyng vi dy. 46Aetha ö lawi baw. Co mä-ai ly ö si dy. Kai bung täre na üng kö thung-a a hethang khimi lä tyng dy” näkha näpa.

Isu bung ne pa

Mar 14:43-50; Luk 22:47-53; Joh 18:3-12

47Hokä Isu ma thui te thüng-a äkähui lawng hawlai netä na thung üng Judae Iskriota lä tyng pa vi dy. Äni hai mangtä aekei sawngseng thingbyng, na süng saite khimipui na la qa by. Honi khimi ce lä mäthykung käleng na hai mätawngky na ma mätaw ö saite khimi na vi. 48Isu bung täre na kö thung-a a hethang Judae Iskriota ma “Kai ma mänang saite khimi lä Isu dy mang ba. Äni bung ne ö ba” näkha äni ce tea äsäny thui pa rüng pa dy.

49Judae Iskriota lä Isu tea ly praw kha “Särae ä,” näkha Isu tea mänang pa khaw dy.

50Isu ma “Änang ä, nang sa he awng te na kärang-a sa lawi” näkha näpa.

Tupyng-a khimi ce lä Isu bung ne pa ö vi dy. 51Tungaila Isu üng äkähui lawngtä ma aekei aebäju ea mäthykung kälengky mawsawng lawngtä üng känawkhing tea saibawng pa dy. 52Isu ma “Aekei bung ä-ing-a mäceng la. Aekei süng saite khimi lä aekei hai-a dü saite tyng vi ai. 53Kai lä kai Pä-ai tea säbawng hethang mäkai dylä, Kai pä-ai ma äma üng angtawtha na bung awng mang-a mätaw ai näte nang ce lä mäny ö y mei. 54Tungaila Caekäcai ma thui te kätyng lä kai tea cungrü hai hethang kae te vi” näkha näpa.

55Isu ma khimipui na tea “Damarae bung ne te kätyng aetu aekei, thingbyng süng kha kai bung ne hethang ngai ö te ae. Kai lä käni qütä Säthaw üng Ingkäcai baesung thung-a aety kha Säthaw lo mätu te be. Hokä ea nang ce lä kai bung ne ö y. 56Tungaila hini na lä Caekäcai thung-a buisaw na ma tärü rüng saite lo na cungrü hai hethang vi” näkha näpa.

Tupyng-a äkähui angxynlyng na lä Isu bung khaisö kha aehui pa öng pa dy.

Judae na üng Sanhendrin kawngci maw-a Isu tea tärae cei pa

Mar 14:53-65; Luk 22:54-55; Joh 18:13-14, 19-24

57Tupyng-a äni ce lä Isu bung mäthykung kälengky Kaiafa üng ing-a nähai pa. Ha-a lä mäthykung käleng na hai mätawngky na hai Ubädi särae na lä aekäcö kha awng ö bawi te vi. 58Peterae lä kähanglaw mang mäthykung kälengky Kaijafa üng ing baesung thung khytä Isu üng leithung hui pa. Äni lä baesung thung-a kung kha mäthykung kälengky üng mawsawng reisae na hai mangtä aety kha awng pa. Isu tea ätemakä sa mei näte äni lä nung he ngai te vi. 59Mäthykung käleng na hai mangtä Judae na üng Sanhendrin kawngci üng khimi angxynlyng na lä Isu bung bädü haw hethang äni üng phüng kaeling thui saite na mäqang ö dy. 60Tungaila äni ce lä Isu sa tämang te dang pa ö y. Khimi kä-awng mang na ämaw-a ly kha Isu phüng kaeling kaemae thui ngaila äni ce lä Isu sa tämang te nung pa ö y vi. Kangkhüng-a khimi lawng netä lä aetha hawi kha, 61“Änini ma Isu lä ‘Kai lä Säthaw üng Ingkäcai bung täphra kha käni thungtä säla-a sa haile haw ai’ näkha thui vi” näkha näpa hawi dy.

62Mäthykung kälengky ma lä aedaw kha Isu tea “Honi khimi ce ma nang tea käsi thui saite na tea nang lä ätemakä la mäthang y käla ma awng te vi mei” näkha düng pa. 63Tungaila Isu lä sitäri-a awng pa kae vi. Tukha mäthykung kälengky ma “Nang lä Säthaw üng Cäpaw Mesia dy mei. Kai ce tea thui jo. Dungtäsa hing saite Säthaw üng ämüng tea aete kha kai lä nang tea düng te vi” näkha näpa.

64Isu ma “Honi lä nang üng älo vi. Tungaila kai nang ce tea thui ai. Vaimaw mang-a Kai, Khimi üng Cäpaw, lä haidae lengky saite Säthaw üng bangtang mang-a aety kha awng te hai khö angnüng qawng mang ly te tea nang ce lä nung ö vi ai rawng” näkha näpa.

65Mäthykung kälengky ma lä äma üng kä-o sä-ei kha “Mä-ai lä äte älo kälang na ngai be y dy. Äma ma tea Säthaw kätyng aesa saite lo nang ce lä thai ö bawi dy. 66Nang ce lä ätemakä dawng ö mei” näkha düng pa.

Äni ce ma “Isu lä dü sang vi” näkha näpa.

67Tupyng-a khimi phütä na ma lä Isu üng mimai-a mäce hai mäthawi pa ö dy. Phütä na ma äkö hai thawng pa. Phütä na ma tangbeng-a äkö hai täbeng pa. 68Äni ce lä Isu tea mänui hai kha “Nang tea ämi ma bo te mei Mesia ä. Buisaw lo hai thui lawi by ä,” näkha näpa.

Isu bung mäny y näkha Peterae ma aephae pa

Mar 14:66-72; Luk 22:56-62; Joh 18:15-18, 25-27

69Honi kätü-a Peterae lä mäthykung kälengky baesung thung-a aety kha awng. Mäthykung kälengky üng mawsawng anglaw ma ly kha “Nang lä Kalile khö üng Isu üng äpy by be kä-aw” näpa.

70Peterae ma äni tea “Nang thui saite phüng kai lä mäny y” näkha khimi angxynlyng na maw-a aephae pa. 71Tupyng-a Peterae lä ing maw-a tho pyng-a äkälang mawsawng anglaw ma äni tea nung haile tyng be kha äteng-a aedaw saite khimi na tea “Hini khimi lä Nazare märü üng Isu hai mangtä awng saite vi” näpa.

72Peterae ma “Äni bung kai mäny y” näkha täking ea aephae pa be vi.

73Tänaetä pyng-a lä äteng-a aedaw saite khimi na ma Peterae tea “Nang lä äni ce thung üng khimi by. Nang ma üng älo tho te ätüng phüng-a mäny haw te vi” näkha näpa.

74Tupyng-a Peterae ma “Äni bung kai mäny y. Kai thui te tüng y dylä, Säthaw üng angsawi kai tea lawi sy” näkha thui pa dy. Qengtäma ae lä khawng raw pa dy.

75Tukha Peterae lä Isu ma äni tea “Aekhawng y te kälang-a nang lä kai bung mäny y näkha qengthungtä aephae ai” näsaite älo tea aedawng haile tyng dy. Äni lä tho kha bälung aekhy te hai ma rawsö kae vi dy.

Currently Selected:

Mathai 26: cekNT

Highlight

Copy