Luka 14

PENE XIV - 14

Te koao i akaoraia i te sabati: te tuatua i te kaingakai: te parabole i te kaingakai i akaviiviiia: auraka te au pipi a Iesu e akateitei: te satauro kia apaiia: no te are e akatu, e te ariki e aere ki te tamaki: te tai mangaro.

1E TAE akera ki tetai sabati, aere atura aia ki roto i te are o tetai Pharisea tangata mana e kai i te kai, te akara matariki maira ratou iaia. 2E i na, tei mua i tona aroaro tetai tangata, kua mate i te koao. 3Kua karanga aturā Iesu ki te au apii ture e te au Pharisea, na ko atura, #Mata 12:10E mea tika aina i te akaora i te maki i te rā sabati.#14:3 Tikaanga - e akairo uianga e kare ko te piriota. 4Kare ra ratou i ki mai. Kua rave atura aia iaia ra, akaora atura, e tuku atura kia aere ana: 5E kua karanga atura aia kia ratou, na ko atura, #Exo 23:5; Deu 22:4; Luka 13:15Koai to kotou e kare e totō mai i tana asini ki runga, e tana puakatoro, kia topa ki roto i te vaarua i te rā sabati? 6E kare atura e tika ia ratou kia patoi mai i taua tuatua ra.

7E kia akara atu aia i taua au manuiri ra i te rapurapu anga, kia riro ia ratou te ngai teitei i te kaingakai ra; kua tuku atura aia i tetai parabole, na ko atura kia ratou, 8Kia tuatuaia mai koe e aere ki te oroa akaipoipoanga, auraka e aere ki te ngai teitei i te kaingakai: ko te tuatua katoaia atu aea tetai tangata taoiau maata atu; 9Ko te aere atu oki taua tangata i tuatua ia korua ra, e te karanga atu kia koe e, Ka tuku mai i tenana ngai ki teianei tangata; ko te aere akama ua atu oki koe ki te ngai akaaka. 10#Mase 25:6,7Kia tuatuaia koe ra, e aere ua atu ki te ngai akaaka; e kia tae mai tei tuatua kia koe ra, kia na ko mai aia kia koe e, E tama, e aere atu koe ki runga atu: e teitei atura koe ki mua i te aroaro o te aronga e noo katoa i te kaingakai ra. 11#Iobu 22:29; Sala 18:27; Mase 29:23; Mata 23:12; Luka 18:14; Iako 4:6; 1 Pete 5:5Ko tei akateitei iaia uaorai, ka taakaakaia ïa; e tei taakaaka iaia uaorai, ka akateiteiia ïa.

12Kua karanga atura aia kiaia i tuatua mai iaia ra, Kia akatupu koe i te kaingakai avatea, e te kaingakai aiai, auraka e tiki atu i toou au oa ra, e toou au taeake, e toou kopu-tangata, e te aronga tangata tupu apinga nui ra; ko te tiki katoa mai aea ratou ia koe, ka tutakiia mai aea koe. 13Kia akatupu ra koe i te pokai, ko #Nehe 8:10,12te tangata rikiriki te tiki atu, ko te rima motu ra, ko te pirikoki, ko te matapo: 14E e ao toou i reira, kare oki a ratou kia tutaki mai ia koe: e tutakiia mai oki koe kia tae ki te tuakaouanga o te aronga tuatua-tika.

15Kua na ko maira tetai i taua au manuiri ra, i akarongo mai i taua tuatua ra, kiaia, #Apo 19:9E ao tona to te kai i te manga i te basileia o te Atua ra. 16#Mata 22:2Kua karanga atura aia kiaia, E kaingakai maata ta tetai tangata, e kua karanga atura aia ki te tangata e manganui. 17E tae akera ki te ora e kai ei ra, #Mase 9:2,5kua tono atura i tona tavini e tiki i taua aronga i tuatuaia ra, e karanga atu, E aere mai, kua vave te kai, kare e ape toe. 18Kua kotoe ua atura ratou ravarai. Na ko maira tetai, I oko ana au i tetai kainga, e aere ana au e atoro e tikaʼi; kia tukuia au e koe. 19Kua tuatua maira tetai, I oko ana au i te puakatoro e rima zugo, e te aere nei au e timata; kia tukuia au e koe. 20Kua tuatua maira tetai, I akaipoipo ana au i te vaine, kare oki au e tika kia aere. 21E kia oki maira taua tavini ra, kua akakite maira ki tona pu i taua au tuatua ra. Riri akera te pu o te are, kua karanga atura ki tona tavini, E aere viviki ki te au arataa, e te au mataara, i te oire nei, e arataki mai i te tangata rikiriki, e te rima motu, e te pirikoki, e te matapo. 22Kua tuatua maira taua tavini ra, E te atu, kua oti akenei taau i akaue mai nei, e te atea ua nei rai. 23Kua karanga atura taua pu ra ki te tavini, E aere koe ki runga i te au ara tiroa e te au pae koro ra, e unuunumou tika atu ei ki te tangata kia aere mai, kia ki rava toku are. 24E akakite atu oki au kia kotou, #Mata 21:43; 22:8; Anga 13:46Kare rava tetai, i taua aronga i tuatuaia ra, e kai iti ua ake i taku nei kaingakai.

25E urupu maata tei aru aere mai iaia: e kua ariu maira aia, kua tuatua maira kia ratou, 26#Deu 13:6; 33:9; Mata 10:37 Ko te tangata e aere mai kiaku nei, #Roma 9:13e kare i akaruke i tona metua tane, e tona metua vaine, e tana vaine, e tana au tamariki, e tona au taeake, e tona au tuaine, #Apo 12:11 e tona katoa uaorai ora, kare aia e riro ei pipi naku. 27E #Mata 16:24; Mare 8:34; Luka 9:23; 2 Timo 3:12te kore e apai i tona uaorai satauro, ka aru mai ei iaku, kare aia e riro ei pipi naku. 28#Mase 24:27Koai ïa tangata i o kotou na, kia akakoro i te are e akatu, kare e timata ana i te noo ki raro, ka tatau ei i te apinga ei ou e oti ei, i te rava anga tona apinga? 29Ko te tamou aea aia i te tango ki raro, e kare akera i oti iaia, e riro oki te aronga i akara ra i te aviri mai iaia, 30Na ko maira, I timata io nei teianei tangata i te akatu i te are, e kare akenei i oti iaia. 31E koai oki ïa ariki kia aere aia e tamaki atu ki tetai ariki, kare e noo ana ki raro, ka akaeatu marie ei i te tika anga iaia e tona aronga tangata okotai ngauru i te tausani, kia aravei ua atu aia i tetai e tiki e tamaki iaia ra, ma tona au tangata e rua ngauru i te tausani? 32E kare ra, e vaio atea tetai, ka tono atu ei i te karere e pati atu i te au. 33Koia katoa oki kotou, ko tei kore i akaruke i te au mea katoa nana ra, kare aia e riro ei pipi naku.

34 # Mata 5:13; Mare 9:50 E mea meitaki te tai, kia riro ra te tai ei mea mangaro, eaa atura te mea e taitai ei? 35Kare e meitaki i te one, kare oki i te taruta teita; e akaruke ravaia ra. E taringa tona ei akarongo ra, e akarongo aia.

Currently Selected:

Luka 14: CIMB

Highlight

Copy